ပကဘၪအီၪၥၭမၧၫ့ ဘဲၫကဆါယွၩ အထံၩအဖျဲၥံၪၥိၭအဂး ၥၫ့ဎွၩဖရၫ့စ့ၭ အဆၧဆၪ့ထွ့ၫအဂဲး (၁)

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ပကဘၪအီၪၥၭမၧၫ့ ဘဲၫကဆါယွၩ အထံၩအဖျဲၥံၪၥိၭအဂး ၥၫ့ဎွၩဖရၫ့စ့ၭ အဆၧဆၪ့ထွ့ၫအဂဲး အကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ပဆၧၥၭမၧၫ့ မုကိၭနံၩဒ့ၭဖၧၩ့ ပဆၧမၩၥုၪ့မၩၥၭဆၧႇ ပဆၧဆီၪ့မီၪ့ဆီၪ့မၬဆၧ ဆၧလဖၪၥံၪနီၪ ပကအီၪထုၪ့ၥုၪ့ထုၪ့ၥၭ ပၥၭဂီၩ့ ပကဘၪအီၪၥၭမၧၫ့ ဘဲၫကဆါယွၩ အထံၩအဖျဲၥံၪၥိၭနီၪလီၫႉ ၦအဘၪထိးၥံၪၥၭလၧ ထုၪ့စူၪယၫအဖၫ့ခိၪ မွဲဝ့ၫဒၪ ကဆါဎြံၬနီၪ လၧပၥၭခံဖၧၩ့ ပကအီၪထုၪ့ၥုၪ့ထုၪ့ၥၭဂီၩ့ ပဆၧၥၭမၧၫ့ ပကအၪ့ဎၬလၩ့ထဲၩ့ ဆူၪဆူၪယိၬယိၬအဂး ၥၫ့ဎွၩဖရၫ့စ့ၭ အဆၧဆၪ့ထွ့ၫ အီၪဝ့ၫဒၪ ဘဲၫယီၩၥိၭနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧလၧမုၪခီၩလဲးနီၪ ကမၩဒုၪမၩဒၩဆၧအဂး အၪ့န့ဝ့ၫအခံၫ့ဂီၩ့ ကျ့ၭစၨၭဝ့ၫ ၥုၪ့ဆၧၩ့ၥၭဆၧၩ့အကၠီၩ့ႇ ဆၧလၧမုၪခီၩလဲးနီၪ ဂဲၫနူၬလၩ့လၧ ပဆၧၥၭမၧၫ့ဖၧၩ့ လၧဆၧလူဆၧချဲၩ့ ဆၧၫ့ဆၧၫ့ဖူၬဖူၬႇ လၧဆၧဆၧးဎံၫဆၧးလၩ ၥ့ၪဝ့ၫဒၪအကၠီၩ့ ပကဘၪ ထုၪ့ၥုၪ့ထုၪ့ၥၭအဂး ၥၫ့ဎွၩဖရၫ့စ့ၭ လီၩထၬဝ့ၫ အီၪဝ့ၫဒၪ ဘဲၫယီၩၥိၭနီၪလီၫႉ လၧလံၬဆံၫ့ဎံၪဖၧၩ့ နးၥၭၥံၪလၧ ဆၧဆံၫ့ဆၧဖျ့ၪ လအီၪဘၪၥံၪအဂဲး ပအီၪထုၪ့ၥုၪ့ထုၪ့ၥၭ ပၥၭတၭ ဆၧလဂ့ၩဆၧလဘၪဘၪ မုၪခီၩလဲးၥံၪနီၪ ပထုၪ့ၥုၪ့ထုၪ့ၥၭ လအီၪဘၪအခံၫ့ လၧပဆၧၥၭမၧၫ့ဖၧၩ့ အီၪဘုၭထၬအၥၭ ၥ့ၪဝ့ၫဒၪအကၠီၩ့ ဆၧဂ့ၩဆၧဘွၩ ဆၧတီၩဆၧလီၩ့အီၪ ပဆၧၥၭမၧၫ့ ဆၧလ့ၩဖၧၩ့ၥၭ ထၨၪဎဲၪဎီၩ့ၥၭအဂး မုၪခီၩလဲးလဖၪ မၩဒုၪမၩဒၩ ၥ့ၪဝ့ၫဒၪအကၠီၩ့ ၥၫ့ဎွၩဖရၫ့စ့ၭ ဖ့ၪထၬအ့ၪပဝ့ၫၥံၪ ဆၧထုၪ့ၥုၪ့ထုၪ့ၥၭနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧလၧမုၪခီၩလဲးနီၪ မၩအၥၭဘဲၫခွံၪၥိၭဂီၩ့ အ့ၪလဲၩထၪ့အလွ့ ဘဲၫနဲၩ့ဎီၩ့ဂီၩ့ အီၪဝ့ၫဒၪ မီၪ့ဎီၩ့တၭ အဝ့ၫဒၪ အဆၧအီၪၥုၪ့လၩ့ၥၭနီၪ ဆၧထုၪ့ၥုၪ့ထုၪ့ၥၭ လအီၪဘၪအဂး အီၪၥ့ၪဝ့ၫၥိၭ မုၪခီၩလဲးနးဆ့ အၪ့လဲၩထၪ့အၥၭ ဘဲၫနီၪၥိၭဂီၩ့ ဆၧဒဲၩဘၭ လၧကဆါယွၩ လအဲၪဒိၭဘၪ ဒဲ ဘဲၫဎွ့ၩဝ့ၫဒၪလၧ ဂၪ့ခိၪဆၧထူၭဆၧလၧၫ့ အဆၧၥၭမၧၫ့ၥိၭ အၪ့လွ့ၫပဝ့ၫၥံၪယီၩနီၪလီၫႉ မုၪခီၩလဲးနီၪ ဘဲၫဆၧမၩအနီၪၥံၪၥိၭ ပကမၩအဂး မၩနူၬကီၪ့ပဝ့ၫၥံၪအကၠီၩ့ လၧကဆါယွၩ အဖၫ့ခိၪ ပအီၪက့ၪထၬ ဆၧအဲၪၥုၪ့ၥၭႇ ဆၧဒိၭနဲၩ့ၥုၪ့ၥၭလဖၪ ဂဲၫလၩ့ဘျိၪ့ႇ လၩ့ယံၭလၩ့ဘဲၩ့တၭ လခဲၫထုၬကကၠၪ ပဖ့ၪဆိၫဒၪန့ၩ ဂၪ့ခိၪဆၧအဂဲးၥံၪႇ ဂၪ့ခိၪဆၧမုၬဆၧလၩၥံၪနီၪလီၫႉ ဆၧအၪ့လဲၩထၪ့ၥၭ ဘဲၫနီၪလဖၪနီၪ မၩကဲၪဝ့ၫပဝ့ၫၥံၪလၧ ဎြံၬဖိၪအလၩ့ထီးလၩ့ယွါတၭ ဂၪ့ခိၪအဆၧၥၭမၧၫ့ဒဲ ကၠဲၬဖ့ၪလၫ့ထၬ နးၥၭအဆၧၥၭမၧၫ့နီၪ အီၪလဲၩဎုၬလိၬၥၭ ၡၩခိၬဖိၪ ဘဲၫဆၧအထၧးအလၧးအနီၪၥိၭနီၪလီၫႉ ဆၧမၩအယီၩနီၪ ဖိၫစိၭအၥၭလၧ တီၩလီၩ့လအီၪဘၪ နးၥၭအဆၧၥၭမၧၫ့ အဖီၫအၥၪၥိၭနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဘဲၫနီၪၥိၭ ပဂဲၫယဲၩ့လၫ့လၧ ကဆါယွၩအီၪဂီၩ့ ဂၪ့ခိၪဆၧဒဲၩဘၭ ဆၧအထၧးအလၧးဖၧၩ့ စဲၪ့လၩ့ခွံၬ အဆၧမၩနီၪ အီၪပဒၩ့ထၬ ကန့အဂး ၥၫ့ဎွၩဖရၫ့စ့ၭ အၪ့နၩ့ဖ့ၪအ့ၪ ပဝ့ၫၥံၪဆၧအဖျီၩ့နီၪ မွဲဝ့ၫဒၪ မုကိၭနံၩဖၧၩ့ ပအီၪထုၪ့ၥုၪ့ထုၪ့ၥၭ ပၥုၪ့ပၥၭ ဆၧအဖျီၩ့နီၪလီၫႉ ဆၧအဖျီၩ့အနီၪနီၪ မနီၪလဲၪစွါဘဲၫ မုကိၭနံၩဒ့ၭ ပလချုၬနူၬလၩ့ဒံၭဘၪ လၧပမံၫလးနီၪ လၧမုကနံၩယီၩအဖၧၩ့ ပဖီၪ့ထၪ့ဖံၭထၪ့ထၬ ပဆၧဖံၭဆၧမၩ လဖၪဒဲ ပဆၧဆီၪ့မီၪ့ဆီၪ့မၬလဖၪ ပကယိကဒၩထဲၩ့အဂး ပကဘၪအၪ့န့ထၪ့အခံၫ့ ကဆံၬဖိၪအဂး ဆၪ့ထွ့ၫထၬဝ့ၫနီၪလီၫႉ ဆၧအဖျီၩ့အနီၪနီၪ ကဆါယွၩ အခိးအတၩလဖၪ ပအီၪထုၪ့ၥၭဂီၩ့ ပစံၭခိးစံၭတၩထၪ့ ကဆါယွၩအဂး ဖ့ၪအ့ၪအခွးအယါနီၪလီၫႉ အၪနဲၪ့အနီၪ ကဆါယွၩ အခိးအတၩလဖၪ ပမီၪ့ဘံၭထးခွံၬအခံၫ့ဒဲ ကဆါယွၩ အဆၧၥီၪ့ဆၧၥၫ့လဖၪ ပဒုၭဆၧၫ့ခွံၬ ဆၧမၩလဖၪ အဖၫ့ခိၪ ပထုၪ့ၥုၪ့ထုၪ့ၥၭ ကန့ဝ့ၫအဂး ဆၧအဖျီၩ့အနီၪ မၩဆၧၩ့အ့ၪပဝ့ၫၥံၪနီၪလီၫႉ ဘဲၫနီၪပအီၪထုၪ့ၥုၪ့ထုၪ့ၥၭလၩ့ထဲၩ့ဆၧမၩအယီၩ လၧခဲၫ့ကနံၩ ပကအီၪၥၭမၧၫ့ ဂ့ၩဂ့ၩဘၪဘၪ အၪအၪအဂး ဖ့ၪဂဲးဖ့ၪဘၭဝ့ၫဂီၩ့ ဘဲၫကဆါဎြံၬ အဆၧဒီၩ့ဆၧထ့ၬအဂ့ၩၥိၭ ပလီၩ့မၩဖိၬထွ့ၫ န့ဝ့ၫဒၪအဂး တဲၩ့ဝဲၩအ့ၪ ပဆၧၥၭမၧၫ့အကၠီၩ့ ယရၩလၩ့န့အ့ၪဘၪနၥံၪ အဆိၫထုၬလဆၧၫ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩ အဆၧအဲၪဆၧကွံၩလါဆံၭႉ