ပကဘၪအီၪၥၭမၧၫ့ ဘဲၫကဆါယွၩ အထံၩအဖျဲၥံၪၥိၭအဂး ၥၫ့ဎွၩဖရၫ့စ့ၭ အဆၧဆၪ့ထွ့ၫအဂဲး (၂)

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ပကဘၪအီၪၥၭမၧၫ့ ဘဲၫကဆါယွၩ အထံၩအဖျဲၥံၪၥိၭအဂး ၥၫ့ဎွၩဖရၫ့စ့ၭ အဆၧဆၪ့ထွ့ၫ (၂) အဂဲး အကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဘဲၫၥိၭမုကနံၩ ပအီၪထုၪ့ၥုၪ့ထုၪ့ၥၭလၩ့ထဲၩ့ပၥၭအဖၧၩ့ ပကဘၪယိဆၧၫ့ ၦလၧအဘၪထိးၥံၪၥၭလၧ ထုၪ့စူၪယၫအဖၫ့ခိၪ မွဲဝ့ၫဒၪ ကဆါဎြံၬနီၪတၭ ပကဘၪဆီၪ့မီၪ့လၧ ပၥၭခံဖၧၩ့အဂးႇ ကဆါဎြံၬအဆၧနိၫ့ဆၧနၭ အဆၧဘၪထံၭဘၪနဲၪ့ လဖၪနီၪ အီၪပဒၩ့ထၬ ပဝ့ၫၥံၪလၧ ဂၪ့ခိၪအဆၧၥၭမၧၫ့ဖၧၩ့ မုၪခီၩလဲးအဆၧအၪ့လွ့ၫအကၠီၩ့ ၥၫ့ဎွၩဖရၫ့စ့ၭ ၥီၪ့ၥၫ့ထၬ ပဝ့ၫၥံၪနီၪလီၫႉ ကဆါဎြံၬဘၪထိး ဆၧနိၫ့ဆၧနၭနီၪ ပအီၪက့ၪထၬလၧ ပၥၭခံဖၧၩ့အကၠီၩ့ မုၪခီၩလဲး အဆၧၥၭကဲၪ့အပယဲၫလဖၪ ပဒုၭဆၧၫ့ခွံၬ န့ဝ့ၫဒၪအဂး ဆၧထုၪ့ၥုၪ့ထုၪ့ၥၭဖၧၩ့ ပအီၪၥၭမၧၫ့ ၥ့ၪဝ့ၫဒၪနီၪလီၫႉ

ပအီၪထုၪ့ၥုၪ့ထုၪ့ၥၭထဲၩ့ ပၥုၪ့ပၥၭ အဆၧမၩနီၪ ပမၩနဲၪ့ထၬဘၪ ဘဲၫဘျိၪ့ဆံၭဘျိၪ့ဆၩ့ အဆၧမၩၥိၭအ့ၬအဂး ၥၫ့ဎွၩဖရၫ့စ့ၭ ဖ့ၪထုၪ့ထၬ ပဝ့ၫၥံၪနီၪလီၫႉ ပအီၪၥၭမၧၫ့ ဘျိၪ့ဘျိၪ့ဘျၩဘျၩအ့ၬဂီၩ့ ပကဘၪ အီၪၥၭမၧၫ့လၧ ဆၧအဲၪဆၧကွံၩဖၧၩ့ႇ ဆၧၥုၪ့ဆၧၩ့ၥၭဆၧၩ့ဖၧၩ့ ပကဘၪ ကျ့ၭစၨၭ တၡါၡါနီၪလီၫႉ ၦလၧဆၧဆီၪ့ဆၧချဲၫ့ လအီၪဘၪၥံၪအီၪ ပလ့ၩဖ့ၪဂဲးဖ့ၪဘၭဆၧအဖၧၩ့ႇ ပယၫ့ၥၭမၩဆၧၩ့ ၦအလိၪလဖၪၥံၪလၧ ဆၧအဲၪဆၧကွံၩအဆၧမၩဖၧၩ့အကၠီၩ့ ပကဘၪအီၪ ယဲၩ့ယဲၩ့ယိၬယိၬ လၧဂၪ့ခိၪဆၧအီၪက့ၪၥုၪ့အီၪက့ၪၥၭ လဖၪနီၪလီၫႉ ဘဲၫၥိၭ ၦအလိၪလဖၪၥံၪအဂး ပယၫ့ၥၭမၩဆၧၩ့ဆၧ ပၥုၪ့ပၥၭနီၪ ပဒုၭဆၧၫ့ မုၪခီၩလဲး အဆၧလုၬဘံၭ အဆၧမၩအဂး မွဲဝ့ၫဒၪ ၥံၪပဒၩ့ၥိၭ ဘၪဒိၭထဲး ကဆါဎြံၬ အဆၧၥီၪ့ဆၧၥၫ့ အဆၧမၩမွဲဝ့ၫဆ့နီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ မုကိၭနံၩဒ့ၭ ပၥုၪ့ပၥၭအီၪ ဘဲၫၥ့ၪလဲၪ ပအၪ့စၪ့လၩ့ထဲၩ့ အဆၧမၩဒဲ လၧဆၧအဲၪဆၧကွံၩဖၧၩ့ ပမၩဆၧၩ့ဆၧ အဆၧမၩဖၧၩ့ ပပၪဎုၬ ဂဲၩထၪ့ဝၭထၪ့အကၠီၩ့ ပဝ့ၫၥံၪယီၩ ပကဖီၩ့ဖျ့ၭဝ့ၫဒၪလၧ ပအဲၪဒၪန့ၫ ဂၪ့ခိၪအဆၧၥၭမၧၫ့ အဆၧအီၪအဖၧၩ့နီၪလီၫႉ ၦအဘၪထိးၥံၪအၥၭလၧ ထုၪ့စူၪယၫအဖၫ့ခိၪ ကဆါဎြံၬ အမိၡါနီၪ ပအီၪထုၪ့ၥုၪ့ထုၪ့ၥၭအကၠီၩ့ ဘဲၫဆၧၥၭထိၬအပရၧၫ့ၥိၭ ပလီၩ့မၩဖိၬထွ့ၫနၧၩ့ဝ့ၫဒၪ ဂဲးဘၭဆၧဒုၩၥၭဒဲ ဒုၭနဲၪဆၧၥီၪ့ဆၧၥၫ့လဖၪ ပကဒိၭန့ဝ့ၫဒၪနီၪလီၫႉ မုၪခီၩလဲး အဆၧအၪ့လွ့ၫလဖၪ ပအီၪထုၪ့ၥၭ ပဒုၭဆၧၫ့ဆၧအဖၧၩ့ မွဲပကကဲၪ ကဆါဎြံၬ အထံၩအဖျဲတီၩလီၩ့အဂး ပကဘၪကျ့ၭစၨၭဝ့ၫဒၪအကၠီၩ့ႇ လၧခးၥဲၫဖၧၩ့ ပကအီၪၥၭမၧၫ့ ဘဲၫကဆါယွၩ အဆၧအဲၪဆၧကွံၩ ပဒုၭနဲၪနၧၩ့ဝ့ၫဒၪ ဆၧဒီၩ့ဆၧထ့ၬအဂ့ၩဘၪၥိၭအဂး ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အီၪဝ့ၫဒၪ ဘဲၫယီၩၥိၭအဂဲး ယရၩလၩ့န့အ့ၪဘၪ နၥံၪလၧ ဆၧအဲၪဆၧကွံၩဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ လၧနၥံၪအဆၧၥၭမၧၫ့ဖၧၩ့ မုကိၭနံၩ နၥံၪဒုၭဆၧၫ့ခွံၬ မုၪခီၩလဲး အဆၧအၪ့လွ့ၫလဖၪ န့ဝ့ၫဒၪ ကိၭဒံၩကိၭဂၭလါဆံၭႉ