ဆၧလီၩလၩ့လၬလၩ့ ဆၧၥၭထိၬပရၧၫ့ႇ စဎွၩယ့ၫၡူၬအဘိၪ့နံၩ

ကဆါယ့ၫၡူၬထဲၩ့ထၪ့ထဲၩ့ လၧမူၭခိၪလၧအဖါယွၩအီၪလါနၫ့ဂ့ၩႇ အဝ့ၫဆုးအီၪ လၧအၡၩခမျၧးအကျၩႇ လၧအၡၩခမျၧးအဖၧၩ့ႇ လၧအဝ့ၫၥံၪအဆၧၡၪ့ဆၧနၭႇ ဆၧကဲၪဆၧဂဲၩႇ ဆၧစူၭဆၧဆၫအဖၧၩ့လီၫႉ 
ယ့ၫၡူၬအနၫ့ဆါဒၪဝ့ၫႇ အီၪလၧဂၪ့ခိၪချိၫ့ယီၩအထီႇ အဝ့ၫၥီၪ့လိၪနဲၪလိၪအ့ၪပၧၩႇ လၧအချဲၩ့အလူအထၫႇ ဒဲလၧဒီၩ့ဂ့ၩထ့ၬဘၪလဖၪနီၪလီၫႉ 
အနၫ့ဆါဒၪဝ့ၫႇ ဘုၪအၪ့ဘုၪအီၩႇ ၦၥၭဝံၥၭလဖၪႇ ယၫ့ၥုၪ့ယၫ့ၥၭႇ ၦဆၧဒဲၩဘၭဖိၪႇ လ့ၩအီၪၡီၩ့ႇ လ့ၩအီၪကွ့ၩႇ ၦၥုၪ့ခါၥၭလၩ့လဖၪႇ မၩဘျၪထဲၩ့ၦစူၭၦဆၫလဖၪလီၫႉ 
ယ့ၫၡူၬနီၪ မွဲဝ့ၫနးၥၭအစဎွၩႇ မူၭခိၪအစဎွၩတၭႇ မီၪ့ဎီၩ့ ဂၪ့ခိၪအစဎွၩအ့ၬႉ ဂၪ့ခိၪစဎွၩအၪဒၪဆၧႇ အၥၭထၪ့ထီၫႇ မၩဎိၩမၩဒိၪၥၭႇ ဒဲအၡၩခမျၧးဘၪၥၭမဲၪဝ့ၫတၭႇ ၦၡၩဘၪဆၧအခ့ၫအၡၩဆၧမၩ လၧအဝ့ၫၥံၪအဂးလီၫႉ စဎွၩယ့ၫၡုၬနီၪ တဲၩ့လၩ့ဆၧထီးလူၬႇ ၥ့ၪယၫ့ဆၧထီးလူၬႇ လၧၫ့ဎွ့ၩလၧဆၧဂ့ၩဆၧဘွၩထီးလူၬလါနၫ့ဂ့ၩ အၥၭထၪ့ထီၫအ့ၬႉ အဝ့ၫအၥၭဆၧၩ့ႇ ဆၪ့လၩ့အၥၭႇ ဒဲ ဂဲၫလၩ့မၩဆၧအခ့ၫအၡၩဆၧမၩ လၧၦၡၩၥံၪအဂးလီၫႉ 

ပကဘၪအီၪၥၭမၧၫ့ လၧယ့ၫၡူၬစဎွၩ အဆၧပၧၩ့ဆၧအဖၫ့လၬလီၫႉ
အ့ၪပလထိးဆၧၫ့ဘၪ စဎွၩယ့ၫၡူၬအဆၧပၧၩ့ပၧၩတၭႇ  ဆၧအဂူၫဂၩ ကဂဲၫပၧၩ့ပၧၩလီၫႉ မုၪခီၩလဲးႇ ဆၧဒဲၩဘၭႇ ဆၧၥၭထၪ့ထီၫႇ ဆၧၥုၪ့လဲးၥၭဘျၪႇ ဆၧၥၭကွံၩဆၧႇ ဆၧအၧၩ့ဆၧၥၫ့ႇ ဒဲဆၧလတီၩလလီၩ့ဘၪလဖၪနီၪ ကဂဲၫပၧၩ့ထၬပၧၩတၭႇ ကၥိၫ့ပၧၩ ဆၧၥံၫဆိၩကၠၪအလးလီၫႉ ဆၧနီၪအကၠီၩ့ ပကဘၪအီၪၥၭမၧၫ့ လၧယ့ၫၡူၬစဎွၩ အဆၧပၧၩ့ဆၧအဖၫ့လၬလီၫႉ