ဆၧမုၬလၩၥၭဎွံၫကအီၪအဂး ပကဘၪဖ့ၪထၬ အခံၫ့လၧ ကဆါဎြံၬအီၪအဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ဆၧမုၬလၩၥၭဎွံၫကအီၪအဂး ပကဘၪဖ့ၪထၬ အခံၫ့လၧ ကဆါဎြံၬအီၪအဂဲး အကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ပဝ့ၫၥံၪယီၩ ပအီၪပွံၭၥုၪ့အီၪပွံၭၥၭအခံၫ့ ကအီၪအဂး ပကျ့ၭစၨၭကၠၭ ခိမၬခိမၬဒ့ၭနီၪလီၫႉ လါနၫ့ဂ့ၩ လၧလံၬဆံၫ့ဎံၪ စမၭၥုၫဘၪစကွ့ၭထၬဝ့ၫ (၂၂း ၁-၁၄) ဖၧၩ့ မွဲပကလီၩ့ဎွါထၪ့အခံၫ့လၧ မၩဖီၩ့မၩဖျ့ၭပၧၩအဂး ကဆါဎြံၬ ကိၭဖံၭၥိၭထၬ ပဝ့ၫၥံၪနီၪလီၫႉ ပအီၪက့ၪထၬ ပအခံၫ့လၧ ကဆါဎြံၬအီၪစွါဘဲၫ ပၥုၪ့မုၬၥၭဎွံၫဂီၩ့ ပကန့ထၪ့ဘၪ ဆၧဘၠၩ့လၧ အဝ့ၫဒၪအအီၪနီၪလီၫႉ ထီးနီၪ ပၥုၪ့ပၥၭချံၪ့ ပအီၪန့ဝ့ၫဒၪ ဂုးဂုးခၧၫ့ခၧၫ့ဂီၩ့ ပလၩ့စဲၪထး ပၧၩလဂၩဎး အဆၧမၩဒဲ ဆၧလဂ့ၩဆၧလဘၪဘၪ အဆၧမၩဖၧၩ့ အီၪပဒၩ့ထၬအ့ၪ ပဝ့ၫၥံၪန့ဝ့ၫဒၪအကၠီၩ့ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အီၪဝ့ၫဒၪ ဘဲၫယီၩၥိၭနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ လၧပဆၧၥၭမၧၫ့ မုကိၭနံၩဒ့ၭဖၧၩ့ ပအီၪက့ၪထၬ ပအခံၫ့လၧ ကဆါကၠဲၭအီၪဂီၩ့ ပအီၪဆုးကျိၭ ပၥၭလၧအဝ့ၫဒၪအီၪ ဘဲၫၥ့ၪလဲၪႉ ပကြၨၭအၪ့စၪ့လၩ့ထဲၩ့ပၥၭနီၪလီၫႉ လၧလံၬဆံၫ့ဎံၪ ဆၧမၭၥုၫကွ့ၭထၬဝ့ၫအဖၧၩ့ စဎွၩလဂၩ ကိၭဖံၭၥိၭ ၦၡၩၥံၪလၧ ဆၧဘိၪ့ဆၧဘၩဖၧၩ့လါနၫ့ ၦၡၩလဖၪ စံၭအဝ့ၫဒၪ အခံၫ့လအီၪဘၪႇ အခံၫ့လချုၭဘၪဂီၩ့ လၧဆၧဘိၪ့ဆၧဘၩဖၧၩ့ လဂဲၫလၧၩ့ဘၪနီၪလီၫႉ အရ့ၩဒိၪထုၬ ကဆါယွၩ ကိၭဖံၭၥိၭထၬ ပဝ့ၫၥံၪလၧ အဝ့ၫအအီၪအခၫ ပဖ့ၪအ့ၪအခံၫ့ လနၧၩ့ဘၪအကၠီၩ့ ကဆါဎြံၬၥီၪ့ၥၫ့ထၬပၧၩ ဘဲၫဆၧဒီၩ့ဆၧထ့ၬ အနီၪၥိၭနီၪလီၫႉ ၦလၧဖ့ၪအ့ၪ ကဆါကၠဲၬအဂး အခံၫ့လအီၪဘၪ ၦၡၩၥံၪနီၪ လၧအဝ့ၫၥံၪ အဆၧၥၭမၧၫ့ဖၧၩ့ ဆၧလဂ့ၩဆၧလဘၪဘၪၥံၪ မၩနၧၩ့ခၫ့ဖျီၫ့ၥ့ၪဝ့ၫဒၪအကၠီၩ့ ကဘၪထုၪ့ၥုၪ့ထုၪ့ၥၭနီၪလီၫႉ မွဲဆၧနီၪ မွဲပကန့ဘၪ ဆၧမုၬလၩၥၭဎွံၫဂီၩ့ ပကလၩ့ဘူၭလၧ ကဆါကၠဲၬအဂး ဆၧဘၩဆိၪဖၪမွဲဂ့ၩႇ ဆၧမၩဘိၪ့မၩထးဆၧမွဲဂ့ၩ ပကဘၪ ကျ့ၭစၨၭမၩဝ့ၫဒၪအကၠီၩ့ ၥၫ့ဎွၩဖရၫ့စ့ၭ အဆၧဆၪ့ထွ့ၫ အီၪဝ့ၫဒၪ ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ မွဲနၥံၪလၧၫ့ဎွ့ၩဝ့ၫဒၪလၧ ကဆါဎြံၬအဆၧအဲၪဆၧကွံၩလါဆံၭႉ