ပကဘၪၥုၪ့ထၪ့ ဆၧၥုၪ့ဆၧၩ့ၥၭဆၧၩ့ ပၩရမံၫအဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ပကဘၪၥုၪ့ထၪ့ ဆၧၥုၪ့ဆၧၩ့ၥၭဆၧၩ့ ပၩရမံၫအဂဲးအကၠီၩ့နီၪလီၫႉ အဲၪကွံၩဘၪ ထၧၫ့ဖုဝဲထံၩၥိၭထီးအလူၬၥံၪဧ့ႇ လၧဂၪ့ခိၪချိၫ့ဖၧၩ့ ပဂဲၫကဲၪထၪ့ ၦၡၩလဂၩယူၭစွါဘဲၫ ပၥၭထၪ့ထီၫအကၠီၩ့ ဆၧဂၭဂီၩ့ဂၭစၪ အီၪဝ့ၫဒၪ အၪအၪလ့ၬနီၪလီၫႉ ပပၨၩ့ဆုၭထၬပၥၭ လန့ဘၪစွါဘဲၫ အၡါမၩ အရ့ၩဒိၪနီၪ မွဲထၨၪထၨၪမံၩ့လဲၪနီၪ ပအၪ့ဎၬ လန့လၧၩ့ဘၪနီၪလီၫႉ လၧပထၧၫ့ဖုထၧၫ့ဝဲႇ ပထံၩပၥိၭၥံၪဒဲပၧၩ ပအီၪဆုးကျိၭလိၬၥၭအဂးနးဆ့ ကဲၪထၪ့ဝ့ၫလၥ့ၪလၧၩ့ဘၪနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧၥုၪ့ဆၧၩ့ၥၭဆၧၩ့နီၪ မၩနၧၩဆၧအမံၩ့အၪအၪလ့ၬ န့ဝ့ၫဒၪနီၪလီၫႉ ဆၧၥုၪ့ဆၧၩ့ၥၭဆၧၩ့ အစီၩ့အမၩ့နီၪ မၩနၧၩ ပၥုၪ့ပၥၭ နၧၩ့ဝ့ၫဒၪနီၪလီၫႉ ပအီၪၥၭမၧၫ့လၧ ဆၧၥုၪ့ဆၧၩ့ၥၭဆၧၩ့ဖၧၩ့အကၠီၩ့ ပဒိၭန့ ဆၧအခိးအတၩ အၪအၪလ့ၬဂီၩ့ ပန့ထၪ့ဘၪ ထံၩၥိၭ အဂ့ၩဘၪဂ့ၩစဲၩၥံၪနီၪလီၫႉ ဘၪမနီၪလဲၪစွါဘဲၫ ၦၡၩၥံၪ အၪဒၪဆၧနီၪ အၥၭထၪ့ႇ အၥၭထီၫဂီၩ့ကကၠၪ အၥၭဂဲၫၡူၪလၩ့ထဲၩ့ဝ့ၫဒၪနီၪလီၫႉ ထီးနီၪ အၪဎၬလၩ့ထဲၩ့အၥၭလၧ အခၪ့ထံၭခၪ့ဎၧၩ့ ထံၫထံၫဆၬဆၬဂီၩ့ လၧအဆၧၥၭမၧၫ့ဖၧၩ့ လီၩမၩဖိၬထွ့ၫ ဆၧၥုၪ့ဆၧၩ့ၥၭဆၧၩ့ ပၩရမံၫန့ဝ့ၫဒၪနီၪလီၫႉ မွဲဆၧနီၪ ပဝ့ၫၥံၪနးဆ့ ဘဲၫၥိၭဆၧမၩအနီၪၥိၭ ပမၩန့ဝ့ၫဒၪအကၠီၩ့ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အီၪဝ့ၫဒၪ ဘဲၫနီၪၥိၭနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဘဲၫၥၫ့ဎွၩဖရၫ့စ့ၭ ၥီၪ့ၥၫ့ထၬၥိၭ ပၥၭထၪ့ႇ ပၥၭထီၫအခံၫ့ ပကဘၪအီၪလၧ ဆၧထုၪ့ၥုၪ့ထုၪ့ၥၭဖၧၩ့နီၪလီၫႉ ပကအၪ့န့ထၪ့ ဆၧဒီၩ့ဆၧထ့ၬလၧ ၦလၧအပၨၩ့ဆုၭထၬအၥၭ န့ဝ့ၫဒၪ ၦဆံၫ့ဎံၪၥံၪ အၥုၪ့ဆၧၩ့ၥၭဆၧၩ့လဖၪနီၪလါဆံၭႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ ၥုၪ့ထၪ့ဆၧၥုၪ့ဆၧၩ့ၥၭဆၧၩ့လါဆံၭႉ