ပလကြၨၭမၩဘၪလၧ ဖိၪၥၪၥံၪအမ့ၬယၫ ဆၧလဖၪအဂဲး

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ပလကြၨၭမၩဘၪလၧ ဖိၪၥၪၥံၪအမ့ၬယၫ ဆၧလဖၪအဂဲးအကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၥၫ့ဎွၩဖရၫ့စ့ၭ အဆၧဆၪ့ထွ့ၫ အီၪဝ့ၫဒၪနီၪ အရ့ၩဒိၪထုၬ ပဆၧၥၭမၧၫ့ ဆၧဆူနဲၩထၬဒဲ ပဆၧဆူနဲၩနီၪ ပကဘၪအၪ့နၩ့ႇ ဆိၬန့လဆၫ့ဘၪလဆၫ့နီၪလီၫႉ လၧဂံၪ့ဒီၪ့ကဖျိၪ့ဖၧၩ့ ဖိၪၥၪၥံၪနီၪ ယိထၪ့ မိဖအဆၧအဲၪႇ ယိထၪ့ ဂံၪ့ဒီၪ့အဆၧဎူၫဆၧဎၩ့နီၪလီၫႉ လၧဆၧနီၪၥံၪအဖၧၩ့ ဒၪထၪ့ဘၪ ကဆါဎြံၬနီၪလီၫႉ မွဲဆၧနီၪ မိဖလဖၪ လၧဖိၪၥၪၥံၪအမ့ၬယၫ ဆၧချဲၩ့အၪႇ ဘၪထံၭလိၬၥၭ အဆၧမၩ လကြၨၭမၩဘၪဝ့ၫနီၪလီၫႉ လါနၫ့ ထၧၫ့မၫ ထၧၫ့ဝၩႇ ဂံၪ့ဒီၪ့ဖိၪၥံၪ လဂၩဒဲလဂၩ ဆၧချဲၩ့အၪႇ ဘၪလိၬဎွ့ၪဎီၩ့ လအီၪဘၪနီၪ ကဲၪၥ့ၪဝ့ၫဒၪနီၪလီၫႉ ဆၧမၩအယီၩ လၧဂံၪ့ဒီၪ့ဖိၪၥံၪ အဆၧၥၭမၧၫ့ မုကိၭနံၩဖၧၩ့ လ့ၩၥၪဘၪဘၪနီၪလီၫႉ ဂံၪ့ဒီၪ့ဖိၪၥံၪ အဆၧၥၭမၧၫ့ဖၧၩ့ ဆၧချဲၩ့အၪႇ တ့ၭလိၬၥၭ အီၪနးကၠၪအ့ၬစွါဘဲၫ ဆၧမၩအယီၩ မွဲဝ့ၫဒၪ ဆၧမၩအလၩ့မဲၩနီၪလီၫႉ မွဲဆၧနီၪ ဂံၪ့ဒီၪ့ဖိၪၥံၪ လဂၩဒဲလဂၩ ဆၧချဲၩ့အၪႇ တ့ၭလိၬၥၭ အဆၧမၩ မၩန့ဝ့ၫဒၪနီၪလီၫႉ လါနၫ့ လကြၨၭမၩဘၪဝ့ၫလၧ ဖိၪၥံၩဖိၪၥၪ အမ့ၬခိၪမ့ၬယၫနီၪလီၫႉ မိဖ ဆၧချဲၩ့အၪ ဒၪထၪ့ဘၪဝ့ၫ ဖိၪၥၪလဂၩ အဝ့ၫအၥၭခံဖၧၩ့ ၥုၪ့အုၭၥၭလၩ့ ကဲၪထၪ့ဝ့ၫ ဘဲၫၥ့ၪလဲၪ လပၩမၬ လၥ့ၪယၫဘၪနီၪလီၫႉ ဆၧလဖၪၥံၪယီၩ ပဆၧဆူနဲၩ ပအၪ့နၩ့ဆိၬန့ လဆၫ့ဘၪလဆၫ့ ကန့ဝ့ၫဒၪအကၠီၩ့ ဆၧမၩဆၧၩ့ကန့အဂး မွဲဝ့ၫဒၪ ဆၧဖ့ၪကိၪလဒုၩအကၠီၩ့ ၥၫ့ဎွၩဖရၫ့စ့ၭ အဆၧဆၪ့ထွ့ၫ အီၪဝ့ၫဒၪ ဘဲၫယီၩၥိၭနီၪလီၫႉ

မွဲဆၧနီၪ အဲၪကွံၩဘၪ ထၧၫ့ဖုဝဲထံၩၥိၭထီးအလူၬၥံၪဧ့ႇ ဘဲၫၥၫ့ဎွၩဖရၫ့စ့ၭ ဆၪ့ထွ့ၫထၬၥိၭ လၧဖိၪၥံၩဖိၪၥၪ အမ့ၬယၫ ဆၧချဲၩ့အၪႇ ဆၧဘၪထံၭလိၬၥၭ အဆၧမၩ ထၨၪဖိၪၥၪၥံၪ လဒၪထၪ့ဘၪဝ့ၫအဂး ပကကျ့ၭစၨၭကၠၭလါဆံၭႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ နၥံၪအဆၧဆူနဲၩနီၪ လၧနၥံၪအဖိၪအဒံၪႇ ဂံၪ့ဒီၪ့အဖၫ့ခိၪ အဂ့ၩထုၬ နၥံၪအၪ့နၩ့ ဖ့ၪအ့ၪလဆၫ့ဘၪလဆၫ့ န့ဝ့ၫဒၪ ကိၭဒံၩကိၭဂၩလါဆံၭႉ