ကၭၥလ့ၬအဆၧၥၭမၧၫ့ အရ့ၩဒိၪထုၬနီၪ မွဲဝ့ၫဒၪ မံၩဆၩဆၧလုထၪ့အဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ကၭၥလ့ၬအဆၧၥၭမၧၫ့ အရ့ၩဒိၪထုၬနီၪ မွဲဝ့ၫဒၪ မံဆၩဆၧလုထၪ့အဂဲး အကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ နံၪ့ ၂၀၂၃ နံၪ့ႇ လၩယူၫလဲၫ့ဖၧၩ့ ၥၫ့ဎွၩဖရၫ့စ့ၭ အဆၧဘၩဆိၪဖၪ ဆၧထိစိၩနီၪမွဲဝ့ၫဒၪ ဆၧၥၭမၧၫ့အဘၪထွ့ၫလၧ မံဆၩဆၧလုထၪ့နီၪလီၫႉ မံဆၩဆၧလုထၪ့ဖၧၩ့ ကဆါဎြံၬအီၪ အဂုးအခၧၫ့အကၠီၩ့ ပဆၧၥၭမၧၫ့ အၪ့လဲၩထၪ့ၥၭနီၪလီၫႉ ကဆါဎြံၬဂဲၫလၩ့လၧ မံဆၩဆၧလုထၪ့ဖၧၩ့ဂီၩ့ အၪ့လဲၩထၪ့ ပဆၧၥၭမၧၫ့နီၪလီၫႉ မံဆၩဆၧလုထၪ့ဖၧၩ့ ကဆါဎြံၬအနၫ့ဆါဒၪအဝ့ၫ လုထၪ့ၥၭလၧပဝ့ၫၥံၪအဂးနီၪလီၫႉ ကဆါဎြံၬနီၪ မွဲအဝ့ၫအကၠီၩ့ မၩလၧၫ့ဎွ့ၩ ပဆၧၥၭမၧၫ့ အဂဲးအဘၭၥိၭ ပဝ့ၫၥံၪနးဆ့ ပကဖ့ၪဂဲးဖ့ၪဘၭ ပထံၩပၥိၭၥံၪအဂး ကဆါဎြံၬ ကိၭဖံၭၥိၭထၬပၧၩနီၪလီၫႉ

ပဘိၪ့ထၪ့ဘၩထၪ့ မံဆၩဆၧလုထၪ့ဆံၫ့ဎံၪနီၪ မွဲဝ့ၫဒၪ ပဒၪဆၧၫ့ယၫလၧ မၧၫ့ထၪ့ထဲၩ့ ကဆါဎြံၬနီၪလီၫႉ လခံၫ့ဎး ပနၫ့ဆါဒၪပဝ့ၫ ကဆါဎြံၬ ၥီၪ့ၥၫ့ထၬအဆၧၥီၪ့ၥၫ့ဖၧၩ့ ဝဲထၪ့အ့ၪပၧၩ ဖၧၩ့ၥၭနီၪလီၫႉ လၧမံဆၩဆၧလုထၪ့ အထးဖၧၩ့ ကဆါဎြံၬဂဲၫလၩ့ဂီၩ့ ဘဲၫအဝ့ၫၥိၭ ပအဲၪကွံၩဆၧကၥ့ၪအဂး ဖ့ၪဂဲးဖ့ၪဘၭပၧၩနီၪလီၫႉ ဘၪမနီၪလဲၪစွါဘဲၫ လၧဆၧနီၪအဖၧၩ့ ၦဂူၫဂၩၥံၪဒဲပၧၩ ပဒၪဆၧၫ့ယၫလိၬၥၭကန့အဂး ဖ့ၪအ့ၪဂဲးဘၭအကၠီၩ့ မံဆၩဆၧလုထၪ့ထုၬဂီၩ့ ပစဲၪ့လၫ့လၧခီၫ့ကကၠၪ လၧပနဲၩ့ပဎီၩ့ၥံၪဖၧၩ့ ၦဂူၫဂၩၥံၪနီၪ ပဒၪဆၧၫ့ယၫ န့ဝ့ၫဒၪလၧ ဆၧအဲၪဆၧကွံၩဖၧၩ့နီၪလီၫႉ

ၡၩခံးဂးဆၧဖံၭထံၩဖံၭၥိၭ အၪ့လဲၩထၪ့ၥၭ ကန့အဂး မွဲဝ့ၫဒၪ မံဆၩဆၧလုထၪ့ဆံၫ့ဎံၪယီၩ ပကဘၪအီၪက့ၪထၬ ဘဲၫၥိၭကၭၥလ့ၬ ဆၧၥၭမၧၫ့အတိၩ့ၥၭၥိၭနီၪလီၫႉ လကၭဒံၭဘၪ ကဆါယွၩဒဲ ပထၧၫ့ဖုထၧၫ့ဝဲၥံၪ အီၪဆုးကျိၭလိၬၥၭကန့အဂး အဝ့ၫၥံၪအၥုၪ့အၥၭ ကဝဲထၪ့ၥၭအဂး ပကအၪ့က့ၩဘၩဆိၪဖၪအ့ၪလါဆံၭႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ ဘိၪ့ထၪ့ဘၩထၪ့ မံဆၩဆၧလုထၪ့ဆံၫ့ဎံၪလါဆံၭႉ