ၦဆံၫ့ဎံၪ Angela Merici အဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪနီၪ မွဲဝ့ၫဒၪ ၦဆံၫ့ဎံၪ Angela Merici အဂဲးအကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၦဆံၫ့ဎံၪ Angela Merici ယီၩ မွဲဝ့ၫဒၪ ၦကိၪ့ၥ့ၪဖိၪ လဂၩနီၪလီၫႉ အဝ့ၫယီၩ လၧဆၧကိၪ့ၥ့ၪယီၩအကၠီၩ့ ကဲၪထၪ့ဝ့ၫဒၪလၧ ၦအမၩ ၦၡၩၥံၪအခံးအဂးအဂး ၦအမၩဆၧၩ့ဆၧဖိၪလဂၩနီၪလီၫႉ ၦဆံၫ့ဎံၪ Angela Merici ယီၩ အီၪဖျဲၪဝ့ၫဒၪလၧ နံၪ့ ၁၄၇၄နံၪ့ႇ လၧခး Italy လံၩထံၭနီၪလီၫႉ အဝ့ၫယီၩ ၦလၧအၥုၪ့ထၪ့ထးထၬ မံၩ့ဎိၩၥၪဖျီၪ Ursulines မံၭထၭမုၪခရၧၫ့ ၦလဂၩမွဲဝ့ၫဒၪနီၪလီၫႉ မံၭထၭမုၪခရၧၫ့ယီၩ ၥုၪ့လၩ့ထၬဝ့ၫနီၪလၧ နံၪ့ ၁၅၁၆နံၪ့ႇ ခး Italyႇ (ဘရေးရှာ)ဝံးအိၩနီၪလီၫႉ လၧခံၫ့ခၫအနီၪဒၪအိၩ လၧခး Italy ဖၧၩ့နီၪ ဆၧအၧၩ့ထၪ့ အၪမၬဒ့ၭနီၪလီၫႉ ၦၡၩၥံၪ ကၠဲၬလူကၠဲၬဂဲး လအီၪဘၪၥံၪႇ ဆၧမၩနၧၩ့မၩစၪဆၧၥံၪႇ အီၪဝ့ၫဒၪ အၪမၬလ့ၬ မွဲဝ့ၫဒၪ အခံၫ့နီၪလီၫႉ ဘဲၫဆၧအထၧးအလၧးယီၩ Angela လဂၩ အၪ့ဎၬဆီၫ့မီၪ့ဝ့ၫ ထံၫထံၫဆၭဆၭဂီၩ့တၭ ၦၡၩၥံၪအဆၧၥၭမၧၫ့ ဆၧအၪ့လဲၪထၪ့ ကန့အဂးမွဲဂ့ၩႇ ကအီၪၥၭမၧၫ့ထဲၩ့ ဘဲၫကဆါဎြံၬ အဆၧၥီၪ့ဆၧၥၫ့ၥိၭအဂးမွဲဂ့ၩ ခိးဂဲးခိးဘၭဝ့ၫဒၪနီၪလီၫႉ ဘဲၫနီၪဆၧၥၭမၧၫ့ၥိၭ အီၪၥၭမၧၫ့ဝ့ၫဒၪအဖၧၩ့ မိဆၧအီၪကီၪ့အဖၧၩ့ လၧအလိၪဝ့ၫဒၪ ဆၧမၩဆၧၩ့လဖၪ ကမၩဆၧၩ့ဝ့ၫဒၪအဂး အီၪက့ၪပဲၩထၬအၥၭနီၪလီၫႉ လၧအၥၭခံဖၧၩ့ အီၪဝ့ၫဒၪ ၥၭဆၧဆီၫ့မီၪ့အနီၪ ဒုၭအီၪထၪ့ဆၧမၩခံးဂၩ့အဂး အဝ့ၫဒၪယီၩ ဆၧၫ့မွဲအ့ၬႇ ဖူၬမွဲအ့ၬ ဆၧၥီၪ့ဆၧၥၫ့လမံၩ့ စႇထၪ့ ကွ့ၭဝ့ၫဒၪနီၪလီၫႉ အဝ့ၫဒၪယီၩ ၥံၪဖီၩ့ခွံၬဝ့ၫဒၪလၧ နံၪ့ ၁၅၄၀နံၪ့နီၪလီၫႉ ၦဆံၫ့ဎံၪ Angela Mericiယီၩ ဘၪထုၬယူၭယၪ့ၥၭလၧ ၦမိဖလအီၪဘၪၥံၪႇ ၦဆၧဆီၪ့ဆၧချဲၫ့လအီၪဘၪၥံၪအဂး အယိဝ့ၫဒၪ ၦဆံၫ့ဎံၪလဂၩနီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧႇ ၦဆံၫ့ဎံၪ Amgela Merici ယီၩ ၦလၧအီၪပဒၩ့ထၬ ဆၧဆီၪ့ဆၧချဲၫ့ လအီၪဘၪၦလဖၪၥံၪႇ မိၡါလလၧၫ့ဎွ့ၩဘၪ ၦလဖၪၥံၪႇ ၦလၧဘၪဒၪဆၧၫ့ယၫ ဆၧအၪ့ထၩလဖၪၥံၪႇ ၦဘၪဆၧၫ့ယၫ ဆၧကၪဆၧဂဲၩလဖၪၥံၪအဂး မွဲဝ့ၫဒၪ ၦဆံၫ့ဎံၪလဂၩနီၪအကၠီၩ့ ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬႇ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩ အဆၧအဲၪဆၧကွံၩလါဆံၭႉ