ၦလၧအကဲၪထၪ့ မံၭထၭမုၪလဂၩ စပံၫ့ဆၧဂၩ့ဒီၩ့မုၪ Olalla Oliveros အဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪမုၪခွၫလၧအအီၪအနိၪ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪနီၪ မွဲဝ့ၫဒၪ ၦလၧအကဲၪထၪ့ မံၭထၭမုၪလဂၩ စပံၫ့ဆၧဂၩ့ဒီၩ့မုၪ Olalla Oliveros အဂဲးအကၠီၩ့နီၪလီၫႉ အဲၪကွံၩဘၪထၧၫ့ဖုဝဲ ထံၩၥိၭထီးအလူၬၥံၪဧ့ႇ လၧလံၬဆံၫ့ဎံၪဖၧၩ့ ကဆါဎြံၬနီၪ ၦလၧအမိဖိၬ အဝ့ၫဒၪအခဲၫ့လဖၪ ထီးအလူၬနီၪ ကိၭထၪ့ဝ့ၫ ကိၭဂၩအ့ၬနီၪလီၫႉ လနၩ့နၩ့နီၪ ကဖိၬထၪ့ ကဆါဎြံၬအခဲၫ့အဂး လလီၩဖျီၪထၪ့ဝ့ၫဘၪလါနၫ့ ကဘၪဖိၬထၪ့အဝ့ၫအခဲၫ့အဂး ကိၭဖံၭၥိၭဝ့ၫဒၪနီၪလီၫႉ လၧအဝ့ၫကိၭဖံၭၥိၭထၬဝ့ၫအဖၧၩ့ ၦလၧအကဲၪဒိၪကိၪမုႇ အမံၩ့ဎိၩၥၪဖျီၪႇ အဆၧကိၪ့ဆၧတဲၩ့အီၪဝ့ၫဒၪ ဎိၩဒိၪ ၦၡၩၥံၪ လပၪဘၪနီၪလီၫႉ အဝ့ၫကိၭထၪ့ဝ့ၫနီၪ မွဲဝ့ၫဒၪ ၦဘၩဒၪဖိၪၥံၪနီၪလီၫႉ မွဲဆၧနီၪ ကဆါယွၩ အဆၧကိၭနီၪ ပနၪကၥ့ၪဝ့ၫအဂး ကၪဂဲၩဝ့ၫဒၪနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ကဆါယွၩအဆၧကိၭနီၪ ကၪဂဲၩဝ့ၫ ဘဲၫၥ့ၪလဲၪစွါဘဲၫ လၧခးစပံၫ့ ဆၧဂ့ၩဒီၩ့ အဆၧၥၭမၧၫ့ ထၧၫ့ဘံၪ့ယၫ ဂဲၫဂဲၩဝၭထၪ့ၥၭနီၪလီၫႉ ဘၪမနီၪလဲၪစွါဘဲၫ ၦလၧအမံၩ့မွဲဝ့ၫ လၧ Olalla Oliveros ဆၧဂၩ့ဒီၩ့မုၪလဂၩ လၧမံၩ့ဎိၩၥၪဖျီၪ ဆၧဂၩ့ဒီၩ့မုၪ အဆၧမၩနီၪ ခွံၬၡိၭထးထၬဝ့ၫဂီၩ့ ဒိၭန့ထၪ့ မံၭထၭမုၪ အဆၧကဲၪနီၪလီၫႉ ဘဲၫၥိၭဒိၭန့ထၪ့ မံၭထၭမုၪ အဆၧကဲၪယီၩအကၠီၩ့ ၦလနၩ့နၩ့နီၪ လီၫ့ကီၩ့အဝ့ၫဒၪႇ ၦလနၩ့နၩ့နီၪ ထီၫမံၫထီၫမၫၥၭနီၪလီၫႉ ဘဲၫၥိၭကကဲၪ မံၭထၭမုၪအဆၧကဲၪ အီၪက့ၪထၬၥၭန့ဝ့ၫဒၪနီၪ လၧခးစပံၫ့ဖၧၩ့ ဂၪ့ခိၪဝၭ အဂဲးဆီၪ့ ကဲၪထၪ့ဂီၩ့ ဒၪထၪ့ဘၪ ဆၧဂၭဂီၩ့ဂၭစၪဒဲ ဆၧၥံၪဆၧဆၫၥံၪအကၠီၩ့ အၥၭဘၪထံၭအခံၫ့ လ့ၩစဲၪ့လၫ့ဆၧလ့ၩလၧ ခးပီၫတူၫဂံၫႇ ဖၫတံၫမၫ မိနးမၫရံၫအီၪနီၪလီၫႉ လၧဆၧလ့ၩဆၧနီၪအဖၧၩ့ နါဂၧၫ့ထၪ့ဘၪ ကဆါယွၩအဆၧကိၭနီၪလီၫႉ စႇထၪ့လၧအခံၫ့အနီၪ အီၪက့ၪလၩ့ၥၭ ကကဲၪမံၭထၭမုၪလဂၩ အဆၧကဲၪအဂဲးနီၪလီၫႉ ထီးနီၪ လ့ၩနူၬလၩ့ဝ့ၫလၧ မူၭခိၪအၥီၫ့ဒိၪ ၦဆံၫ့ဎံၪ မဲၫ့ကဲၫ အခရၧၫ့ဖၧၩ့နီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ အဝ့ၫယီၩ ကဲၪဝ့ၫမံၩ့ဎိၩၥၪဖျီၪ ဆၧဂၩ့ဒီၩ့မုၪလဂၩအကၠီၩ့ လၧခးစပံၫ့ ထၧၫ့ဘံၪ့ယၫ ၦၡၩၥံၪဒၪဘၪအဝ့ၫ အဆၧဂၩ့ၥံၪ လၧပယိအကြၨၭအီၪႇ လကြၨၭဘၪအီၪနီၪလီၫႉ မွဲဆၧနီၪ အဝ့ၫအီၪက့ၪထၬၥၭ လၧမံၭထၭမုၪလဂၩအဆၧကဲၪအခံၫ့ အဝ့ၫအဂၩ့လဖၪ ထၨၪပယိကြၨၭဝ့ၫအဂး အၪ့န့ထၪ့ဆၧချဲၩ့ဎိၭလၩ့လၧ ၦထုၬထၪ့ဆၧဖိၪအီၪနီၪလီၫႉ အဝ့ၫဒၪယီၩ အီၪက့ၪထၬၥၭ ကကဲၪမံၭထၭမုၪအဆၧကဲၪနီၪ ဂီၩနၬခုၪ ကဘၪလီၩဖျီၪထၪ့ဝ့ၫအဂး ဂုၩခိၪဂုၩခဲၫ့ၥၭနီၪလီၫႉ လါနၫ့ လခဲၫထုၬနီၪ ကဒုၭဆၧၫ့ ကဆါဎြံၬ အဆၧကိၭအဂး ဂဲးဘၭလအီၪဘၪအကၠီၩ့ လီၩဖျီၪထၪ့ဝ့ၫဒၪနီၪလီၫႉ အဝ့ၫယီၩ ကီၩ့ၥိၭထၬ မံၭထၭမုၪ အဆၧကီၩ့ဆၧၥိၭအဂၩ့ဒီၩ့နီၪ ဒၪထၪ့ဘၪဝ့ၫလၧယၫနီၪလီၫႉ စႇထၪ့လၧအခံၫ့အနီၪ လၧအၥၭဆုးလီၩ့ဖၧၩ့ အီၪက့ၪပဲၩထၬဝ့ၫ လန့လၧၫ့ဘၪနီၪလီၫႉ အဝ့ၫယီၩ လၧအၥၭအီၪ (၃၆) နံၪ့အခံၫ့နီၪ ကဲၪထၪ့ မံၭထၭမုၪလဂၩဂီၩ့ အၪ့န့ထၪ့ အမံၩ့လၧ Olalla del Si de Mariaနီၪလီၫႉ အဝ့ၫယီၩ ဖီၩ့ခွံၬနံၪ့လံနံၪ့ခိၩဒၪအိၩ မွဲကမိကဲၪဘၪ မံၭထၭမုၪ အဆၧကဲၪလါနၫ့ ထီမုကနံၩယီၩမၬ ထုၬဖျီၪထၪ့ လီၩဝ့ၫဒၪနီၪလီၫႉ Olalla ယီၩ ကဲၪထၪ့ မံၭထၭမုၪလဂၩဂီၩ့ စံၭဝ့ၫဒၪနီၪ ဆၧလၧဆၧဂၩ့ဒီၩ့မုၪလဂၩ အဆၧကဲၪနီၪ ပြၧၩ့လိၬၥၭ အၪမၬဒ့ၭနီၪလီၫႉ လကၭဒံၭဘၪ ၦၡၩၥံၪအၪ့အူၭအီၪဝ့ၫၥိၭ လနၩ့နၩ့နီၪ အၥၭစီၪဆံၭၥၭ အီၪဝ့ၫဒၪနီၪလီၫႉ မွဲဆၧနီၪ အဝ့ၫဒၪယီၩ အၥၭလုၬလၧ ဆၧဂၩ့ဒီၩ့မုၪ အဆၧကဲၪဂီၩ့ မိကဲၪဝ့ၫလၧ ၦအမၩထၪ့ထီၫ ၦမုၪၥံၪ အဆၧလူၬဒိၪဎွ့ၩဒိၪလဂၩအကၠီၩ့ ယရၩလၩ့န့အ့ၪဘၪနၥံၪ Olalla အဂဲးနီၪ ထၨၪယီၩနီၪလီၫႉ အဲၪကွံၩဘၪထၧၫ့ဖုဝဲ ထံၩၥိၭထီးအလူၬ မွဲကဆါယွၩ ဆိၪဂ့ၩဆိၪဘွၩလါနၥံၪဆံၭႉ