ဆၧလီၩလၩ့လၬလၩ့ ဆၧၥၭထိၬပရၧၫ့ႇ မုအီၪပွံၭနံၩ မုနွ့ၫ (၂၃)

ပမူၩဒၩအီၪ လၧပကဘၪဆၧၩ့လိၬၥၭႇ ပကဘၪၥ့ၪလိၬၥၭအဆၧမၪနီၪလီၫႉ လၧဆၧၥုၪ့ထၪ့ႇ လၧဆၧမၩဎိၩမၩဒိၪၥၭႇ ဒဲ ဆၧဒၪလိၬၥၭလန့ဘၪအဖၧၩ့နီၪ လမွဲဘၪတၭႇ လၧဆၧခိၭနၪယွၩအဆၧမၪလူၬအဖၧၩ့ႇ ၥုၪ့ဂ့ၩၥၭဘွၩအဖၧၩ့ႇ ဆၧဆၪ့လၩ့ၥၭအဖၧၩ့ႇ ပကဘၪဒုၭဖ့ၪထုၪ့ၥုၪ့ထုၪ့ၥၭလိၬၥၭလီၫႉ 
ယ့ၫၡူၬစံၭဝ့ၫႇ ပကဘၪဒုၭၥ့ၪယၫ ပထၧၫ့ဖုဝဲအဆၧမၪနီၪလီၫႉ လါနၫ့ဂ့ၩႇ ထီမုဆၫကနံၩယီၩႇ ၦၡၩကနၩ့နၩ့ႇ ထၧၫ့မၫဝၩကဂၩဒဲကဂၩႇ  ထၧၫ့ဖုဝဲႇ ထံၩၥိၭကဂၩဘၪကဂၩႇ အီၪက့ၪစၧၩ့ထၬလိၬၥၭအဆၧမၪႇ  စ့ၩရၫ့စၪလိၬၥၭအဆၧမၪႇ မၩလၩ့ယံၭလၩ့ဘဲၩ့ႇ မၩဂၭဂီၩ့လိၬၥၭအလၩအဖၩ့ႇ လၧဆၧလူဖီးထၫဖီးအဖၧၩ့ႇ  လီၩဖျီၪ့ထၪ့လိၬၥၭအဆၧမၪႇ အဆၧဂဲးဆံၭဘၭဆါႇ  လၧၦၡၩၥံၪမ့ၬယၫႇ ဒဲလကၭဒံၭဘၪ လၧၦၡၩဆုးကျိၭလိၬၥၭအလး လၧအ့ၫတၫနဲၭအဖၫ့ခိၪနီၪလီၫႉ ၦၡၩအီၪဝ့ၫလၧအဆၧဒဲၩဘၭတၭႇ မ့ၬမဲၥ့ၪကိၭဂၩဒ့ၭလီၫႉ 
အ့ၪပဒၪဘၪ ပထၧၫ့ဖုထၧၫ့ဝဲႇ ပထံၩပၥိၭႇ ပဖိၪပလံၩၥ့ၪ လ့ၩဘၪမၪဖၧၩ့ၥၭႇ လၩ့ထ့ၭလၧဆၧဒဲၩဘၭဖၧၩ့အခၫႇ ပမူၩဒၩအီၪဝ့ၫလၧ ပဘၪလ့ၩဒုၭၥ့ၪယၫအဝ့ၫၥံၪအဆၧမၪႇ ဒုၭထုၪ့ၥုၪ့ၥၭဎ့ၭဎ့ၭဎိၭဎိၭႇ ဘဲၫၥိၭကၥ့ၪယၫလၩ့အဆၧမၪဂီၩ့ ကဖိၬထၪ့ထဲၩ့ ဖၧၩ့ၥၭအတီၩအလီၩ့ဖၧၩ့အဂးနီၪလီၫႉ 
ၦၡၩကိၭဂၩဒ့ၭနီၪ အဆၧဒဲၩဘၭဆၧဘၪမၪအီၪကိၭဂၩဒ့ၭလီၫႉ လါနၫ့ဂ့ၩႇ ၦၡၩဂၩဒ့ၭနီၪၥ့ၪယၫလၩ့ အဆၧမၪအ့ၬႉ ကနၩ့နၩ့ၥ့ၪယၫဝ့ၫ လၧအဆၧမၪအီၪလါနၫ့ဂ့ၩႇ အီၪက့ၪၥူၫထၬႇ မၩဘံၭထၬအဆၧမၪႇ ဒဲအုၩ့လၩ့အဆၧမၪအ့ၬႉ 
လၧကၭၥလံၬဆၧအီၪကီၪ့ဆံၫ့ဎံၪ အဆၧၥီၪ့ဆၧၥၫ့ဖၧၩ့ႇ ဆၧယၫ့ၥုၪ့ယၫ့ၥၭဆၧမၩ ဘၪဆဲၫ့လၧနးၥၭအဂး အီၪဝ့ၫ (၇) မံၩ့လီၫႉ ဝိညာဉ်နှင့်ဆိုင်သော ကောင်းမှု(၇)ပါး 
အဆိၫထုၬကထုၪနီၪ မွဲဝ့ၫ ပကဘၪၥီၪ့ထဲၩ့ၥၫ့ထဲၩ့ႇ ဒုၭထုၪ့ၥုၪ့ထုၪ့ၥၭ ၦဆၧဒဲၩဘၭဖိၪနီၪလီၫႉ 
လါနၫ့ဂ့ၩႇ ပဝ့ၫၥ့ၪကိၭဂၩဒ့ၭယီၩ ပဆၧဒဲၩဘၭအီၪကိၭဂၩဒ့ၭအကၠီၩ့ႇ ပမိၥီၪ့ထဲၩ့ၥၫ့ထဲၩ့ ဆၧဒဲၩဘၭဖိၪၥံၪအဂူၫဂၩအ့ၬႉႉ
ပဝ့ၫဒၪ မွဲဝ့ၫဆၧဒဲၩဘၭဖိၪမီၪ့ဎီၩ့ဒၪလိၬၥၭအကၠီၩ့ႇ  အ့ၪပဒၪဘၪၦလဂၩဂၩႇ လ့ၩဘၪမၪဖၧၩ့ၥၭအခၫႇ  ပမိမၩၥ့ၪယၫပၥၭအ့ၬႉ ပမိမၩဘၪဆဲၫ့ပၥၭလၧၦၡၩအဂူၫဂၩအဆၧမၪအ့ၬႉ ၦလၧအလ့ၩဘၪမၪဖၧၩ့ၥၭနီၪ အၥၭဎိၩန့ပၧၩအကၠီၩ့ႇ ပထၧၫ့ဖုထၧၫ့ဝဲႇ ပဘူၭပထံးအကၠီၩ့ႇ  ပကလ့ၩဒုၭၥ့ၪအဆၧမၪအဂး ပညၩၡၫဆၧႇ ဒဲပယိၦၡၩအမ့ၬလီၫႉ အၡါမၬနီၪႇ လၧဆၧဒဲၩ့ဘၭဖိၪၥ့ၪအခံးအဂးႇ အဆၧအၪ့လဲၩထၪ့ၥၭကအီၪထၪ့ဝ့ၫအဂးႇ ပညၩၡၫဆၧန့အ့ၬႉ ပယိၦၡၩအမ့ၬန့အ့ၬႉ ဘဲၫကဆါယ့ၫၡူၬမၪလူၬပၧၩအၥိၭႇ ပကဘၪမၩလၧၫ့ဎွ့ၩထၪ့ႇ မၩလၩ့ထူၬပမူၩဒၩလီၫႉ 
ပဆၧဒဲၩဘၭဆၧဘၪမၪလအီၪမၭဆံၭႇ ပလၧၫ့ဎွ့ၩမၭဆံၭႇ အ့ၪပကၥီၪ့ထဲၩ့ၥၫ့ထဲၩ့ ဆၧဒဲၩဘၭဖိၪၥံၪစွါဘိၩႇ မွဲပမၩကကဲၪလၫ့နးကၠၪလၧၩ့အ့ၬႉ အ့ၪပလဒုၭထုၪ့ၥုၪ့ထုၪ့ၥၭဘၪ ဆၧဒဲၩဘၭဖိၪအဂူၫဂၩစွါဘိၩႇ ဘဲၫဎြံၬဖိၬကဂၩအၥိၭႇ ပမူၩဒၩလၩ့ထူၬအ့ၬႉ အ့ၪပမူၩဒၩလလၩ့ထူၬဘၪစွါဘိၩႇ ပကဘၪထိးဆၧစ့ၩရၫ့လီၫႉ