ပကဘၪအၪ့န့ထၪ့ ဆၧဒီၩ့ဆၧထ့ၬလၧ မိနးမၫရံၫ အၥၭဆံၫ့ဎံၪထုၬအဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ပကဘၪအၪ့န့ထၪ့ ဆၧဒီၩ့ဆၧထ့ၬလၧ မိနးမၫရံၫ အၥၭဆံၫ့ဎံၪထုၬအဂဲး အကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ မိမိမၫရံၫအၥၭဆံၫ့ဎံၪထုၬနီၪ လၩ့ဂၩဝ့ၫဒၪလၧ မိၬရၫ (ပုလဲ)ႇ မိၬရၫ အလၩ့ယူၭလၩ့ယၪ့ လဖျိၪ့နီၪလီၫႉ မိမိမၫရံၫယီၩ ကဆါဎြံၬ အဆၧလၩ့ဆၫ့လၩ့မဲၩလဖၪ ထီးန့ထၬဝ့ၫလၧ အၥၭခံဖၧၩ့နီၪလီၫႉ ကဆါယွၩ အလိၪလဖၪနီၪ လၧဆၧၥုၪ့ဆၧၩ့ၥၭဆၧၩ့ဖၧၩ့ ထိးဆၧၫ့ဒိၭန့ဝ့ၫ မွဲဝ့ၫဒၪ ၦအဂ့ၩအဘွၩဖိၪလဂၩနီၪအကၠီၩ့ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အီၪဝ့ၫဒၪ ဘဲၫယီၩၥိၭနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧလၧဆၧဆူနဲၩနီၪ မွဲဝ့ၫလၧ ပလၥ့ၪယၫဘၪႇ ပလဒၪထၪ့ဘၪ ဆၧလမံၩ့နီၪ ပထိးဆၧၫ့ဒိၭန့လၧ ဆၧၥုၪ့ဆၧၩ့ၥၭဆၧၩ့ဖၧၩ့ မွဲဝ့ၫဒၪအကၠီၩ့ မိနးမၫရံၫ ထီးနဲၪ့ထၬဝ့ၫလၧ အၥၭခံဖၧၩ့နီၪလီၫႉ မွဲဆၧနီၪ ပဝ့ၫၥံၪလၧ ပဆၧၥၭမၧၫ့ဖၧၩ့နးဆ့ မုကိၭနံၩ ပဘၪဒၪဆၧၫ့ယၫ ဆၧၡၪ့ဆၧနၭႇ ဆၧတတုၬတနၭဒဲ ဆၧအထၧးအလၧးလၧ ပနၪလၥ့ၪဘၪၥံၪအဂး ကၪဂဲၩဝ့ၫဒၪလဖၪ ဘဲၫမိနးမၫရံၫၥိၭ လၧဆၧဆူနဲၩဎိၩဒိၪဖၧၩ့ ပကကျ့ၭစၨၭ အီၪၥၭမၧၫ့ကၠၭလါဆံၭႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ မွဲနၥံၪအၪ့န့ထၪ့ ဆၧဒီၩ့ဆၧထ့ၬလၧ မိနးမၫရံၫအီၪ န့ဝ့ၫဒၪ ကိၭဒံၩကိၭဂၩလါဆံၭႉ