ၦဆံၫ့ဎံၪ လူၫစံၫ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုၪခွၫလၧအအီၪအနိၪ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪနီၪ မွဲဝ့ၫဒၪ ၦဆံၫ့ဎံၪ လူၫစံၫအဂဲးအကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭ ထီးအလူၬၥံၪဧ့ႇ ၦဆံၫ့ဎံၪ လူၫစံၫယီၩ အၥုၪ့ဆၧၩ့ၥၭဆၧၩ့အီၪဂီၩ့ လၩ့အဲၪလၩ့ကွံၩဝ့ၫ မွဲဝ့ၫဒၪ ၦမုၪနၩ့လဂၩနီၪလီၫႉ လၧခးရိမၫ ဆၧမၩနၧၩ့မၩစၪ အခံၫ့အခၫ အဘိၩ့အဘၭဖၧၩ့ ၦဆံၫ့ဎံၪ လူၫစံၫယီၩ အီၪလၧ ခး (Italy) (Sicilly) ကျိၩ့နီၪလီၫႉ အဝ့ၫအဖါဖါနီၪ မွဲဝ့ၫ ဆၧကဲၪဒိၪ ဆၧဘိၪ့ဆၧဘၩဂူဂၩလဂၩနီၪလီၫႉ အဝ့ၫအၥၭအီၪ ဎူၫနံၫ့နီၪ အဖါဖါၥံၪဖီၩ့ခွံၬဝ့ၫဒၪနီၪလီၫႉ ၦဆံၫ့ဎံၪ လူၫစံၫဒဲ အမိမိနီၪ မွဲဝ့ၫ ကၭၥလ့ၬ ဆၧအီၪကီၪ့ဖိၪၥံၪနီၪလီၫႉ အဝ့ၫအထၧၫ့ဖိၪမိနံၫဂၩနီၪ လ့ၩဒၪ ဆၧအီၪကီၪ့ဖိၪၥံၪလၧ ဝံး (Sicilly) ဖၧၩ့ ခိၭမၬခိၭမၬနီၪလီၫႉ အဝ့ၫၥံၪ ဘၪလ့ၩဘၩကၠဲၬလၧ လဲၪ့အိၩဖၧၩ့နီၪလီၫႉ ဆၧလၧအခံၫ့အခၫနီၪ ၦၡၩအမုၪၥံၪ ဘဲၫၥိၭၦဆံၫ့ဎံၪလူၫစံၫ ထ့ဖျါအထီ ကဒီၪ့နီၪ ထၪ့ၡါဝ့ၫဒၪနီၪလီၫႉ လါနၫ့ဂ့ၩႇ ၦဆံၫ့ဎံၪလူၫစံၫနီၪ ကထၪ့ၡါအဂး အၥၭလုၬလအီၪဘၪနီၪလီၫႉ ၦဆံၫ့ဎံၪလူၫစံၫယီၩ ကဆါဎြံၬအဂး အီၪဝ့ၫဒၪလၧမုၪနၩ့ၥံၫ့ဆ့ၭနီၪလီၫႉ အဝ့ၫရွံထၪ့ဖၧၩ့ၥၭအယီၩဂီၩ့ အဝ့ၫအၥၭခံဖၧၩ့ ဆၧမုၬဆၧလၩ အီၪဝ့ၫဒၪနီၪလီၫႉ အဝ့ၫအၥၭခံဖၧၩ့ အဲၪကဆါကၠဲၬအၪမၬလ့ၬအကၠီၩ့ ကယဲဘၪဒၪ ဆၧကၪဆၧဂဲၩ ကဒီၪ့နီၪ ထိးဆၧၫ့ဝ့ၫလၧ ဆၧအဲၪဆၧကွံၩဖၧၩ့နီၪလီၫႉ

လယံၭလမီးဘၪ အဝ့ၫအမိမိနီၪ ကဒုၭထၪ့ၡါအဝ့ၫလၧ ဆၧဘိၪ့ဆၧဘၩဂူဂၩဖိၪလဂၩနီၪ အဝ့ၫၥ့ၪယၫတၭ အၥၭခံဖၧၩ့ ဆၧမုၬဆၧလၩ လအီၪလၧၩ့ဘၪနီၪလီၫႉ လါနၫ့ဂ့ၩ အဝ့ၫမၩၥ့ၪယၫ အမိမိ နးမံၩ့အ့ၬဂီၩ့ အီၪဝ့ၫဒၪ ကစူၩယၫနီၪလီၫႉ ဘၪမနီၪလဲၪစွါဘဲၫ အဝ့ၫအမိမိနီၪ ဘၪထိးဆၧဆၫ အနံၫ့အၪမၬလ့ၬအကၠီၩ့နီၪလီၫႉ ၦဆံၫ့ဎံၪ လူၫစံၫယီၩ ကဘၠၩ့အမိမိအဆၧဆၫအဂး အၪ့က့ၩအၪ့ယၫဝ့ၫလၧ ၦဆံၫ့ဎံၪ (Agatha) အီၪနီၪလီၫႉ လခဲၫ့ကနံၩ ၦဆံၫ့ဎံၪလူၫစံၫအမိမိနီၪ လ့ၩလၧၦဆံၫ့ဎံၪ (Agatha) အလိးအိၩဂီၩ့ အၪ့က့ၩဘၪဆိၪဖၪဝ့ၫ အမိမိအဆၧဆၫ ကဘျၪအဂးနီၪလီၫႉ အဝ့ၫအၪ့က့ၩဘၩဆိၪဖၪဆၧအခံၫ့နီၪ ၦဆံၫ့ဎံၪ (Agatha) နီၪ မၩထၪ့ဖျီၪအၥၭလၧ အဝ့ၫအမ့ၬယၫဂီၩ့ လီၩအဝ့ၫဒၪနီၪ လယံၭလမီးဘၪ ဝံး (Sicilly) အဂး နကကဲၪထၪ့ ဆၧလၩဆၧဖၩ့ဖိၪလဂၩနီၪလီၫႉ စထၪ့လၧအခံၫ့နီၪ ၦဆံၫ့ဎံၪလူၫစံၫယီၩ ကဘၪထၪ့ၡါလၧ ဆၧဘိၪ့ဆၧဘၩလအီၪဘၪၦခွၫနီၪ အီၪထီခွံၬဝ့ၫဂီၩ့ အမိအဖါ အဆၧကဲၪဒိၪကဲၪမု ကယဲအအီၪနီၪ အၪ့နၩ့လၩ့အ့ၪ ၦအၡၪ့ဖိၪၥံၪ ထီးအလူၬနီၪလီၫႉ အဝ့ၫအမိမိနီၪ ထိးဆၧၫ့အဝ့ၫ အဆၧမၩနီၪလီၫႉ လါနၫ့ဂ့ၩ ဆၧဘိၪ့ဆၧဘၩလအီၪဘၪလဂၩနီၪ ထိးဆၧၫ့ဝ့ၫလန့ဘၪနီၪလီၫႉ ဘၪမနီၪလဲၪစွါဘဲၫ အဝ့ၫအ့ၪအီၪဎုၬဘၪလၧ ၦဆံၫ့ဎံၪလူၫစံၫစွါဘဲၫ ကန့ဘၪအဝ့ၫ အဆၧကဲၪဒိၪကဲၪမု ထီးအလူၬနီၪအကၠီၩ့ ဆီၫ့မီၪ့ထၬဝ့ၫနီၪလီၫႉ

လခဲၫ့ကနံၩနီၪ ဆၧဘိၪ့ဆၧဘၩလအီၪဘၪၦၡၩလဂၩနီၪ ဂဲၫထီၩ့လၧ ၦဆံၫ့ဎံၪလူၫစံၫ အဂံၪ့မ့ၬယၫနီၪလီၫႉ ၦဆံၫ့ဎံၪလူၫစံၫယီၩ ဂဲၫစဲၪ့လၫ့လၧ ဆၧပျၩ့ဂီၩ့ လီၩအဝ့ၫနီၪ မွဲဝ့ၫဒၪ ယကထၪ့ၡါအဂး ၦၡၩအၥၭဘၪလၩ့ဎိၭထၬ လအယၧၩအီၪဝ့ၫဒၪအကၠီၩ့ လီၩၥ့ၪယၫဝ့ၫဒၪနီၪလီၫႉ အွံၪၥၭဆၧၩ့ ထဲၩ့စဲၪ့လၫ့လၧ ယဂံၪ့မ့ၬယၫနီၪလီၫႉ ၦဆံၫ့ဎံၪလူၫစံၫ လီၩဆၧယီၩဂီၩ့ လယံၭလမီးဘၪ ၥုၭဖိၪၥံၪ ဂဲၫထီၩ့လၧအဝ့ၫအဂံၪ့မ့ၬယၫဂီၩ့တၭ ထဲၩ့ဖီၪ့န့အဝ့ၫနီၪလီၫႉ လကၭဒံၭဘၪ မၩနၧၩ့မၩစၪ အဝ့ၫဂီၩ့ ၥိၫ့စိၩဝ့ၫလၧ စဎွၩအီၪအလးနီၪလီၫႉ

စဎွၩလီၩဘၪ ၦဆံၫ့ဎံၪ လူၫစံၫနီၪ နလဘၩဘၪ ပကၠဲၬနီၪ ပကမၩဂၭဂီၩ့ နဆၧဆံၫ့ဖျ့ၪအဂး ပက ၥိၫ့စိၩနၧၩနီၪလီၫႉ ၦဆံၫ့ဎံၪလူၫစံၫလဂၩ နါဂၧၫ့ ဆၧချဲၩ့ယီၩတၭ ၥၭမဲၫ့ဝ့ၫနီၪလီၫႉ လါနၫ့ဂ့ၩ အဝ့ၫအဆၧၥၭမဲၫ့နီၪ အီၪၥူၪထၬဝ့ၫဂီၩ့ လီၩထဲၩ့ စဎွၩဆၧချဲၩ့ကမံၩ့နီၪ မွဲဝ့ၫဒၪ ဆၧလၧဆၧဒဲၭဘၭနီၪ ပၥၭလုၬလအီၪဘၪ ပမိၡါနီၪ မၩဆၧဒဲၭ ဘၭ လၥ့ၪဘၪနီၪလီၫႉ စထၪ့လၧအခံၫ့နီၪ ၥုၭဖိၪလံဂၩနီၪ ကလ့ၩၥိၫ့ ၦဆံၫ့ဎံၪ လူၫစံၫလၧ ၦၡၩမၩ ဆၧဒဲၭဘၭအလး လ့ၩလၧအဝ့ၫအမ့ၬယၫဂီၩ့ ကၠူၭစဲၪထုၬလၫ့ အဝ့ၫနီၪလီၫႉ လါနၫ့ဂ့ၩ ၦဆံၫ့ဎံၪ လူၫစံၫ အဆၧဘၩဆိၪဖၪနီၪ အဂဲးဆီၪ့ဝ့ၫဒၪအကၠီၩ့ ၥုၭဖိၪၥံၪ ကၠူၭထၪ့အဝ့ၫ လန့ဘၪနီၪလီၫႉ လကၭဒံၭဘၪ လီးဆရၫၥံၪလဖၪ မၩဝ့ၫလၧ လီးကိၪ့ၥ့ၪ လန့ဘၪနီၪလီၫႉ လခဲၫ့ထုၬနီၪ ၥုၭဖိၪၥံၪလဖၪ ဎူထၪ့အဝ့ၫလၧ မ့ၪအခံၫ့နီၪ အဝ့ၫအၪ့က့ၩဘၩဆိၪဖၪဆၧလၧ ကဆါကၠဲၬအီၪနီၪလီၫႉ လခဲၫ့ထုၬနီၪ ၦၡၩလဂၩနီၪ ဆ့ၭအဝ့ၫလၧဒီၩတၭ ၦဆံၫ့ဎံၪလူၫစံၫလဂၩ ၥံၪဖီၩ့ခွံၬဝ့ၫဒၪနီၪလီၫႉ ၦဆံၫ့ဎံၪလူၫစံၫယီၩ အၥၭဆံၭ လါနၫ့ဂ့ၩ ကဆါကၠဲၬအဂး ထိးၥံၪအၥၭ ဘၧၫ့ဝ့ၫဒၪအကၠီၩ့ ယရၩလၩ့န့အ့ၪဘၪ နၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ ကဆါယွၩ အဆၧဆိၪဂ့ၩဆိၪဘွၩ လၩ့ယွၩဝ့ၫဒၪလၧ နၥံၪအဖၫ့ခိၪလါဆံၭႉ