အီၪပဒၩ့ထၬ ဂံၪ့ၦမၩဆၧဖိၪၥံၪအဂး ၦဆံၫ့ဎံၪ ဇံတၩအဂဲး (၂)

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪမုၪခွါလၧအအီၪအနိၪ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪနီၪ မွဲဝ့ၫဒၪ အီၪပဒၩ့ထၬ ဂံၪ့ၦမၩဆၧဖိၪၥံၪအဂး ၦဆံၫ့ဎံၪ ဇံတၩအဂဲး အထုၬကဆၫ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ လၧမုကနွံၫဒၪအိၩ ယအီၪထုၬခွံၬထၬ ၦဆံၫ့ဎံၪ ဇံတၩအဂဲးနီၪ မွဲဝ့ၫဒၪလၧ န့ထၪ့ဘၪ လးလၩအဂ့ၩအထီၫ လါနၫ့ဂ့ၩ ဇံတၩယီၩ အမ့ၬလဲၩၥၭဂဲၫ အီၪလၧ အဂံၪ့ဆါၥံၪအဖၫ့ခိၪနးမံၩ့အ့ၬ လကၭဒံၭဘၪ ဆၧမၩလဖၪယီၩ မွဲဝ့ၫဒၪ ဖ့ၪဆၧၫ့လၩ့ၥၭလၧကၠဲၬအီၪအကၠီၩ့ ဆၧကိၭမံၩ့ကိၭဆံၩ့နီၪ အီၪက့ၪထၬၥၭလၧကၠဲၬအီၪဂီၩ့ ဆၧမၩလဖၪနီၪ မၩဝ့ၫဒၪအဂ့ၩထုၬနီၪလီၫႉ လကၭဒံၭဘၪ ဇံတၩယီၩ ဘၪဆိၪဖၪဆၧႇ ဒုၪအၪ့ဒုၪအီၩ အဆၪဂီၩ့ န့ထၬဘၪ ဆၧအဎိၩအဒိၪအလး လါနၫ့ဂ့ၩ ကဆါဎြံၬ ၥီၪ့ၥၫ့ထၬ ဆၧလၧဆၧဎိၩဆၧဒိၪနီၪ မွဲဝ့ၫဒၪ ၦဂူၫဂၩလဂၩအဎီးအကၠီၩ့ ကဘၪအီၪက့ၪလၩ့ထၬအၥၭနီၪလီၫႉ မွဲဆၧနီၪ ဇံတၩယီၩ န့ထၬဘၪ ဆၧစီၩ့ဆၧမၩ့ယီၩ ၥိၩ့ဝ့ၫဒၪ ဂ့ၩဂ့ၩဘၪဘၪနီၪလီၫႉ ၦလၧအအီၪလၧ အဝ့ၫဒၪ အစူၪဖၫ့လၬလဖၪၥံၪနီၪ ဆၧယၫ့ၥုၪ့ယၫ့ၥၭဖၧၩ့ နဲၪအ့ၪဝ့ၫ ဆၧၥီၪ့ဆၧၥၫ့ ဂ့ၩဘၪစဲၪဂီၩ့ အဝ့ၫၥံၪနးဆ့ၭ ယၫ့ၥၭမၩဆၧၩ့ထဲၩ့ ၦအၡၪ့အယၬဖိၪၥံၪနီၪလီၫႉ

လၧဇံတၩအဆၧၥၭမၧၫ့ဖၧၩ့ လုထၪ့မံၩဆၩဆၧလုထၪ့ဒဲ ဒိၭန့အၪ့ ကိၪဘိၪ့ဆံၫ့ဎံၪယီၩ မွဲဝ့ၫဒၪ အဆၧၥၭမၧၫ့ န့ထၪ့ဘၪဂဲးဘၭ အဝံအစၧၩ့လမံၩ့ဂီၩ့ အဝ့ၫဒၪယီၩ ဆၧမုၬဆၧလၩအကၠီၩ့ အမ့ၬထံၫဎွ့ၩဝ့ၫဒၪ ကိၭကၠၪဒ့ၭနီၪလီၫႉ ကဘၪမၩဆၧဖံၭဆၧမၩလဖၪ အီၪဝ့ၫဒၪ အၪမၬလ့ၬလါနၫ့ ကအီၪဆုးကျိၭလိၬၥၭလၧ ကၠဲၬအဂး အီၪက့ၪထၬအခံၫ့နီၪလီၫႉ

ကကၠၪဒံၭ ဇံတၩလဂၩ အဝ့ၫဒၪကအၪ့အဂး ဆၧအၪ့ဆၧအီၩဒဲ အကဆါကအၪ့အဂး ဆၧအၪ့ဆၧအီၩလဖၪ ဖ့ၪလၫ့ခွံၬဝ့ၫလၧ ၦၡၪ့ဖိၪၥံၪနီၪအကၠီၩ့ ၦၡၩၥံၪလီၩထၬဝ့ၫ အီၪဝ့ၫဒၪဒံၭနီၪလီၫႉ မုဂီၩလနံၩ အဝ့ၫယီၩ ကလၩ့ဒၪ ၦအလိၪဆၧမၩဆၧၩ့ၥံၪအဂး အီၪက့ၪထၬထး အဆၧဖံၭဆၧမၩၥံၪဂီၩ့ လ့ၩဝ့ၫဒၪနီၪလီၫႉ ၦအမၩဆၧမၩလၧ Fraternelli ဂံၪ့ဒီၪ့ဖၧၩ့ လဖၪၥံၪနီၪ ဇံတၩလ့ၩစဲၪ့လၫ့လၧခီၫ့ ၥ့ၪယၫကၠၬဝ့ၫ ဂ့ၩဘၪစဲၪနီၪလီၫႉ လါနၫ့ဂ့ၩ အဝ့ၫၥံၪ လ့ၩယိဆုၬဝ့ၫလၧ အၪ့ဎိၪကိၪ ဆၧမၩလးကကၠၪ မူၭခိၪအၥီၫ့လဖၪ မၩခ့ၬအ့ၪ ဇံတၩအဆၧမၩနီၪ ဒၪထၪ့ဘၪဝ့ၫနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဇံတၩယီၩ အဝ့ၫကၥံၪအခံၫ့နီၪ ၥ့ၪယၫဆိၫဂုဝ့ၫၥိၭ လီၩၥ့ၪယၫအ့ၪ ၦဂူၫဂၩၥံၪနီၪလီၫႉ မွဲဆၧနီၪ အဝ့ၫဒၪကဘၪၥံၪအခံၫ့အဂး နးၥၭအဂဲး ကဘၪအီၪတဲၩ့ဝဲၩထၬၥၭလဖၪနီၪ မၩန့ဝ့ၫဒၪ ဂ့ၩဂ့ၩဘၪဘၪဂီၩ့ နံၪ့ ၁၂၇၁နံၪ့ႇ လၩ April ၂၇ၥၫ့နီၪ ၥံၪဖီၩ့ခွံၬဝ့ၫဒၪနီၪလီၫႉ ၦလၧအီၪဝ့ၫဒၪလၧ အဝ့ၫဒၪကၠၧၫ့ကၠၧၫ့ ၦအမၩဆၧမၩလၧ Fraternelli ဂံၪ့ဒီၪ့ဖၧၩ့ ၦၡၩလဖၪနီၪ ထီးနဲၪ့ထၬအဝ့ၫလၧ ၦဆံၫ့ဎံၪဂီၩ့ အဝ့ၫဒၪ အဆၧအၪ့က့ၩဘၩဆိၪဖၪဆၧၩ့ဆၧအဂး အၪ့က့ၩအၪ့ယၫထၬဝ့ၫနီၪလီၫႉ

လၧခီၩခီၩဒၪအိၩ ၦလၧအမၩနၧၩမၩစၪ ဇံတၩ Fraternelli ဂံၪ့ဒီၪ့ဖိၪၥံၪလဖၪ အဝ့ၫၥံၪ အနၫ့ဆါဒၪအဝ့ၫ လၧၥၫ့ဎွၩ Innocent ၁၂ အီၪက့ၪဂုးခၧၫ့ဝ့ၫလၧ ၦဆံၫ့ဎံၪလဂၩၥိၭဂီၩ့ကကၠၪ ဂံၪ့ဒီၪ့ဖိၪၥံၪယီၩ ဇံတၩ ၦၡၩကရွံထၪ့လၧ ၦဆံၫ့ဎံၪအဂး ဆၧလုဆၧဆံၫ့ ကယဲအီၪဝ့ၫဒၪနီၪ ထုၬလူၬထုၬဆံၫ့ဝ့ၫ ထီးအလူၬနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧလၧဆၧၥုၪ့ဆၧၩ့ၥၭဆၧၩ့နီၪ မွဲဝ့ၫဒၪ ၦဆံၫ့ဎံၪၥံၪ အပၩရမံၫနီၪလီၫႉ တခၩဒၪ ၦၡၩလဖၪ ဖံၭထံၩဖံၭၥိၭပၧၩလၧ ၥုၪ့ထၪ့ၥၭထီၫနးမံၩ့ ပကဘၪ အၪ့လုလၩ့ထၬပၥၭလၧ ဆၧၥုၪ့ဆၧၩ့ၥၭဆၧၩ့နီၪလီၫႉ ကဆါယွၩ အဖိၪခွၫ အနၫ့ဆါဒၪအဝ့ၫမွဲဂ့ၩ ၦလၧအမၩနၧၩမၩစၪ အဝ့ၫဒၪလဖၪနီၪ ချဲၩ့ဆၧၫ့ထဲၩ့ဆၧချဲၩ့ နးမီၪ့အ့ၬဂီၩ့ လၧဆၧၥုၪ့ဆၧၩ့ၥၭဆၧၩ့ဖၧၩ့ ရွံထၪ့ထုၪ့စူၪယၫနီၪလီၫႉ မွဲဆၧနီၪ ၥုၪ့ထၪ့ ဆၧၥုၪ့ဆၧၩ့ၥၭဆၧၩ့လါဆံၭႉ မွဲပကန့ထၪ့ဘၪ မူၭခိၪဘၩ့မုနီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ကဆါယွၩဒဲ ၦဂူၫဂၩၥံၪအဂး နဲၪဖျီၪထးထၬ ဆၧၥုၪ့ဆၧၩ့ၥၭဆၧၩ့အကၠီၩ့ ၦအဘၪမၩဆၧမၩလၧ ၦဂူၫဂၩၥံၪအဂံၪ့ ၦအမၩဂံၪ့ဆၧမၩဆၧဖိၪၥံၪအဂး အီၪပဒၩ့ထၬ ၦဆံၫ့ဎံၪ ဇံတၩအဂဲး ယရၩလၩ့န့အ့ၪဘၪနၥံၪနီၪ ထၨၪယီၩနီၪလီၫႉ ထၧၫ့ဖုဝဲထံၩၥိၭထီးအလူၬ ၥုၪ့ထၪ့ ဆၧၥုၪ့ဆၧၩ့ၥၭဆၧၩ့လါဆံၭႉ