ပကဘၪတရၩလၩ့ ဆၧၥၭထိၬအပရၧၫ့လၧ လုၫလါထူၫရူၫဖၧၩ့အဂဲး

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ပကဘၪတရၩလၩ့ ဆၧၥၭထိၬအပရၧၫ့လၧ လုၫလါထူၫရူၫဖၧၩ့အဂဲး အကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ လၧဆၧပျီၩဖျ့ၭအဆၧကိၭဒဲ ဆၧၥၭထိၬအပရၧၫ့ အတီၩအလီၩ့လဖၪနီၪ ပလီၩ့ဎွါဒၪန့ဝ့ၫဒၪလၧ ပလုၫလါထူၫရူၫအဖၧၩ့နီၪလီၫႉ ဆၧလၧဆၧတီၩဆၧလီၩ့ ၥၭအဆၧၥ့ၪယၫနီၪ မွဲဝ့ၫဒၪ မနီၫလဲၪစွါဘဲၫ ဆၧအဂ့ၩအဘွၩလဖၪဒဲ လၧခးၥဲၫဖၧၩ့ ပလုၫလါတီၩလီၩ့လဖၪနီၪ ပအီၪက့ၪပၭကၩ ပယူၭယၪ့ဂီၩ့ မွဲဝ့ၫဒၪ ပတရၩလၩ့ ကဆါဎြံၬ အဆၧၥၭထိၬ အပရၧၫ့နီၪလီၫႉ ပကဘၪမၩဘဲၫနီၪၥိၭနီၪ မွဲဝ့ၫဒၪ ဆၧမၩအယီၫ လမွဲဘၪနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ လီၩ့ဆၧၫ့ထီအချုၭထုၬႇ ဆၧထုၭန့အအီၪထုၬ ၦၡၩအဆၧၥၭမၧၫ့အကျၩ ဆၧမၩထံၬဆၧထၬဆၧ အီၪဝ့ၫဒၪ အၪအၪလ့ၬနီၪလီၫႉ ပကဘၪအၪ့စၪ့လၩ့ထဲၩ့ပၥၭကမံၩ့နီၪ လၧပတရၩလၩ့ဆၧ ဆၧၥၭထိၬအပရၧၫ့ဖးဖီၩ့ဖၧၩ့ လုၫလါထူၫရူၫ အထိၪအဒီၩ့ ကဒုၩဎးႇ ကမံၩ့ဎးလီၫ ကဘၪအီၪဝ့ၫအဂး ပမၩဆီၪ့မၩနီၩ့ဆၧ ဆၧဘၪမၪဘဲၫနီၪၥိၭ ပမၩဘၪ မဎွ့ၩကၠၪလဲၪ ပကဘၪအၪ့စၪ့လၩ့ထဲၩ့ပၥၭနီၪလီၫႉ အထိၪအဒီၩ့ ကဘၪမီၪ့ဎီၩ့ကထံၪဎးလီၫ လလိၪဘၪနီၪလီၫႉ ဆၧယံၩဆၧၡီၩ့ အီၪအဂးလီၫ လိၪဝ့ၫဒၪအကၠီၩ့ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အီၪဝ့ၫဒၪ ဘဲၫယီၩၥိၭနီၪလီၫႉ

ဎြံၬဖိၪၥံၪအဆၧဆူၩနဲၩဒဲ အဆၧပျီၩဖျ့ၭနီၪ ဖ့ၪအဒီၩ့လၧ ဆၧလုၫလါအဂုးခၧၫ့ဒဲ ၥၭမၧၫ့ဆၧအဒၪ လမွဲဘၪနီၪလီၫႉ လါနၫ့ဂ့ၩ မွဲဝ့ၫဒၪ ဆၧအဒၪလၧ လုၫလါထူၫရူၫအပၪဎုၬ ဆၧအၪ့လဲၩထၪ့ ၥုၭအၥၭဆၧအဒၪနီၪလီၫႉ ပဝ့ၫၥံၪယီၩ မွဲဝ့ၫဒၪ ပလ့ၩလၧဖၧၩ့ၥၭ အဂ့ၩတၭ လၧဆၧဒဲၩဘၭဆၧဘၪမၪအဎီး အဆၧၥၭမၧၫ့ဖၧၩ့ မွဲပကဖျီၩ့ဖျ့ၭထၪ့အဂး မွဲဝ့ၫဒၪ ဆၧလ့ၩဆၧဖိၪၥံၪနီၪလီၫႉ ဆၧအနီၪနီၪ မွဲဝ့ၫဒၪ ကဆါဎြံၬ ဖ့ၪထၬအ့ၪ ပဝ့ၫၥံၪ လၬဆီၪ့အဎိၩအဒိၪနီၪလီၫႉ ကဆါဎြံၬနီၪ လၧဆၧဒဲၩဘၭဆၧဘၪမၪဖၧၩ့ၥၭဖၧၩ့ ရွံထၪ့ပၧၩဂီၩ့ ၥိၪ့စိၩ့လၩပၧၩ လၧဆၧပျီၩ့ဖျ့ၭ ဖၧၩ့ၥၭဖၧၩ့နီၪအကၠီၩ့ ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ ကဆါဎြံၬအဆၧအဲၪဆၧကွံၩ လၩ့ယွၩဝ့ၫဒၪလၧ နၥံၪကိၭဂၩဒ့ၭအဖၫ့ခိၪလါဆံၭႉ