ဆၧအၪ့လဲၩထၪ့ၥၭ ကန့အဂး ပကဘၪမၩ ဘဲၫၥ့ၪလဲၪအဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ဆၧအၪ့လဲၩထၪ့ၥၭ ကန့အဂး ပကဘၪမၩ ဘဲၫၥ့ၪလဲၪအဂဲး အကၠီၩ့နီၪလီၫႉ အဲၪကွံၩဘၪထၧၫ့ဖုဝဲ ထံၩၥိၭထီးအလူၬၥံၪဧႇ လၧဆၧဘၩဆိၪဖၪဆၧႇ ဆၧဒုၪအၪ့ဒုၪအီၩဆၧႇ မၩဘိၪ့မၩထးဆၧဒဲ လၧပန့ထၬဘၪ လၬဆီၪ့ အခိးအတၩဖၧၩ့ ပအၪ့လဲၩထၪ့ခွံၬ ၦၡၩၥံၪ အၥုၪ့အၥၭဒဲ ဂၪ့ခိၪထၧၫ့ဖျိၪ့ယၫ အဘိၪ့အထး န့ဝ့ၫဒၪနီၪ ပဝ့ၫၥံၪ ဆၧဆူဆၧနဲၩ အီၪဝ့ၫဒၪအကၠီၩ့ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အီၪဝ့ၫဒၪ ဘဲၫယီၩၥိၭနီၪလီၫႉ
ထၧၫ့ဖုဝဲထံၩၥိၭထီးအလူၬၥံၪဧ့ႇ ခးပယၩ့ဒဲ လၧဂၪ့ခိၪချိၫ့ဖၧၩ့ ဆၧဎူၫဆၧဎၩ့ ကန့ဝ့ၫဒၪအဂးႇ ၦၡၩၥံၪအၥုၪ့အၥၭဖၧၩ့ ကအီၪဂုးခၧၫ့လၧ ဆၧတီၩဆၧလီၩ့အဂး ကဘၪအၪ့လဲၩထၪ့ခွံၬအၥၭနီၪ လိၪဝ့ၫဒၪအဂုထုၬနီၪလီၫႉ ပဝ့ၫဒၪပနၫ့ဆါ ဆၧအၪ့လဲၩထၪ့ၥၭ လအီၪဘၪစွါဘဲၫ ပအၪ့လဲၩထၪ့ခွံၬအဂူၫဂၩအဂး ကဲၪထၪ့ဝ့ၫလၥ့ၪဘၪနီၪလီၫႉ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ ထီးအလူၬနီၪ ပကဘၪလီၩမၩဖိၬထွ့ၫ ကထံၪဎးလီၫလလိၪဘၪနီၪလီၫႉ ပကဘၪလီၩမၩဖိၬထွ့ၫအဂးနးဆ့ ကၪဂဲၫဝ့ၫဒၪနီၪလီၫႉ မွဲဆၧနီၪ ဆၧအၪ့လဲၩထၪ့ၥၭလၧ ဆၧတီၩဆၧလီၩ့ အဆၧမၩဖၧၩ့အဂး ပကဘၪစႇထၪ့ ဘဲၫၥ့ၪလဲၪစွါဘဲၫ အဂုထုၬနီၪ မုကိၭနံၩဖၧၩ့ ပကမၩဆၧအဂ့ၩအဘွၩ လမံၩ့မံၩ့အဂး ပကဘၪအီၪဂုးခၧၫ့ထၬပၥၭနီၪလီၫႉ ဆၧအနီၪဂီၩ့ ဆၧမၩအနီၪ ပလီၩမၩဖိၬထွ့ၫကန့အဂး ပကဘၪလုထၪ့ၥၭႇ ပကဘၪအၪ့က့ၩ ဆၧဘၩဆိၪဖၪလၧ ကဆါယွၩအီၪနီၪလီၫႉ ပကအၪ့က့ၩ ၥၭမုဆံၫ့ဎံၪ အခိးအတၩဂီၩ့ ပကစႇထၪ့ ဆၧၥၧၫ့မံၩ့ဖၧၩ့ လမံၩ့နီၪလါဆံၭႉ အဂုထုၬကထံၪနီၪ ပဝံဖဲၫဆံၫ့ဎံၪဂီၩ့ ပကအၪ့က့ၩဘၩဆိၪဖၪဆၧဂၩႇ နံၫထံၪကထံၪနီၪ ပဒုၪအၪ့ဒုၪအီၩဂီၩ့ ပကအၪ့က့ၩဘၩဆိၪဖၪဆၧဂၩႇ ၥၧၫ့ထံၪကထံၪနီၪ ပမၩဘိၪ့မၩထးဆၧဂီၩ့ ပကယၫ့ၥၭမၩဆၧၩ့ ၦလၧအလၩ့ဘၧၩ့လၧ ဆၧတတုၬတနၭဖၧၩ့ ၦၡၩၥံၪအဂးဂၩႉ ထၧၫ့ဖုဝဲထံၩၥိၭထီးအလူၬၥံၪဧ့ႇ ပဆၧၥၭမၧၫ့ မုကိၭနံၩ အဘိၩ့အဘၭဖၧၩ့ ပကစႇထၪ့မၩ ဆၧၥၧၫ့မံၩ့ဖၧၩ့ လမံၩ့နီၪဂီၩ့ ဆၧအၪ့လဲၩထၪ့ၥၭလၧ ဂၪ့ခိၪချိၫ့ဖၧၩ့ကန့အဂး ပကကျ့ၭစၨၭလါဆံၭႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ ကဆါယွၩ အဆၧအဲၪဆၧကွံၩ လၩ့ယွၩဝ့ၫဒၪလၧ နၥံၪကိၭဂၩဒ့ၭ အဖၫ့ခိၪလါဆံၭႉ