ၡၩခံးဂးဆၧဖံၭထံၩဖံၭၥိၭအဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ၡၩခံးဂးဆၧဖံၭထံၩဖံၭၥိၭအဂဲး အကၠီၩ့နီၪလီၫႉ အဲၪကွံၩဘၪထၧၫ့ဖုဝဲ ထံၩၥိၭထီးအလူၬၥံၪဧ့ႇ လၧလံၬဆံၫ့ဎံၪဖၧၩ့ စံၭထၬဝ့ၫနီၪ ၦလၧဒၪန့ ထံၩၥိၭလဂၩနီၪ လၩ့ဂၩဝ့ၫဒၪလၧ ၦဒၪန့ဘၪ ဆၧလူဒိၪဎွ့ၩဒိၪနီၪလီၫႉ ၥၫ့ဎွၩဖရၫ့စ့ၭ ကိၭဖံၭၥိၭထၬပၧၩလၧ မုလနံၩယီၩ ပကဘၪၥုၪ့ထၪ့ ၡၩခံးဂး ဆၧဖံၭထံၩဖံၭၥိၭအကၠီၩ့ႇ ဆၧမၩယီၩပမၩကန့အဂး ပအဲၪဒၪန့ၩ ပထံၩပၥိၭ ဆၧမၩနီၪ ပကဘၪ ခၪ့ဂၬခွံၬနီၪလီၫႉ ပဝ့ၫၥံၪယီၩ ၦလၧအီၪလၧ လးကျဲၩ အခံၫထိၬနၫႇ ၦအၡၪ့ယၬထုၬႇ ၦဘၪထံၭဘၪနဲၪ့ အယီၫထုၬ ၦၡၩလဖၪနီၪ ပကဘၪဒၪဆၧၫ့ယၫလၧ ဆၧမၩၥၫ့ထၪ့ဆၧအဆၧမၩအဂး လိၪဝ့ၫဒၪနီၪလီၫႉ မၩဘၪထံၭဘၪနဲၪ့ ၦၡၩၥံၪဂီၩ့ အခံအလဲၫ လအီၪဘၪ ဆၧချဲၩ့လဖၪ ချဲၩ့ဝ့ၫဂီၩ့ မၩပျၩ့ထၪ့ဆၧ ဆၧလမံၩ့မၬအ့ၬ လၧအဝ့ၫၥံၪ အဂဲးအဘၭအီၪၥိၭ ဒၨၭလၩ့ထၬၦၡၩၥံၪ ဘဲၫၥိၭၡၩခမျးထံၫခးအၥီၫ့လဖၪၥံၪနီၪ ပကြၨၭအီၪလၧ အဝ့ၫၥံၪဘုၭဘုၭထံၭထံၭအ့ၬနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧမၩလၧအမၩဂၭဂီၩ့ဂၭစၪဆၧဂီၩ့ လခဲၫထုၬကကၠၪ ကအီၪထးဒၪန့ၩ ဆၧဘၪထံၭလိၬၥၭႇ ဆၧမ့ၬလဲၩအဆၧမၩနီၪ ပကဘၪဂၬဎ့ၭဝ့ၫဒၪနီၪလီၫႉ ဆၧမၩအနီၪ ပကဘၪမၩအဂး ကၪဂဲၩဝ့ၫဒၪနီၪလီၫႉ လၩ့ဆၫ့ဒၪဆၧ လၧထီးမုကနံၩယီၩ ခးၥဲၫဖၧၩ့ ခရၧၫ့လဖၪဒဲ ဆၧဆုးကျိၭလးဖၧၩ့ လဂၩဒဲလဂၩ အီၪက့ၪထၬၥၭ ဘဲၫၥိၭဒုၪဒၩၥိၭဂီၩ့ ဆၧအနၧၩကန့အဂး လဂၩဒဲလဂၩ ပြၧၩ့လိၬၥၭနီၪလီၫႉ မွဲဆၧနီၪ ဆၧကၩ့ကၩဎိၭလၩ့ အဆၧမၩယီၩ ဆၧကဲၪထၪ့မုလနံၩအဂဲးလဖၪနီၪ ပဒၪထၪ့လၧ ဆၧဖျီၩ့အၥၫ့ကန့အဂး မွဲဝ့ၫဒၪအကၠီၪ့အဖျီၩ့လမံၩ့နီၪလီၫႉ ဘဲၫနီၪမၬ ပဘၪဒၪဆၧၫ့ယၫ ဆၧအၪ့ထၩလဖၪၥံၪယီၩ ၦၡၩၥံၪ ဆၧအခိးအတၩကန့အဂးၥိၭ ပကမၩကဲၪထၪ့အဂး လၧဆၧၥုၪ့ဆီၪ့ၥၭဆီၪ့ဖၧၩ့ ပအီၪၥၭမၧၫ့ကန့ဝ့ၫဒၪနီၪလီၫႉ

ထၧၫ့ဖုဝဲထံၩၥိၭထီးအလူၬၥံၪဧ့ႇ ၡၩခံးဂးအဆၧမၩႇ ခီၫ့ၡၩဂးအဆၧမၩဒဲ ထံၫဂဲးခးဂဲး ဆၧထၫ့ဒၩအထၧးအလၧးလဖၪနီၪ လၧဆၧၥုၪ့ဒုၩၥၭဒုၩႇ ၥုၪ့ဆီၪ့ၥၭဆီၪ့ႇ ၥုၪ့ထံၭၥၭထံၭဖၧၩ့ ပကဘၪမၩကဲၪထၪ့ ဆၧကၩ့ကၩဎိၭလၩ့ အကၠီၪ့အဖျီၩ့နီၪလီၫႉ ပခွၫဒဲပမုၪၥံၪ လဂၩဒဲလဂၩ ဆၧမၩဆၧၩ့လိၬၥၭ အဆၧမၩဖၧၩ့ ကအီၪကိၭကၠၪဒ့ၭဂီၩ့ ဆၧဘၪထံၭလိၬၥၭႇ ဆၧမ့ၬလဲၩဆၧဒဲ ဆၧဒုၭဆၧယၩၥံၪ ကလၩ့မၬခွံၬအဂး ပကအၪ့က့ၩဆိၪဖၪဆၧလါဆံၭႉ အဲၪကွံၩဘၪထၧၫ့ဖုဝဲထံၭၥိၭထီးအလူၬ မွဲနၥံၪအဆၧၥၭမၧၫ့ဖၧၩ့ နၥံၪအီၪၥၭမၧၫ့ၥ့ၪဝ့ၫဒၪ ဘဲၫၥၫ့ဎွၩဖရၫ့စ့ၭ အဆၧလီၩၥိၭလါဆံၭႉ