ဆၧလၧဆၧအဲၪဆၧကွံၩနီၪ ရၧးစၧးလအီၪဘၪအဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ဆၧလၧဆၧအဲၪဆၧကွံၩနီၪ ရၧးစၧးလအီၪဘၪအဂဲး အကၠီၩ့နီၪလီၫႉ အဲၪကွံၩဘၪ ထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧလၧဆၧအဲၪဆၧကွံၩနီၪ အီၪဝ့ၫလၧ ၥုၪ့ဆၧၩ့ၥၭဆၧၩ့ဂီၩ့ ၦဂူၫဂၩၥံၪ အဖၫ့ခိၪ ယၫ့ၥၭမၩဆၧၩ့ဝ့ၫဒၪနီၪလီၫႉ ဆၧလၧဆၧအဲၪဆၧကွံၩနီၪ ၦၡၩလဂၩဒဲလဂၩ ချဲၩ့ဒီၪလိၬၥၭဖၧၩ့ႇ မၩဆၧဖံၭဆၧမၩဖၧၩ့ႇ လ့ၩထဲၩ့ဆၧအဖၧၩ့ ဖျီၪထၪ့ဝ့ၫဒၪနီၪလီၫႉ ဆၧအဲၪဆၧကွံၩအဂး ၦၡၩကိၭဂၩနီၪ ကဘၪအီၪၥ့ၪလၧ အနဲၩ့အဎီၩ့ ၦၡၩၥံၪလဖၪ ချံၫ့ချံၫ့ၡူၪၡူၪ လိၪဝ့ၫဒၪနီၪလီၫႉ ဆၧလၧပကဲၪၦၡၩနီၪ ပကဘၪအီၪလၧ ၦၡၩၥံၪ ကိနံၩဒ့ၭနီၪလီၫႉ ဆၧနီၪအကၠီၩ့ ပဆၧလူဆၧချဲၩ့ႇ ဆၧဖံၭဆၧမၩ ဆၧကိၭမံၩ့နီၪ ကိလဘၪထံၭဘၪနဲၪဘၪ ၦၡၩၥံၪအဂး ပကဘၪထုၪ့ၥုၪ့ထုၪ့ၥၭ လိၪဝ့ၫဒၪနီၪလီၫႉ ၦၡၩလဂၩဒဲလဂၩ အဆၧနဲၩလိၬၥၭႇ အဆၧယူၭယၫ့လိၬၥၭ ကဎိၩထၪ့အဂးႇ ကအီၪအဂး ဆၧဘၪထံၭဘၪနဲၪ ဆၧချဲၩ့ၥံၪလဖၪနီၪ ပကဘၪ ဂၭဎ့ၭဝ့ၫဒၪနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧအဲၪဆၧကွံၩနီၪ ပကဘၪ လၧးအဖျီၩ့ၥံၪ အမံၩ့မံၩ့နီၪလီၫႉ လဂၩဒဲလဂၩ ဆၧအဲၪဆၧကွံၩ ကဂုးခၧၫ့အဂး ပကဘၪ ခိၭနၪလိၬၥၭ အဆၧချဲၩ့ႇ ပကဘၪ ချဲၩ့ဒီၪလိၬၥၭ ဂ့ၩဂ့ၩဘၪဘၪႇ ပကဘၪ နၪၥ့ၪလိၬၥၭႇ ပကဘၪ ထိးဆၧၫ့လိၬၥၭ လိၪဝ့ၫဒၪ အၪမၬလ့ၬနီၪလီၫႉ ဆၧလၧဆၧအဲၪဆၧကွံၩနီၪ အီၪဝ့ၫဒၪလၧ ၦၡၩၥံၪ အနိၭခိၪထိၭ ကိၭဂၩဒ့ၭနီၪလီၫႉ လါနၫ့ဂ့ၩ လၧပၥၭခံဖၧၩ့နီၪ ဆၧအဲၪဆၧကွံၩ ကအီၪအဂး လိၪဝ့ၫဒၪ အၪမၬလ့ၬနီၪလီၫႉ ပကဘၪ စႇထၪ့ ဖံၭထံၩဖံၭၥိၭလၧ ၦၡၩၥံၪအဂးနီၪ လိၪဝ့ၫဒၪ ပဆၧယၪ့ၥုၪ့ယၪ့ၥၭႇ ဆၧၥုၪ့လဲၥၭလဲ ကဘၪအီၪလၧ ၦၡၩၥံၪ အဖၫ့ခိၪနီၪလီၫႉ ဆၧလၧပကဲၪၦၡၩနီၪ အကၧၩ့ဒိၪ လိၪဝ့ၫဒၪနီၪ ပကဘၪယိဝ့ၫ ပလလၧၫ့ဎွ့ၩဘၪနီၪလီၫႉ ၦၡၩလဂၩဒဲလဂၩ ဆၧလၩ့ဆၫ့အီၪ လါနၫ့ဂ့ၩ ပအွံၪၥၭဆၧၩ့ဆၧ ပၥၭအီၪစွါဘဲၫ ပကမၩဎုၬဆၧလၧ ၦၡၩၥံၪအဂး ဆၧမၩဆၧၩ့ ကန့ဝ့ၫဒၪနီၪလီၫႉ ဆၧလၧဆၧအဲၪဆၧကွံၩနီၪ ၥုၪ့ထၪ့ ဆၧၥၭဆုးလီၩ့ ဆၧစၧၩ့ထၬ အဆၧမၩနီၪလီၫႉ လကၭဒံၭဘၪ မၩမၧၫ့ဂဲၩထၪ့ ဆၧဖံၭထံၩဖံၭၥိၭ အဆၧမၩဂီၩ့ မၩခၧၫ့ထၪ့ ခးၥဲၫအခရၧၫ့နီၪလီၫႉ ၦလၧအီၪလၥ့ၪဘၪလၧ ၦၡၩအကျၩနီၪ ၦၡၩကဆီၪ့မီၪ့အဝ့ၫ ၦၡၩလဂၩယီၩ မၩၥုၪ့ထၪ့ဒၪန့ၩ အဝ့ၫအဆၧၥၭမၧၫ့အဂးနီၪလီၫႉ လခဲၫ့ထုၬနီၪ ဆၧအဲၪဆၧကွံၩလၧ ၥုၪ့ဆၧၩ့ၥၭဆၧၩ့နီၪ လၧအဝ့ၫ အၥၭခံဖၧၩ့ အလးလအီၪဘၪနီၪလီၫႉ

ၦလၧအဂၭဖၬလၧ ဆၧအဲၪဆၧကွံၩ ဖၧၩ့ၥၭကဒီၪ့နီၪ ဖ့ၪလၫ့ၦၡၩၥံၪအဂး ခိးဂဲးခိးဘၭဒဲ မၩမုၬၥၭၥ့ၪဝ့ၫဒၪနီၪလီၫႉ ဆၧလၧ ဆၧချဲၩ့အယီၩၥံၪလဖၪနီၪ အီၪဂဲၫလၧ ပကဆါဎြံၬအီၪနီၪလီၫႉ ဘၪဆၧကွ့ၭထၬဝ့ၫလၧ လံၬဆံၫ့ဎံၪဖၧၩ့ ကဆါဎြံၬ လီၩထၬဝ့ၫနီၪ ယဖိၪခွၫႇ နဘၪၥၭမဲၪၥၭဖျဲၩဆၧ လလိၪဘၪနီၪလီၫႉ နဆၧဆူနဲၩနီၪ ဎိၩဒိၪလၧ ယဖၫ့ခိၪ အၪမၬလ့ၬနီၪလီၫႉ ဆၧချဲၩ့အယီၩ ပနါဂၧၫ့ဘၪလၧ ကဆါဎြံၬအီၪနီၪလီၫႉ ဆၧနီၪအကၠီၩ့ ပဂံၪ့ဒီၪ့ဖိၪၥံၪကိၭဂၩ လဂၩဒဲလဂၩ ကဘၪချဲၩ့ဒီၪလိၬၥၭ ဂ့ၩဂ့ၩဘၪဘၪ ကန့အဂး ပကဘၪအၪ့န့ထီးထၬ ကဆါဎြံၬ အဆၧချဲၩ့ ကိၭဂၩဒ့ၭ လိၪဝ့ၫဒၪအကၠီၩ့ ယရၩလၩ့န့အ့ၪနၥံၪ ထၨၪယီၩနီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ ၥုၪ့ထၪ့ ဆၧအဲၪဆၧကွံၩလါဆံၭႉ