ဆၧဎူၫဆၧဎၩ့ကန့အဂး ပကဘၪဒိၭနဲၩ့ၥၭလၧ မိနးမၫရံၫအဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ဆၧဎူၫဆၧဎၩ့ကန့အဂး ပကဘၪဒိၭနဲၩ့ၥၭလၧ မိနးမၫရံၫအဂဲး အကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭ ထီးအလူၬၥံၪဧ့ႇ ၥၫ့ဎွၩဖရၫ့စ့ၭ အဆၧဆၪ့ထွ့ၫ အီၪဝ့ၫဒၪ ကမံၩ့နီၪ ပဝ့ၫၥံၪထီးအလူၬ ပကဘၪအီၪတဲၩ့ဝဲၩလၩ့ပၥၭဂီၩ့ ဆၧလၧဆၧဒုၭဆၧယၩအကၠီၩ့ ဆၧရၧးစၧးႇ ဆၧမၩနၧၩ့မၩစၪဆၧလဖၪနီၪ ၦအဘၪထိးလဖၪၥံၪ အၥၭခံဖၧၩ့ ဆၧယၫ့ၥၭမၩဆၧၩ့ ကဒိၭန့ဝ့ၫဒၪအဂး လၧကဆါဎြံၬအမိ မိနးမၫရံၫအီၪ ပကဘၪအၪ့က့ၩဘၩဆိၪဖၪဆၧအဂး ၥၫ့ဎွၩဖရၫ့စ့ၭ အဆၧလီၩ့ဖျီၪ့ထၪ့ အီၪဝ့ၫဒၪနီၪလီၫႉ မိနးမၫရံၫ ဆၧဒဲၩဘၭဖီၩ့ဖျ့ၭ ၥုၪ့ၥၭဖၧၩ့ ပလုထၪ့ထၬဆၧတၭ လၧဂၪ့ခိၪချိၫ့ဖၧၩ့ ဆၧဎူၫဆၧဎၩ့ ကဂုထၪ့အၪထၪ့အဂး ၥၫ့ဎွၩဖရၫ့စ့ၭ အၪ့က့ၩဘၩဆိၪဖၪထၬ အီၪဝ့ၫဒၪ ဘဲၫယီၩၥိၭနီၪလီၫႉ
အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ကဆါဎြံၬအမိ မိနးမၫရံၫနီၪ အနၫ့ဆါဒၪအဝ့ၫ လၧဂၪ့ခိၪချိၫ့ဖၧၩ့ ပၧၩ့ထၬဘၪဆၧ ကဆိၭကလး စဎွၩအအၧၩ့ၥံၪ အဆၧပၧၩ့ဖၧၩ့ ဘၪထိးဆၧနိၫ့ဆၧနၬႇ ဆၧအၧၩ့အဆၧဒိၭလၩ့လဖၪဂီၩ့တၭ အဖိၪခွၫကဆါဎြံၬဖိၪ အၪ့ဝံၩအၪ့ဝၬဝ့ၫဂီၩ့ ဘၪစဲၪ့ဖျိၬထၪ့လၧ မုခံၭၥၫ့နၩနီၪလီၫႉ မိနးမၫရံၫနီၪ ဆၧဎူၫဆၧဎၩ့ လအီၪဘၪ ပဝ့ၫၥံၪထီးအလူၬ ဆၧအထၧးအလၧးလဖၪနီၪ နၪ့ၥ့ၪဝ့ၫဒၪနီၪလီၫႉ မွဲဆၧနီၪ လၧပခး ခးပယၩ့ဖၧၩ့ အလိၪဝ့ၫဒၪ ဆၧဎူၫဆၧဎၩ့ဒဲ ဆၧဘၪလိၬဎွ့ၪဎီၩ့ ကန့ထၪ့ ဖျဲၪဖျဲၪအဂး ပကအၪ့က့ၩဘၩဆိၪဖၪကၠၬဆၧလၧ ဆၧဒဲၩဘၭဖီၩ့ဖျ့ၭ ဆၧဒၧၩ့ထၪ့ မိနးမၫရံၫအအီၪလါဆံၭႉ မိမိနးမၫရံၫ အဆၧအၪ့က့ၩဘၩ ဆိၪဖၪဆၧအဖၧၩ့ ဆၧဎူၫဆၧဎၩ့ မွဲကဂုထၪ့အၪထၪ့အကၠီၩ့ ပကကျ့ၭစၨၭ အၪ့က့ၩဘၩဆိၪဖၪကၠၬဆၧလါဆံၭႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ မွဲနၥံၪအဆၧၥၭမၧၫ့ ကိၭနံၩဒ့ၭအဖၧၩ့ မွဲနၥံၪဒိၭနဲၩ့ၥၭလၧ ကဆါဎြံၬအီၪ န့ဝ့ၫဒၪႇ နၧၩ့ဝ့ၫဒၪ ကိၭဒံၭကိၭဂၩလါဆံၭႉ