Cardinal Luis Antonio Tagle အဆၧဆၪ့ထွ့ၫအဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪနီၪ မွဲဝ့ၫဒၪ Cardinal Luis Antonio Tagle အဆၧဆၪ့ထွ့ၫအဂဲးအကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ Cardinal Luis Antonio Tagle ယီၩ မွဲဝ့ၫဒၪ အဘၪထွ့ၫဝ့ၫဒၪလၧ ဆၧလီၩလၩ့ဆၧၥၭထိၬအပရၧၫ့ အမူၩဒၩ အီၪဝ့ၫဒၪ Cardinal လဂၩနီၪလီၫႉ အဝ့ၫယီၩ လၧခးပီၫတူၫဂံၫႇ ဝံလံစဘိၫ့ ခးၥဲၫထၧၫ့ဘံၪ့ယၫ ၥၭဘၪ့ဖိၪၥံၪ အဘိၪ့မုနံၩအိၩ ၦလၧအဂဲၫထၪ့ ဘိၪ့မုနံၩ ၥၭဘၪ့ဖိၪၥံၪလၧ ခး(ဖိလပိုင်)လဖၪ ဆၪ့ထွ့ၫထၬဝ့ၫနီၪ မွဲဝ့ၫဒၪ ၦဂူၫဂၩၥံၪ ဆၧအဂ့ၩအဘွၩ ကဂုထၪ့အၪထၪ့အဂး အမၩနၧၩ့ဝ့ၫဒၪ ၦအၪ့လွ့ၫဖိၪၥံၪၥိၭႇ ဘဲၫကဆါဎြံၬ အစီၩ့အမၩ့ၥိၭ ကဘၪကျ့ၭစၨၭဝ့ၫဒၪအကၠီၩ့ ဆၪ့ထွ့ၫထၬဝ့ၫဒၪနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ Cardinal Tagle အဆၧၥီၪ့ဆၧၥၫ့ အီၪဝ့ၫဒၪ လခဲၫ့ကမံၩ့နီၪ ပဝ့ၫၥံၪယီၩ လၧၦဂူၫဂၩၥံၪ အဖၫ့ခိၪ ပအၪ့လွ့ၫထၬ ပစီၩ့ပမၩ့န့ဝ့ၫဒၪစွါဘဲၫ ပဝ့ၫၥံၪ အဖၫ့ခိၪနးဆ့ မနီၪလဲၪၥံၪအစီၩ့အမၩ့နီၪ အၪ့လွ့ၫထၬ ပဝ့ၫၥံၪဂၩနီၪ ပကဘၪအၪ့စၪ့လၩ့ထဲၩ့ပၥၭနီၪလီၫႉ ပဝ့ၫၥံၪယီၩ အ့ၪမွဲလၧ ကဆါဎြံၬအဆၧၥၭထိၬအပရၧၫ့ အစီၩ့အမၩ့ အၪ့လွ့ၫထၬ ပဝ့ၫၥံၪစွါဘဲၫ ပဝ့ၫၥံၪနးဆ့ လၧမံၫဒံၫယၫ ခးၥဲၫအဖၧၩ့ ၦဂူၫဂၩၥံၪ အဖၫ့ခိၪ မံၫဒံၫယၫ အစီၩ့အမၩ့ ဘၪထွ့ၫလၧဆၧအဂ့ၩ အၪ့လွ့ၫထၪ့အဂး ပကဘၪ ကျ့ၭစၨၭမၩဝ့ၫဒၪအကၠီၩ့ Cardinal Tagle အဆၧၥီၪ့ဆၧၥၫ့ အီၪဝ့ၫဒၪ ဘဲၫယီၩၥိၭနီၪလီၫႉ

ဘဲၫၥိၭ Cardinal Tagle အဆၧဆၪ့ထွ့ၫႇ ဆၧဖ့ၪဂဲးဖ့ၪဘၭဆၧယီၩ ပဖီဘၪဝ့ၫဂီၩ့ ပဝ့ၫၥံၪနးဆ့ လၧမံၫဒံၫယၫ (Facebook, Titok, Instagram, Youtube)ဆၧလဖၪၥံၪယီၩအဖၧၩ့ ပရၩလၩ့ဆၧၥၭထိၬအပရၧၫ့ႇ ပမၩဂုထၪ့အၪထၪ့ ဆၧၥၭထိၬအပရၧၫ့အဖၧၩ့ ၦဂူၫဂၩၥံၪ အဖၫ့ခိၪ ၦလၧအၪ့လွ့ၫ အစီၩ့အမၩ့နၧၩ့ဝ့ၫဒၪ ဎြံၬဖိၪလဂၩ ပကဲၪထၪ့ယူၭဂၩ ပကဘၪ ယိထံၫယိဆၭ လၩ့ထဲၩ့ပၥၭအကၠီၩ့ Cardinal Tagle အဆၧဆၪ့ထွ့ၫ အီၪဝ့ၫဒၪ ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭ ထီးအလူၬ ကဆါယွၩ အဆၧအဲၪဆၧကွံၩ လၩ့ယွၩဝ့ၫဒၪလၧ နၥံၪကိၭဂၩဒ့ၭ အဖၫ့ခိၪလါဆံၭႉ