နးၥၭဂဲးဘၭကန့ထၪ့အဂး ပကဘၪအၪ့က့ၩဘၩဆိၪဖၪဆၧ ကိၭကၠၪဒ့ၭအဂဲး

ဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့, မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ နးၥၭဂဲးဘၭ ကန့ထၪ့အဂး ပကဘၪအၪ့က့ၩဘၩဆိၪဖၪဆၧ ကိၭကၠၪဒ့ၭအဂဲး အကၠီၩ့နီၪလီၫႉ ထၧၫ့ဖုဝဲထံၩၥိၭထီးအလူၬၥံၪဧ့, လၧမုကိၭနံၩဒ့ၭ ပဖီဝ့ၫ ဘၪဆၧကွ့ၭထၬဝ့ၫလၧ လံၬဆံၫ့ဎံၪစလုကၭ (18: 1-8) ဖၧၩ့ ပၥၭခံဖၧၩ့ ဆၧဆူနဲၩဂဲးဘၭ ကမၧၫ့ထၪ့ထဲၩ့နီၪ ပကဘၪအၪ့က့ၩဘၩဆိၪဖၪကၠၬဆၧအဂး ကဆါြဎံၬ ဆၪ့ထွ့ၫထၬပၧၩနီၪလီၫႉ ဆၧဆူနဲၩကန့အဂး ဆၧဘၩဆိၪဖၪနီၪ နးၥၭအဆၧၥၭမၧၫ့ ကကၧၩ့ထၪ့ထဲၩ့အဂး ဖ့ၪအ့ၪဝ့ၫနီၪလီၫႉ လါနၫ့ ဘဲၫၥိၭဆၧအယီၩၥံၪ ကဲၪထၪ့ကန့ဝ့ၫနီၪ ပကဘၪအၪ့က့ၩဘၩဆိၪဖၪဆၧ ကိၭကၠၪဒ့ၭ လိၪဝ့ၫဒၪအကၠီၩ့ ၥၫ့ဎွၩဖရၫ့စ့ၭ ၥီၪ့ၥၫ့ထၬ အီၪဝ့ၫဒၪ ဘဲၫယီၩၥိၭနီၪလီၫႉ

ထၧၫ့ဖုဝဲထံၩၥိၭၥံၪဧ့, ပအၪ့က့ၩဘၩဆိၪဖၪဆၧ မုကိၭနံၩဒ့ၭ ကိၭကၠၪဒ့ၭစွါဘဲၫ မွဲပကန့ထၪ့ ဂဲးဘၭလၧ ပဆၧဖီၪ့ထၪ့ဖံၭထၪ့ဆၧ လဖၪၥံၪနီၪလီၫႉ လါနၫ့ ဆၧအၪ့က့ၩဘၩဆိၪဖၪယီၩ အ့ၪမွဲပလအၪ့က့ၩဘၩဆိၪဖၪ ခိၪမၬခိၪမၬစွါဘဲၫ ပနးၥၭအဂဲး ကလၩ့ဆါဒဲ ပဆၧဆူနဲၩ ကလၩ့ယံၭလၩ့ဘဲၩနီၪလီၫႉ မွဲဆၧနီၪ လၧဆၧကိၭမံၩ့ဒ့ၭ အဖၫ့ခိၪ လၧကဆါယွၩ အစီၩ့အမၩ့ဖၧၩ့ ဘဲၫပကဖီၪ့ထၪ့ဖံၭထၪ့ဆၧလၧ နးၥၭအဂဲးအဘၭ အလၧၫ့ဎွ့ၩဖၧၩ့ ကန့အဂး ပကဘၪအၪ့က့ၩဘၩဆိၪဖၪဆၧ ကိၭနံၩဒ့ၭနီၪလီၫႉ

ထၧၫ့ဖုဝဲထံၩၥိၭထီးအလူၬၥံၪဧ့, လၧပဆၧၥၭမၧၫ့ဖၧၩ့ ကယဲဆၧဂဲၩကဲၪထၪ့နးမံၩ့, ပဆၧၥၭမၧၫ့ဖၧၩ့ ပဘၪဒၪခီၩ့ဆၧၫ့ယၫ ကိၭမံၩ့ဒ့ၭလဖၪနီၪ ပကဘၪခၫ့ဂၬခွံၬလၧ ဆၧဘၩဆိၪဖၪနီၪလီၫႉ လၧပၥုၪ့ဎွံၫၥၭယီၫအခံၫ့ ဘဲၫပစံၭခိးစံၭတၩ ကဆါယွၩၥိၭ ပၥုၪ့အုၭၥၭအုၭအခံၫ့နီၪဆၧ မွဲပကဘၪ အၪ့က့ၩဘၩဆိၪဖၪလၧ ကဆါယွၩအီၪဂီၩ့ ပကဘၪအၪ့န့ထၪ့ ဂဲးဘၭနီၪလီၫႉ လၧပဂးမွဲဂ့ၩ လကၭဒံၭဘၪ လၧပဂံၪ့ဒီၪ့အဂးမွဲဂ့ၩ, လၧပထံၩပၥိၭဒဲ လၧပနဲၩ့ပဎီၩ့ ၦၡၩၥံၪအဂး ပကဘၪအၪ့က့ၩဘၩဆိၪဖၪအ့ၪဝ့ၫဒၪနီၪလီၫႉ လၩ့ဆၫ့ဒၪဆၧ ခးၥဲၫထီဘံၫ့ယၫဒဲ လၧပထံၫခး ခးပယၩ့အဖၧၩ့ ဆၧဎူၫဆၧဎၩ့ကန့ထၪ့ ဖျဲၪဖျဲၪအဂး ပကအၪ့က့ၩဘၩဆိၪဖၪလၧ လၩ့ဆိၩလၩ့ကၠၪ စီၩ့မၩ့ဎိၩဒိၪ ကဆါယွၩအီၪလါဆံၭႉ အဲၪကွံၩဘၪ ထၧၫ့ဖုဝဲထံၩၥိၭထီးအလူၬ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩ အဆၧဆိၪဂ့ၩဆိၪဘွၩလါဆံၭနဲၪႉ