ကဆါယ့ၫၡူၬအခံးအဂၩ့ အၪ့လဲၫ့ထၪ့ခွံၬၥၭဘိၪ့မုနံၩ

...ယ့ၫၡူၬနီၪ ဘဲၫယွၩအဖိၪခွၫလဂၩဎးအၥိၭႇ အဝ့ၫမၩဆၧလၩ့ႇ မၩဘျၪထဲၩ့ၦစူၭၦဆၫႇ မၩဆံၫ့ထၪ့ထဲၩ့ၦခံၫထူၬဆၫအၧၩ့လဖၪႇ နၫ့ထၪ့ခွံၬဆၧနၪလဖၪႇ မၩအၪထၪ့ကိၪယဲလီၫ့ဒဲယၪနံၫဘံၪ့ ဒုၭအၪ့ၦၡၩအဂၩယဲထီၫအကၠီၩ့ ၦခမျးၥံၪဒဲအထံၩအဖျဲၥံၪ ဒၪဘၪဝ့ၫလီၫႉ 

လါနၫ့ဂ့ၩ လၧကနံၩယီၩဆၧၥၭထိၬပရၧၫ့အဖၧၩ့နီၪ ယ့ၫၡူၬအခံးအဂၩ့အၪ့လဲၩ့ထၪ့အၥၭႇ နဲၪဖျီၪထၪ့အလၩ့အဖၩ့ယီၩ အ့ၪလမွဲဘၪ အထံၩအဖျဲၥၧၫ့ဂၩနီၪ ၦၡၩအဂူၫဂၩဒၪဘၪနးဂၩအ့ၬႉ ယ့ၫၡူၬလချုၭဘၪဆၧဖ့ၪလၫ့ခွံၬဒံၭဘၪ လၧၦလုဆၧအဒိၪႇ ၦၥုၪ့က့ၭၥၭၡၭအစူၪဖၧၩ့ႇ ပဘၪထိးနိၫ့ထိးနၭႇ လချုၭၥံၫဒံၭဘၪႇ လချုၭဂဲထုၪ့ဒံၭဘၪလၧဆၧၥံၫႇ အဝ့ၫနဲၪဖျီၪထၪ့အလၩ့အဖၩ့ႇ အစီၩ့ဒိၪအမၩ့ဒိၪ အဆိၫထုၬလဘျၩ့ ဘဲၫယွၩကဂၩအၥိၭနီၪလီၫႉ  

ယ့ၫၡူၬအထံၩအဖျဲ ဒၪဘၪယွၩအလၩအဖၩ့နီၪလကၭဒံၭဘၪ အဝ့ၫၥံၪနါဂၧၫ့ဘၪ ဖါကဆါယွၩအလူၥီၫလၩ့ လၧဆၧအုၪအကျၩႇ စံၭဝ့ၫဒၪႇ 
အယီၩလဂၩ မွဲယဖိၪခွၫၥၭဘီၩ့တၭႇ မုၬယၥၭလၧအဝ့ၫနီၪႇ ခိၭနၪအလူဆံၭႉ 
လါနၫ့ဂ့ၩႇ လၧခိၪချိၫ့ဖၧၩ့ယီၩ ဆၧအလူအီၪဝ့ၫအၪမၬလီၫႉ ၦၡၩအလူႇ ဆၧအဂူၫဂၩအလူႇ 
ပဝ့ၫဒၪ ၦၡၩအၪဒၪဆၧႇ နဂါဂၧၫ့န့ၫ ဆၧလၧပအဲၪဒိၭခိၭနၪလဖၪနီၪလီၫႉ ပအဲၪဒိၭခိၭနၪ ၦၡၩအဂူၫဂၩႇ ဒဲဆၧအဂူၩအလူ အၪနဲၪဒံၭ ပအဲၪဒိၭခိၭနၪယွၩအလူဒံၭလီၫႉ 

အဲၪကွံၩဘၪထၧၫ့ဖုဝဲၦ ဆူနဲၩဖိၪထီးလူၬၥံၪဧ့ႇ

ယ့ၫၡူၬနီၪ မွဲဝ့ၫယွၩအဖိၪခွၫၥၭဘီၩ့ႇ မွဲဝ့ၫယွၩအလူအထၫအကၠီၩ့ႇ  ဆၧခိၭနၪယ့ၫၡူၬအဆၧချဲၩ့ႇ ဒဲအဆၧမၪလူၬနီၪ မွဲဝ့ၫဒၪ ဆၧခိၭနၪယွၩအဆၧမၪလူၬႇ ယွၩအဆၧချဲၩ့ယွၩအလူအထၫလီၫႉ ကဆါယ့ၫၡူၬအလူၬအထၫႇ ယွၩအလူအထၫနီၪ ဘၪဆၧကွ့ၭထၬဝ့ၫလၧ လံၬဆံၫ့ဎံၪႇ လၩ့ဆၫ့ဒၪဆၧႇ လၧဆၧၥၭထိၬအပရၧၫ့ဖၧၩ့နီၪလီၫႉ လၧကၭၥလံၬဎြံၬဖိၪၥံၪအဂးႇ ယွၩအလူအထၫႇ ယွၩအဆၧၥီၪ့ဆၧၥၫ့ယီၩ အီၪန့ၫလံၬဆံၫ့ဎံၪအဖၧၩ့လကၭဒံၭဘၪႇ အီၪလၧဆၧအီၪကီၪ့အဆၧၥီၪ့ဆၧၥၫ့ႇ ဆၧလီၩ့ဆိၩလၬဆိၩႇ  အီၪလၧၥၫ့ဎွၩႇ ၥၫ့ခိၪဒိၪႇ ဆၧအီၪကီၪ့အဖါၥံၪအဆၧၥီၪ့ဆၧၥၫ့ (လၧခိၪလၩ့ဘွၩခီၫ ပကိၭဝ့ၫႇ Magisterium, အသင်းတော်သွန်သင်ခွင့်အာဏာ)နီၪလီၫႉ 

ကကၠၪကၠၪ ပနါဂၧၫ့ဘၪ ဎြံၬဖိၪလနၩ့နၩ့ႇ စံၭဝ့ၫႇ မစဲအၫႇ ယ့ၫၡူၬဎြံၬနီၪ ဂဲၫထဲၩ့ထဲၩ့လၧခၪ့ခိၪချိၫ့ယီၩ နံၫဘျၩ့လဘျၩ့ႇ နဲၪဖျီၪၥၭ လၧခးအနီၪ လၧခးအယီၩ ပနါဂၧၫ့ယံၩယါလီၫႉ ကဆါဎြံၬ ကဂဲၫထဲၩ့ဆံၭလဲၪ ပၥ့ၪယၫအ့ၬႉ ဂၪ့ခိၪအဆိၩထုၬမုနံၩနီၪႇ ယ့ၫၡူၬကဂဲၫစ့ၩရၫ့ ၦမၧၫ့ဒဲၦၥံၫမုနံၩမုၥၫ့နီၪ ပၥ့ၪယၫဆိၪဝဲၩဝ့ၫနးဂၩအ့ၬႉ ပဘၪၥ့ၪယၫလိၫနးဆ့အ့ၬႉ ဘၪနီၪလဲၪစွါဘိၩ
ယ့ၫၡူၬအီၪက့ၪထး အလူအထၫႇ အဆၧၥီၪ့ဆၧၥၫ့ႇ လၧလံၬဆံၫ့ဎံၪဖၧၩ့ႇ အီၪက့ၪထးအစီၩ့အမၩ့ လၧဆၧအီၪကီၪ့ခိၪနါႇ စပံတၧၫအစူၪဖၧၩ့ႇ (မၭၥုၫ ၁၈: ၁၈-)  ယစံၭနၥံၪတီၩတီၩယီၩႇ ထီးဒၪဆၧလၧနၥံၪစၧၩ့ထၬ လၧဂၪ့ခိၪချိၫ့ယီၩလမံၩ့မံၩ့နီၪ မိဘၪဆၧစၧၩ့ထၬဝ့ၫ လၧမူၭခိၪအဖၧၩ့လီၫႉ ထီးဒၪဆၧလၧနၥံၪကွဲၪလၩ့ လၧဂၪ့ခိၪချိၫ့လမံၩ့မံၩ့နီၪ မိဘၪဆၧကွဲၪလၩ့ဝ့ၫ လၧမူၭခိၪအဖၧၩ့လီၫႉ ...