ဆၧၥုၪ့ဎွံၪၥၭထိၬ အဝံအစၧၩ့နီၪ မွဲဝ့ၫဒၪ ၥၭမုဆံၫ့ဎံၪအဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ဆၧၥုၪ့ဎွံၪၥၭထိၬ အဝံအစၧၩ့နီၪ မွဲဝ့ၫဒၪ ၥၭမုဆံၫ့ဎံၪအဂဲးအကၠီၩ့နီၪလီၫႉ အဲၪကွံၩဘၪထၧၫ့ဖုဝဲ ထံၩၥိၭထီးအလူၬၥံၪဧ့ႇ ဆၧလၧၥၭမုဆံၫ့ဎံၪ အကဆါနီၪ မွဲဝ့ၫ ဆၧၥုၪ့ဎွံၪၥၭထိၬ အဝံအစၧၩ့နီၪလီၫႉ ဆၧၥုၪ့ဎွံၪၥၭထိၬနီၪ န့ဝ့ၫဒၪလၧ ပအီၪဆုးကျိၭလိၬၥၭလၧ ကဆါဎြံၬအီၪနီၪလီၫႉ ကဆါဎြံၬနီၪ အီၪဝ့ၫဒၪလၧ ပဝ့ၫၥံၪကၠၧၫ့ကၠၧၫ့အကၠီၩ့ ဆၧဒုၪဆၧဒၩ မၩထံၭထၬဆၧႇ ပဆၧၥၭမၧၫ့ဖၧၩ့ ပဂဲးပဘၭ လၩ့ဆၭႇ ပဆၧဆူနဲၩ လၩ့ယံၭလၩ့ဘဲၩအခံၫ့ ပၧၩလဂၩဎးလီၫ လမွဲဘၪနီၪလီၫႉ ဆၧၥုၪ့ဆၫၥၭဆၫဒဲ ဆၧၥၭမၧၫ့ၥၭၡီၩ့ ဂၭဂီၩ့ဂၭစၪအကျၩ ဆၧကိၭအမံၩ့ဒ့ၭ လၧကဆါဎြံၬကၠၧၫ့ကၠၧၫ့ ပခၪ့ဂၬခွံၬမၩနၧၩ န့ဝ့ၫဒၪအကၠီၩ့ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အီၪဝ့ၫဒၪ ဘဲၫယီၩၥိၭနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭ ထီးအလူၬၥံၪဧ့ႇ ပဘၪဒၪဆၧၫ့ယၫ ဆၧတတုၭတနၭဒဲ ဆၧကၪဆၧဂဲၩအခံၫ့ ၥၭမုဆံၫ့ဎံၪယီၩ မၩလၧၫ့ဎွ့ၩပၧၩလၧ ဆၧအခိးအတၩဂီၩ့ အီၪဝ့ၫလၧပၥိၭ ဒုၭနဲၪထၪ့ပဆၧလ့ၩနီၪလီၫႉ လၧပမၩၥ့ၪထၬ ဆၧကိၪ့ဘၪကိၪ့ၥ့ၪႇ ဆၧၥ့ၪယၫနၪၥ့ၪလဖၪနီၪ ၦအလိၪလဖၪၥံၪအဂး ပယၫ့ၥၭမၩဆၧၩ့ဆၧအဖၧၩ့ မွဲပန့ထၪ့ဘၪ ဆၧၥုၪ့ဎွံၪၥၭထိၬလၧ ပၥၭခံဖၧၩ့နီၪလီၫႉ မွဲဆၧနီၪ ပမၩဂ့ၩမၩဘွၩဆၧယီၩ ပဒၪထၪ့ဘၪ လၧပဆၧၥၭမၧၫ့ အလူအဎွ့ၩ ဒိၪထၪ့ဝ့ၫဒၪနီၪလီၫႉ ပမၩဂုထၪ့အၪထၪ့ ပၩရမံၫအဂး ဒံၩ့ကၪနၬနၬ ပန့ထၪ့ဘၪ ဆၧၥုၪ့ဎွံၪၥၭထိၬ ဒံၩ့မုနၬနၬလၨၪနီၪလီၫႉ မွဲဆၧနီၪ မုကိၭနံၩ ပဘၪဒၪဆၧၫ့ယၫ ဆၧအၪ့ထၩလဖၪ ပကအီၪဆုးကျိၭလိၬၥၭလၧ ၥၭမုဆံၫ့ဎံၪႇ အဝ့ၫအခိးအတၩဖၧၩ့ ပကခၪ့ဂၬခွံၬဂီၩ့ ပကမၩဂုထၪ့အၪထၪ့ ဆၧဘိၪ့ဆၧဘၩလါဆံၭႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ ၥၭမုဆံၫ့ဎံၪ အခိးအတၩ လၩ့ယွၩဝ့ၫဒၪလၧ နၥံၪကိၭဂၩဒ့ၭ အဖၫ့ခိၪလါဆံၭႉ