ဆၧယိလါအဂဲး

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ဆၧယိလါအဂဲးအကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ လၧခးၥဲၫဖၧၩ့ယီၩ ပလကြၨၭၥၭနၪ့ဂ့ၩဘၪ ဆၧအဂဲးလဖၪ အီၪဝ့ၫဒၪလါနၫ့ ဖ့ၪအ့ၪဆၧယိလါဖၧၩ့ၥၭဆ့ လၧခးၥဲၫဖၧၩ့ အီၪဝ့ၫဒၪ အၪမၬလ့ၬနီၪလီၫႉ ကဆါယွၩနီၪ လၧၦၡၩဂံၪ့ဒီၪ့ၥံၪအကျၩ ဎွံၪလၩ့အချံၫအဂ့ၩၥံၪ အဆၧၫ့လထ့ၬဘၪနီၪလီၫႉ ဖီၩ့ခွံၬအခံၫ့ဒၪအိၩ ပဘၪဒၪဆၧၫ့ယၫ ကိၫဘံၫဆၧဆၫအခံၫ့ ၦလၧခွံၬစၨၭထၬ အဆၧၥၭမၧၫ့ၥၭၡီၩ့ဂီၩ့ ယိထွ့ၫမၩဆၧၩ့ ဆၧဆၫဆါလဖၪ ၦၡၩၥံၪနီၪ ပကဘၪအၪ့အူၭႇ ပကဘၪမၩလၩ့မၩဖၩ့ဝ့ၫဒၪနီၪလီၫႉ ပဆၧၥၭမၧၫ့ၥၭၡီၩ့ ဂုးခၧၫ့န့ဝ့ၫဒၪနီၪ ဘၪထွ့ၫဝ့ၫဒၪလၧ ၦလၧအဖ့ၪဆၧၫ့လၩ့ၥၭ လဖၪၥံၪနီၪလီၫႉ ၦအဖ့ၪဆၧၫ့လၩ့ၥၭ လဖၪၥံၪနီၪ မွဲဝ့ၫဒၪ ၥံၪဎွံၪဆရၫႇ ဆရၫမုၪၥံၪႇ ၦအမၩဆၧမၩလၧ အၪ့ဆၫၥံၪဎွံၪလးၥံၪႇ ၦအမၩဆံၫ့ဖျ့ၪဆၧဖိၪၥံၪႇ ၦအခိၬဆၧဆၫဆါၥံၪႇ ၦအမၩဆၧၩ့ ဆၧလ့ၩဆၧထဲၩ့ဆၧအဂးဆၧဖိၪၥံၪႇ အမၩဆၧၩ့ဆၧ ၦမုၪႇ ၦခွၫၥံၪႇ ၦအမၩဆၧဒူၩဆၧယးဆၧမၩဖိၪၥံၪႇ ၥၫ့ခိၪႇၥၫ့ခၫၥံၪႇ မံၭထၭမုၪၥံၪနီၪလီၫႉ ၦၡၩလဖၪၥံၪယီၩ အဂဲးအဘၭအကၠီၩ့ ပဝ့ၫၥံၪ ပပြၨၭထဲၩ့န့ဝ့ၫဒၪ ပဆၧၥၭမၧၫ့နီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၥၫ့ဎွၩဖရၫ့စ့ၭ ကိၭဖံၭၥိၭထၬ ပဝ့ၫၥံၪ ထီးအလူၬနီၪ ပကဘၪအီၪက့ၪထၬ ပဆၧယိလါနီၪလီၫႉ ဆၧလၧဆၧယိလါနီၪ လၧပၥၭခံဖၧၩ့ အီၪဝ့ၫဒၪဆၧလဖၪနီၪ ထုၬဖျီၪထၪ့ဝ့ၫဒၪနီၪလီၫႉ ဆၧလၧဆၧယိလါနီၪ ဆၧနၧၩ့ခၫ့ဖျီၫ့ ဎိၩဎိၩဒိၪဒိၪ မွဲဝ့ၫဒၪ ဆၧတီၩဆၧလီၩ့ႇ ဆၧအဂ့ၩအဘၪႇ ဆၧဎံၫဆၧလၩႇ ဆၧမီၪ့ဎီၩ့ထၨၪဎီၩ့ဒဲ ဆၧအဲၪဆၧကွံၩ လဖၪနီၪ ယၧၩ့ထၪ့ဝ့ၫဒၪနီၪလီၫႉ ဆၧလၧဆၧယိလါနီၪ ဖ့ၪအ့ၪဆၧၥုၪ့ဒုၩၥၭဒုၩနီၪလီၫႉ ဆၧလၧဆၧယိလါနီၪ ခၪ့ဂၬခွံၬ ဆၧမၩလၧပယိလၩ့ဒၪန့ၩ ပနၫ့ဆါဒၪပဝ့ၫ အဆၧမၩႇ ဆၧမၩနၧၩ့အဆၧမၩႇ အီၪဒုၩၥၭဒၪန့ၩအဝ့ၫလဂၩဎး အဆၧမၩၥံၪဂီၩ့ ပအီၪၥၭမၧၫ့ ဂ့ၩဂ့ၩဘၪဘၪအဂး ဝဲထၪ့ထၬအ့ၪ ပဝ့ၫၥံၪဖၧၩ့ၥၭနီၪလီၫႉ မွဲဆၧနီၪ အဲၪကွံၩဘၪထၧၫ့ဖုဝဲထံၩၥိၭထီးအလူၬ အီၪက့ၪထၬ ဆၧယိလါလၧ နၥံၪအဆၧၥၭမၧၫ့ဖၧၩ့ ကိၭကၠၪဒံၭလါဆံၭႉ