ပကဘၪအၪ့က့ၩဘၩဆိၪဖၪအ့ၪ ၦဂူၫဂၩၥံၪအဂးအဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ပကဘၪအၪ့က့ၩဘၩဆိၪဖၪအ့ၪ ၦဂူၫဂၩၥံၪအဂးအဂဲးအကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၦဂူၫဂၩၥံၪအဂး ပအၪ့က့ၩဘၩဆိၪဖၪဆၧနီၪ ဂ့ၩဘၪဂ့ၩစဲၩ အၪမၬလ့ၬနီၪလီၫႉ ပဝ့ၫၥံၪထီးအလူၬယီၩ ဆၧအၪ့က့ၩဘၩဆိၪဖၪဆၧ လအီၪဘၪအဖၧၩ့ ပလကြၨၭ အီၪၥၭမၧၫ့ဘၪနီၪလီၫႉ ဘဲၫအရ့ၩဒိၪထုၬ ဆၧကၪဆၧဂဲၩ လအီၪဘၪလၧ ပအအီၪၥိၭ ပအီၪလန့ဘၪနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၦအလိၪဆၧမၩဆၧၩ့လဖၪၥံၪအဂး ပကဘၪ အၪ့က့ၩဘၩဆိၪအ့ၪလၧ ဖါကဆါယွၩ အအီၪနီၪလီၫႉ ၦလၧဆၧဆူနဲၩလအီၪဒံၭဘၪလၧ ကဆါဎြံၬအဖၫ့ခိၪဒဲ ၦဂူၫဂၩၥံၪအဂးနးဆ့ ပကဘၪအၪ့က့ၩဆိၪဖၪအ့ၪဝ့ၫဒၪနီၪလီၫႉ ဆၧအီၪကီၪ့ထၧၫ့ဘံၪ့ယၫ ကကၧၩ့ဖျိၪ့ၥၭ ကဖျိၪ့ဎးလၧၩ့အဂး ပကဘၪအၪ့က့ၩဘၩဆိၪဖၪအ့ၪနီၪလီၫႉ ဆၧအီၪကီၪ့နီၪ အၪ့က့ၩဘၩဆိၪဖၪဆၧ ကိၭကၠၪဒ့ၭအကၠီၩ့ ပၥၭနၫ့လန့ဘၪနီၪလီၫႉ မွဲဆၧနီၪ ပကကၧၩ့ဖျိၪ့ထၬပၥၭလၧ ဆၧဘၩဆိၪဖၪဆၧအဖၧၩ့လါဆံၭႉ ကဆါဎြံၬအဖိၪအဒံၪၥံၪဒဲ ၦအလိၪဆၧမၩဆၧၩ့လဖၪၥံၪအဂး ပကဘၪအၪ့က့ၩဘၩဆိၪဖၪဆၧ လိၪဝ့ၫဒၪအကၠီၩ့ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အီၪဝ့ၫဒၪဘဲၫယီၩၥိၭနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧလၧပအၪ့က့ၩဘၩဆိၪဖၪဆၧနီၪ မုကိၭနံၩဒ့ၭ ပမိၡါဂဲးဘၭ ကန့ဝ့ၫအဂး ဆၧအၪ့ဆၧအီၪလဖၪ ပအၪ့အီၩၥိၭ ပနးၥၭဂဲးဘၭ ကန့အဂးနးဆ့ ပကဘၪအၪ့က့ၩဘၩဆိၪဖၪဆၧ လိၪဝ့ၫဒၪနီၪလီၫႉ ဘဲၫခံၫ့ခၫဘိၩ့ယီၩ ပဘၪဒၪဆၧၫ့ယၫ ဆၧတတုၬတနၭဒဲ ဆၧလမီၪ့ဎီၩ့ထၨၪဎီၩ့ဘၪၥံၪအခံၫ့ ပကဘၪအၪ့က့ၩဘၩဆိၪဖၪဆၧ လိၪဝ့ၫဒၪ အၪအၪလ့ၬနီၪလီၫႉ မွဲဆၧနီၪ ဘဲၫၥၫ့ဎွၩဖရၫ့စ့ၭ ၥီၪ့ၥၫ့ထၬၥိၭ ပနၫ့ဆါဒၪပဂးမွဲဂ့ၩႇ ၦဂူၫဂၩၥံၪအဂးမွဲဂ့ၩ ပအၪ့က့ၩဘၩဆိၪဖၪဆၧ ကိၭကၠၪဒ့ၭအဖၧၩ့ လၧကဆါဎြံၬကၠၧၫ့ကၠၧၫ့ ပကခၪ့ဂၬခွံၬ ဆၧကိၭမံၩ့ကိၭဆံၩ့ဒ့ၭလါဆံၭႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ ကဆါယွၩအဆၧအဲၪဆၧကွံၩ လၩ့ယွၩဝ့ၫဒၪလၧ နၥံၪကိၭဂၩဒ့ၭအဖၫ့ခိၪလါဆံၭႉ