အီၪပဒၩ့ထၬ ဂံၪ့ၦမၩဆၧဖိၪၥံၪအဂး ၦဆံၫ့ဎံၪ ဇံတၩအဂဲး (၁)

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪမုၪခွါလၧအအီၪအနိၪ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪနီၪ မွဲဝ့ၫဒၪ အီၪပဒၩ့ထၬ ဂံၪ့ၦမၩဆၧဖိၪၥံၪအဂး ၦဆံၫ့ဎံၪ ဇံတၩအဂဲး အဆိၫဂုလဆၫ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၦဆံၫ့ဎံၪ ဇံတၩယီၩ လၧနံၪ့ ၁၂၀၀ အဆိၫဂုဒၪအိၩ အီၪဖျဲၪလၧ ဆၧၡၪ့ဆၧယၬ အီၪဝ့ၫဒၪ ဂံၪ့ဒီၪ့ဖၧၩ့နီၪလီၫႉ မွဲဆၧနီၪ အဝ့ၫယီၩ မၩလိၪဘၪၥၭလၧ ဆၧမၩလိၪအ့ၬဂီၩ့ ဆၧကိၪ့ဘၪကိၪ့ၥ့ၪလၧ အမိမိၥီၪ့အ့ၪအဝ့ၫ ဆၧကိၭမံၩ့ကိၭဆံၩ့ဒ့ၭဖၧၩ့ လီၩ့ဎွါထၪ့ ကဆါယွၩ ဆၧကိၪ့ၥ့ၪ လမံၩ့ဎးယီၩလီၩ န့ဘၪဝ့ၫနီၪလီၫႉ ဇံတၩယီၩ အၥၭဆံၭဝ့ၫဒၪလါနၫ့ဂ့ၩ ဆၧဆူနဲၩအဂုးအခၧၫ့ဒဲ ဒိၭနဲၩ့ၥၭလၧကၠဲၬ ဆၧမၩယီၩ လၧအၥၭခံဖၧၩ့ မၧၫ့ထၪ့ဝ့ၫဒၪအကၠီၩ့ လၧအၥၭအီၪ ၁၂နံၪ့အခၫ ကဘၪမၩဆၧမၩအဂး ဘၪထိးၥိၪ့စိၩအၥၭလၧ Fraternelli ဂံၪ့ဒီၪ့အိၩနီၪလီၫႉ

ၦဆံၫ့ဎံၪ ဇံတၩ အဂံၪ့ဆါၥံၪနီၪ အီၪဝ့ၫဒၪဘုၭထဲးလၧ ဆၧဘိၪ့ထၪ့ဘၩထၪ့ၥရိၬအကၠီၩ့ အဝ့ၫဒၪယီၩ န့ထၪ့ဘၪ ကိၪဘိၪ့ဆံၫ့ဎံၪဆၧလုထၪ့ ကိၭဂီၩဒ့ၭနီၪလီၫႉ မွဲဆၧနီၪ ဇံတၩလဂၩ လဂီၩနၪခုၬ လၩ့ထၪ့မံၩဆၩဆၧလုထၪ့ဆံၫ့ဎံၪနီၪလီၫႉ အဝ့ၫဒၪယီၩ တခၩဒၪ ဘၪမၩနးမံၩ့ အီၪက့ၪလၩ့ထၬအၥၭလၧ ဆၧမၩလဖၪယီၩ မွဲဝ့ၫဒၪ ဖ့ၪဆၧၫ့လၩ့ၥၭလၧကၠဲၬ အဆၧမၩအကၠီၩ့ ဆၧပွံၭၥၭအီၪဝ့ၫဒၪလါနၫ့ လၧကဆါကၠဲၬ အခိးအတၩဖၧၩ့ ထိးဆၧၫ့ဝ့ၫ ဂ့ၩဂ့ၩဘၪဘၪန့ဝ့ၫဒၪနီၪလီၫႉ ဖ့ၪဆၧၫ့လၩ့ၥၭလၧ ကဆါကၠဲၬ ၥၭအဆၧၥ့ၪယၫဖၧၩ့ ဆၧမၩလဖၪ မၩနၧၩ့ဝ့ၫဒၪ နၩရံၫအၪမၬလ့ၬနီၪလီၫႉ

အဝ့ၫယီၩ ဖ့ၪဆၧၫ့လၩ့ၥၭ အၪမၬလ့ၬ လါနၫ့ဂ့ၩ အဂံၪ့ဆါၥံၪနီၪ လအဲၪဒိၭဘၪအဝ့ၫဂီၩ့ နံၪ့ဆံၫလၩယံၬ မၩနၧၩမၧစၪ အဝ့ၫနီၪလီၫႉ ဘၪထိးဆၧၡၪ့ဆၧနၬ လါနၫ့ဂ့ၩ ဇံတၩလဂၩ လီၩဆၧၫ့ထဲၩ့ အဂံၪ့ဆါအ့ၬဂီၩ့ အီၪဝ့ၫဒၪလၧ ဆၧၥုၪ့ဆၧၩ့ၥၭဆၧၩ့ဖၧၩ့နီၪလီၫႉ

ဇံတၩလဂၩ ဘၪထိးမၩနၧၩမၩစၪဆၧလဖၪနီၪ ဆၧၥုၪ့ဆၧၩ့ၥၭဆၧၩ့ အီၪက့ၪထၬဝ့ၫဂီၩ့ မုကိၭနံၩ ဆၧဘၩဆိၪဖၪဖၧၩ့ လုထၪ့ဝ့ၫလၧ ကဆါယွၩအီၪနီၪလီၫႉ လုထၪ့ထၬ အဆၧၡၪ့ဆၧနၬလဖၪ လၧကဆါယွၩအီၪအကၠီၩ့ အဝ့ၫယီၩ န့ထၪ့ဘၪ ၥၭအဆၧၡူၪဆၧမုၬလဖၪ လကၭဒံၭဘၪ ထိးဆၧၫ့ဝ့ၫဂ့ၩဂ့ၩဘၪဘၪ ကန့အဂး န့ထၪ့ဘၪ ဆၧအခိးအတၩဒ့ၭနီၪလီၫႉ ဘဲၫနီၪၥိၭ ဖ့ၪဆၧၫ့လၩ့ၥၭယီၩအကၠီၩ့ ဂံၪ့ဆါၥံၪနီၪ ၥ့ၪယၫထၪ့ ဇံတၩ အဆၧဂ့ၩဒိၪရ့ၩဒိၪဂီၩ့ ကၠဲၬအခိးအတၩအကၠီၩ့ ပၩရမံၫလၧ အဝ့ၫဒၪန့ထၪ့ဝ့ၫဒၪနီၪ အၪ့အူၭထၪ့ဝ့ၫ ကိၭကၠၪဒ့ၭနီၪလီၫႉ

ဇံတၩလဂၩ နါဂၧၫ့ဘၪ ဆၧအၪ့အူၭအဆၧချဲၩ့လဖၪၥံၪယီၩ လါနၫ့ဂ့ၩ အၥၭထၪ့ထီၫလအီၪဘၪဂီၩ့ ဆုးလီၩ့ပၧၩ့ထၬ ဆၪ့လၩ့ၥုၪ့ဆၪ့လၩ့ၥၭဒဲ အပၩရမံၫနီၪလီၫႉ မွဲဆၧနီၪ အဂံၪ့ဆါလဖၪ ၥၭဆၧဆူနဲၩအီၪဝ့ၫဒၪလၧ အဝ့ၫအဖၫ့ခိၪ အၪမၬလ့ၬဂီၩ့ မၩထၪ့ထီၫအ့ၪဝ့ၫဒၪ အလးလၩနီၪလီၫႉ န့ထၪ့ဘၪ လးလၩအဂ့ၩအထီၫ လါနၫ့ဂ့ၩ ဇံတၩယီၩ အမ့ၬလဲၭၥၭဂဲၫ အီၪလၧ အဂံၪ့ဆါၥံၪအဖၫ့ခိၪနးမံၩ့အ့ၬ လကၭဒံၭဘၪ ဆၧမၩလဖၪယီၩ မွဲဝ့ၫဒၪ ဖ့ၪဆၧၫ့လၩ့ၥၭလၧကၠဲၬအီၪအကၠီၩ့ ဆၧကိၭမံၩ့ကိၭဆံၩ့နီၪ အီၪက့ၪထၬၥၭလၧကၠဲၬအီၪဂီၩ့ ဆၧမၩလဖၪနီၪ မၩဝ့ၫဒၪအဂ့ၩထုၬနီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၦဆံၫ့ဎံၪ ဇံတၩအဂဲး ယဆၧရၩလၩ့ယီၩ ယကအီၪထုၬခွံၬထၨၪယီၩနီၪလီၫႉ လၧခဲၫ့အီၪထးကဆၫ့နီၪ ယကရၩလၩ့န့အ့ၪဘၪနၥံၪကိၭ လၧခဲၫ့မုအနွံၫကိၭနီၪလီၫႉ ထၧၫ့ဖုဝဲထံၩၥိၭထီးအလူၬႇ မွဲကဆါယွၩ အဆၧဆိၪဂ့ၩဆိၪဘွၩ လၩ့ယွၩဝ့ၫဒၪလၧ နၥံၪအဖၫ့ခိၪ ကိၭဂၩဒ့ၭလါဆံၭႉ