ဆၧလၧဆၧထူၭဆၧလၧၫ့နီၪ မွဲဝ့ၫဆၧအဲၪဆၧကွံၩအဂးအဂဲး

ဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့, မုကနံၩယီၩ ယရၩ့လၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ဆၧလၧဆၧထူၭဆၧလၧၫ့နီၪ မွဲဝ့ၫဆၧအဲၪဆၧကွံၩအဂးအဂဲး အကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့, လၧပဆၧၥၭမၧၫ့မုကိၭနံၩဒ့ၭဖၧၩ့ ဆၧၥၭမၧၫ့ဆိၩကၠၪနီၪ ဆၧဒိၭန့ဆၧန့ၥၫ ပကအၪ့န့ထၪ့အဂး ပကလီၩ့ဎွါထၪ့, ပကစူၭကီၪ့ထၪ့ဒၪန့ၫ ဂၫ့ခိၪဆၧထူၭဆၧလၧၫ့ၥံၪ လလိၪဘၪနီၪလီၫႉ ပဆၧၥၭမၧၫ့နီၪ ကဘၪအီၪဘဲၫ ထၧၫ့ဖုထၧၫ့ဝဲၥိၭ အဆၧၥၭမၧၫ့ဒဲ ၦဂူၫဂၩၥံၪအီၪ ပကဘၪဖ့ၪအ့ၪ ပဆၧအဲၪဆၧကွံၩနီၪ မွဲဝ့ၫဒၪ အရ့ၩဒိၪထုၬအကၠီၩ့ ၥၫ့ဎွၩဖရၫ့စ့ၭ ၥီၪ့ၥၫ့ထၬ အီၪဝ့ၫဒၪ ဘဲၫယီၩၥိၭနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့, ဂၫ့ခိၪဆၧထူၭဆၧလၧၫ့လဖၪၥံၪနီၪ ဆၧအဲၪလၩ့အၥၭ ၦလဂၩဎးအဂးလီၫ ပလကြၨၭၥိၩ့ဘၪနီၪလီၫႉ ဂၫ့ခိၪဆၧထူၭဆၧလၧၫ့ၥံၪနီၪ ဖ့ၪအ့ၪဆၧမၩဆၧၩ့ လၧၦအၡၪ့ဖိၪၥံၪအဂး ကဘၪမွဲဝ့ၫလီၫႉ လကၭဒံၭဘၪ ဆၧအနီၪၥံၪနီၪ ပကဘၪၥိၩ့ဝ့ၫဒၪလၧ ဆၧဖံၭထံၩဖံၭၥိၭအဂး, ပကဘၪၥိၩ့ဝ့ၫဒၪလၧ ဆၧယၫ့ၥုၪ့ယၫ့ၥၭ အဆၧမၩအဂးၥံၪနီၪလီၫႉ

ထၧၫ့ဖုဝဲထံၩၥိၭၥံၪဧ့, လၧဆၧထုၪ့ၥုၪ့ထုၪ့ၥၭဖၭဒိၪဖၧၩ့ ပၥိၩ့ထၪ့ ဂၫ့ခိၪဆၧထူၭဆၧလၧၫ့လဖၪဂီၩ့ ပကမၩဂုထၪ့အၪထၪ့ ဆၧၥၭထိအပရၧၫ့နီၪလီၫႉ ဂၫ့ခိၪဆၧထူၭဆၧလၧၫ့ လကၭဒံၭဘၪ ကဆါယွၩဖ့ၪထၬအ့ၪပၧၩ ဆၧအခိးအတၩ ထီးအလူၬနီၪ မွဲပၧၩလဂၩဎးအဂးလီၫ လမွဲဘၪတၭ ကဘၪမွဲဝ့ၫ ထၧၫ့ဖုဝဲထံၩၥိၭ ဆၧအဲၪဆၧကွံၩအဂးဒဲ ၡၩခံးဂးဆၧဖံၭထံၩဖံၭၥိၭ ကဂုထၪ့အၪထၪ့အဂး ပကဘၪၥိၩ့ဝ့ၫဒၪနီၪလီၫႉ

ထၧၫ့ဖုဝဲထံၩၥိၭၥံၪဧ့, လၧပဆၧချဲၩ့ဆၧလီၩ, လၧပဆၧဖံၭဆၧမၩဒဲ ၡၩခံးဂးဆၧဖံၭထံၩဖံၭၥိၭ ကဂ့ၩထၪ့အဂး ပကဘၪဖီၪ့ထၪ့ဖံၭထၪ့ဆၧနီၪ မွဲဝ့ၫအရ့ၩဒိၪအကၠီၩ့ ၥၫ့ဎွၩဖရၫ့စ့ၭ အဆၧလီၩဖျီၪထၪ့ အီၪဝ့ၫဒၪဘဲၫယီၩၥိၭနီၪလီၫႉ မွဲဆၧနီၪ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့, လၧပဆၧမၧၫ့မုကိၭနံၩဒ့ၭဖၧၩ့ ပကနၪ့ထၪ့ထဲၩ့ ၥၫ့ဎွၩဖရၫ့စ့ၭ အဆၧလီၩဖျီၪထၪ့ လဖၪၥံၪယီၩဂီၩ့ ပကကျ့ၭစၨၭလီၩ့မၩဖိၬထွ့ၫ ကၠၧၫ့ကၠၧၫ့လါဆံၭနဲၪႉ ထၧၫ့ဖုဝဲထံၩၥိၭထီးအလူၬ ကဆါယွၩ အဆၧဆိၪဂ့ၩဆိၪဘွၩနီၪ မွဲလၩ့ယွၩဝ့ၫဒၪလၧ နၥံၪကိၭဂၩဒ့ၭ အဖၫ့ခိၪလါဆံၭႉ