မံၭထၭမုၪ လူၫစံၫယၫအဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪမုၪခွါလၧအအီၪအနိၪ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪနီၪ မွဲဝ့ၫဒၪ မံၭထၭမုၪ လူၫစံၫယၫအဂဲးအကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ မံၭထၭမုၪ လူၫစံၫယၫနီၪ မွဲဝ့ၫဒၪ ၦလၧအဒၪဘၪ ဖၫတံၫမၫ မိမိမၫရံၫ ၦအယိၥိၪ ၥၧၫ့ဂၩဖၧၩ့ လဂၩနီၪလီၫႉ အနီနံၫဂၩနီၪ မွဲဝ့ၫဒၪ ဖရၫ့စ့ၭစကိၫဒဲ ဂၠၫစ့ၩ့တၫနီၪလီၫႉ အဝ့ၫအၥိၭနံၫဂၩနီၪ မွဲဝ့ၫဒၪ ထၧၫ့ဖုဝဲၥံၪနီၪလီၫႉ ထၧၫ့ဖုဝဲနံၫဂၩယီၩ လၧနံၪ့ ၂၀၁၇နံၪ့နီၪ ဘၪထိးရွံထၪ့ၥၭလၧ ၦဆံၫ့ဎံၪနီၪလီၫႉ ၦရွံ့ထၪ့လၧ ၦဆံၫ့ဎံၪန့ဝ့ၫဒၪနီၪ ဖိၪၥၪခွါဖိၪ အီၪဝ့ၫဒၪလၧ ခးဘရၫဇံၩလဂၩနီၪ လၩ့ထ့ၬလၧဆၧအထီၫ အီၪဝ့ၫဒၪ ဎူၫမံၫတၫ အထီၫဂီၩ့ ၥၭနၪ့ဆၧနီၪလီၫႉ ဖိၪၥၪခွါယီၩ ကနၪ့ထၪ့ထဲၩ့ၥၭအဂး ဆၧယိလါလအီၪလၧၫ့ဘၪအကၠီၩ့ ၦၡၩၥံၪ ထုၭဖျ့ၭထၬအစူၪနီၪလီၫႉ မွဲဆၧနီၪ အၪ့က့ၩအၪ့ယၫဝ့ၫလၧ ၦလၧဒၪဘၪ ဖၫတံၫမၫ မိမိမၫရံၫ ၦအယိၥိၪဖိၪ အဆၧအၪ့က့ၩဘၩဆိၪဖၪနီၪလီၫႉ အဝ့ၫၥံၪအဆၧအၪ့က့ၩဘၩဆိၪဖၪဆၧအကၠီၩ့ ဖိၪၥၪခွၫနီၪ နၪ့ထၪ့ထဲၩ့အၥၭလၧခီၫ့နီၪလီၫႉ

ၦအယိၥိၪ ထၧၫ့ဖုဝဲနံၫဂၩယီၩ ဒၪဘၪမိမိမၫရံၫဂီၩ့ လယံၭလမီးဘၪ ၥံၪဖီၩ့ခွံၬဝ့ၫဒၪနီၪလီၫႉ ၦအယိၥိၪၥၧၫ့ဂၩဖၧၩ့ လူၫစံၫယၫယီၩ မွဲဝ့ၫ အၥၭအဎိၩထုၬလဂၩနီၪလီၫႉ အဝ့ၫယီၩ လၧခဲၫ့နီၪ အၪ့န့ထၪ့ မံၭထၭမုၪ အဆၧကဲၪဂီၩ့ ၥံၪဖီၩ့ခွံၬဝ့ၫဒၪလၧ နံၪ့ ၂၀၀၅နံၪ့ႇ ခးပီၫတူၫဂံၫႇ Coimbraအိၩနီၪလီၫႉ မံၭထၭမုၪ လူၫစံၫယၫယီၩ ဘၪထွ့ၪလၧ ဆၧရွံ့ထၪ့ ၦဆံၫ့ဎံၪလဂၩအဂး ကကဲၪဘၪ ၦဆံၫ့ဎံၪအကၠီၩ့ အဆၫ့အီၪဝ့ၫဒၪ လံဆၫ့အဖၧၩ့ ဖျီၫ့ဝ့ၫဒၪ နံၫဆၫ့ယူၬနီၪလီၫႉ

ၦအယိၥိၪ ၥၧၫ့ဂၩယီၩ နံၪ့ ၁၉၁၇နံၪ့ႇ လၧဝံးဖၫတံၫမၫ ဒၪဘၪမိမိမၫရံၫအခံၫ့ဒၪအိၩ လူၫစံၫယၫနီၪ အၥၭအီၪ ဆံၫနံၪ့ႇ ဖရၫ့စ့ၭစကိၫနီၪ အၥၭအီၪ ခွံၫနံၪ့ဒဲ ဂၠၫစ့ၩ့တၫနီၪ အၥၭအီၪဝ့ၫဒၪ နွ့ၫနံၪ့ဒ့ၭနီၪလီၫႉ မိမိမၫရံၫယီၩ အဝ့ၫၥံၪ ဒၪဘၪဝ့ၫနီၪ အီၪဝ့ၫဒၪ ဎူၫဘျၩ့ယူၬနီၪလီၫႉ ဘဲၫနီၪၥိၭဒၪဘၪဝ့ၫအခံၫ့ မိမိမၫရံၫ လီၩဝ့ၫဒၪအဝ့ၫၥံၪနီၪ ကဘၪဝံဖဲၫဆံၫ့ဎံၪအကၠီၩ့နီၪလီၫႉ ကဘၪအၪ့က့ၩဘၩဆိၪဖၪအ့ၪဝ့ၫ ခးရၭၡၩအဂးဒဲ ဂၪ့ခိၪထၧၫ့ဘံၪ့ယၫ ဆၧဎူၫဆၧဎၩ့ကအီၪအဂး မိမိမၫရံၫ လီၩဖျီၪ့ထၪ့အ့ၪအဝ့ၫၥံၪအၥိၭၥၧၫ့ဂၩနီၪလီၫႉ ဆၧၥၭထိၬအပရၧၫ့အနီ လိၪဝ့ၫဒၪခံၫ့ခၫဘဲၫယီၩအထီဒံၭနီၪလီၫႉ

ၦဆံၫ့ဎံၪ လူၫစံၫယၫယီၩ ကဘၪထိးရွံ့ထၪ့ၥၭလၧ ၦဆံၫ့ဎံၪအဂး ဆၧရွံ့ထၪ့အဆၧမၩ ကစႇထၪ့ဝ့ၫအဂး ၥၫ့ဎွၩ ဘန့ၫဒ့ၭ (၁၆) နီၪ မံၭထၭမုၪ ၥံၪဖီၩ့ခွံၬဂီၩ့ ကၫနွ့ၫ အဆၧၥီၪ့ဆၧၥၫ့အီၪၥိၭ ခိၬယိဝ့ၫ ယဲနံၪ့နီၪလီၫႉ ဘဲၫယီၩအခံၫ့နီၪ ၦဆံၫ့ဎံၪ လူၫစံၫယၫယီၩ ကကဲၪဘၪ ၦဆံၫ့ဎံၪအဂး အဆၫ့အီၪဝ့ၫဒၪ လံဆၫ့အဖၧၩ့ ထီၩ့ဝ့ၫဒၪလၧ အဆၫ့နံၫဆၫ့ယူၬနီၪလီၫႉ ကထီၩ့ဝ့ၫဒၪလၧ Blessed အဆၫ့အဂး အဝ့ၫဒၪ အဆၧအၪ့က့ၩဘၩဆိၪဖၪဆၧအဖၧၩ့ ၦၡၩမၩလန့ဘၪႇ ကၠဲၬမၩန့ဝ့ၫဒၪၥိၭ အဝ့ၫဒၪ အဆၧဘၩဆိၪဖၪအကၠီၩ့ ဆၧစီၩ့ဆၧမၩ့ ကကဲၪထၪ့ဝ့ၫဒၪအဂး ပအၪ့က့ၩဘၩဆိၪဖၪဆၧလၧ အဝ့ၫဒၪအအီၪန့ဝ့ၫဒၪအကၠီၩ့ မံၭထၭမုၪ လူၫစံၫယၫအဂဲး ယရၩန့အ့ၪဘၪနၥံၪ ထၨၪယီၩနီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ ကဆါယွၩ အဆၧဆိၪဂ့ၩဆိၪဘွၩ လၩ့ယွၩဝ့ၫဒၪလၧ နၥံၪကိၭဂၩဒ့ၭ အဖၫ့ခိၪလါဆံၭႉ