နံၪ့ ၂၀၂၃နံၪ့ႇ လၩနိၫဝ့ၩ့ဘၧၫအဂး ၥၫ့ဎွၩဖရၫ့စ့ၭ အဆၧဆၪ့ထွ့ၫအဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ နံၪ့ ၂၀၂၃နံၪ့ႇ လၩနိၫဝ့ၩ့ဘၧၫအဂး ၥၫ့ဎွၩဖရၫ့စ့ၭ အဆၧဆၪ့ထွ့ၫအဂဲးအကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ လၩနိၫဝ့ၩ့ဘၧၫ ၥၫ့ဎွၩဖရၫ့စ့ၭ အဆၧဆၪ့ထွ့ၫနီၪ မွဲဝ့ၫဒၪ ပကဘၪအၪ့က့ၩဘၩဆိၪဖၪအ့ၪ အဝ့ၫဒၪအဂးနီၪလီၫႉ ၥၫ့ဎွၩဖရၫ့စ့ၭ လီၩထၬဝ့ၫဒၪနီၪ လၧပဆၧဘၩဆိၪဖၪဆၧၥံၪအဖၧၩ့ အဝ့ၫဒၪန့ထၪ့ဘၪ ဂဲးဘၭနီၪလီၫႉ မွဲလၧပဆၧဘၩဆိၪဖၪဆၧအကၠီၩ့ အဝ့ၫဒၪန့ဘၪဝ့ၫ ၥၭမုဆံၫ့ဎံၪအခိးအတၩဂီၩ့ ဆၧကိၭမံၩ့ကိၭဆံၩ့ၥံၪနီၪ ထံၫလၩ့ဒီၪလၩ့ဝ့ၫ န့ဝ့ၫတၭ ဆၧအီၪကီၪ့ထၧၫ့ဘံၪ့ယၫ ကဲၪခိၪကဲၪနါ န့ဝ့ၫဒၪနီၪလီၫႉ ကဲၪၥၫ့ဎွၩလဂၩအကၠီၩ့ ၦၡၩအဆၧကဲၪနီၪ မွဲဝ့ၫဒၪ လလၩ့မၬဘၪအကၠီၩ့ႇ လၧဆၧအီၪကီၪ့ဖိၪၥံၪ ကၠၧၫ့ကၠၧၫ့ႇ လၧကဆါကၠဲၬ အဆၧဆံၫ့ဆၧဖျ့ၪကၠၧၫ့ကၠၧၫ့ အဝ့ၫဒၪ ၦၡၩအဆၧကဲၪ ဎိၩထၪ့ဒိၪထၪ့ မုကိၭနံၩဒ့ၭအကၠီၩ့ လီၩထၬဝ့ၫ အီၪဝ့ၫဒၪ ဘဲၫယီၩၥိၭနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧလၧၥၫ့ဎွၩလဂၩ အဆၧကဲၪနီၪ မွဲဝ့ၫဒၪ ဆၧမၩအၥၭဆ့နီၪလီၫႉ ၥၫ့ဎွၩဖရၫ့စ့ၭ လီၩထၬဝ့ၫနီၪ ကဲၪဘၪၥၫ့ဎွၩလဂၩအကၠီၩ့ ၦယူၬၥိၪလဂၩအဆၧကဲၪ အခီၫပယီၫနီၪ လၧအၥၭခံဖၧၩ့ ထုၪ့ၥုၪ့ထုၪ့ၥၭဘၪဝ့ၫ အၪအၪလ့ၬနီၪလီၫႉ လၧဆၧမၩအၥၭ ဘဲၫယီၩအဖၧၩ့ ဘဲၫဖကဆါယွၩ အၥုၪ့ဆၧၩ့ၥၭဆၧၩ့အီၪၥိၭ အဝ့ၫနးဆ့ ဆၧကိၭမံၩ့ကိၭဆံၩ့ဒ့ၭအဖၧၩ့ ဆၧယၫ့ၥုၪ့ယၫ့ၥၭႇ ဆၧအဲၪဆၧကွံၩႇ ဆၧၥုၪ့ဆၧၩ့ၥၭဆၧၩ့ အီၪဝ့ၫဒၪ အၪနဲၪ့န့ လၧခီၩဒၪအိၩအကၠီၩ့ လီၩထၬဝ့ၫဒၪနီၪလီၫႉ

ကဲၪဘၪၥၫ့ဎွၩအဆၧကဲၪဂီၩ့ ဘၪဆၧၫ့နၩ့ရိၩ့အခံၫ့ ၥၫ့ဎွၩထီးအလူၬဆဲၫ့ဆဲး ဆၧအၪ့ယိၪခဲၫ့ကံၭဒဲ ဆၧၥၭမဲၪၥၭဖျဲၩ့ ဂဲၫကဲၪထၪ့ လၧအဝ့ၫၥံၪအၥၭခံဖၧၩ့နီၪလီၫႉ ဘၪမနီၪလဲၪစွါဘဲၫ အဝ့ၫၥံၪ ကဘၪထိးဘဲၩ့ဖၭၥၭႇ ကဘၪထိးအီၪက့ၪဆၧမၪ အဆၧမၩၥံၪနီၪ ၥ့ၪယၫဆိၫဝဲၩဝ့ၫအကၠီၩ့နီၪလီၫႉ မွဲဆၧနီၪ ၥၫ့ဎွၩဖရၫ့စ့ၭ အၪ့ကံၩ့အၪ့ယၫထၬဆၧနီၪ ဆၧဘဲၩ့ဖၭအဆၧမၩလဖၪ လၧဆၧအဲၪဆၧကွံၩဖၧၩ့ ပကဘၪမၩအကၠီၩ့ႇ ခံၫ့ခၫဘဲၫယီၩ အဝ့ၫဒၪ ကဲၪဘၪ ၥၫ့ဎွၩဂီၩ့ ထီလၧယၫ တခၩဒၪ ၥၫ့ဎွၩမွဲဂ့ၩ လၧပဆၧဘၩဆိၪဖၪဆၧအဖၧၩ့ မွဲကန့ထဲၩ့ဘၪ ၥၭမုဆံၫ့ဎံၪ အဆၧၥီၪ့ဆၧၥၫ့ႇ အဆၧမၩဆၧၩ့ဂီၩ့ ၥုၪ့ဆၧၩ့ၥၭဆၧၩ့ ကအီၪဝ့ၫဒၪအကၠီၩ့ လီၩထၬဝ့ၫဆ့နီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၥၫ့ဎွၩဖရၫ့စ့ၭအဂး ပအၪ့က့ၩဘၩဆိၪဖၪဆၧအဖၧၩ့ ၥၫထနၫအဆၧမၩလဖၪဒဲ ကဆါဎြံၬအနၫ့ဆါဒၪအဝ့ၫ ဖ့ၪထၬအ့ၪအဝ့ၫ ဆၧဆူနဲၩဎြံၬဖိၪၥံၪလဖၪ ကဘၪယိထွ့ၫယိခွါဝ့ၫအဂး မွဲကန့ဘၪ ၥၭမုဆံၫ့ဎံၪအဆၧနဲၪႇ အဆၧမၩဆၧၩ့ ကိၭကၠၪဒ့ၭအဂး ပကဘၪအၪ့က့ၩဘၩဆိၪဖၪဆၧလၧ ကဆါယွၩအီၪအဂး ၥၫ့ဎွၩဖရၫ့စ့ၭ အၪ့ကံၩ့အၪ့ယၫထၬ အီၪဝ့ၫဒၪ ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ လၧနၥံၪအဆၧအၪ့က့ၩဘၩဆိၪဖၪဆၧအဖၧၩ့ နၪ့ထၪ့ထဲၩ့ၥၫ့ဎွၩဖရၫ့စ့ၭ ကိၭကၠၪဒ့ၭလါဆံၭႉ