အီၪပဒၩ့ထၬ ၦလၧဆၧယိလါ လအီၪဘၪၥံၪအဂး ၦဆံၫ့ဎံၪ ရံတၩအဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုၪခွၫလၧအအီၪအနိၪ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪနီၪ မွဲဝ့ၫဒၪ အီၪပဒၩ့ထၬ ၦလၧဆၧယိလါ လအီၪဘၪၥံၪအဂး ၦဆံၫ့ဎံၪ ရံတၩအဂဲး အကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၦဆံၫ့ဎံၪ ရံတၩယီၩ အီၪဖျဲၪလၧ ခး(Italy) နံၪ့ ၁၃၈၁နံၪ့နီၪလီၫႉ လၧအခံၫ့အခၫနီၪ (Italy)ခး ဖိၪၥၪလဖၪ ဘၪဒၪ ဆၧကၪဆၧဂဲၩအခံၫ့နီၪလီၫႉ လါနၫ့ဂ့ၩ ၦဆံၫ့ဎံၪ ရံတၩ အမိမိဒဲအဖါဖါနီၪ အီၪလၧ ကၠဲၬလူကၠဲၬဂဲးဂီၩ့ ဆၧဒူၩဆၧယးအဖၧၩ့ အၪ့လုလၩ့ထၬအဝ့ၫအကၠီၩ့ အဝ့ၫဎိၩထၪ့ဘၪ ဂ့ၩဂ့ၩဘၪဘၪနီၪလီၫႉ ၦဆံၫ့ဎံၪ ရံတၩယီၩ ဘၪဖီလံၬအဂး အၥၭဆုးလီၩ့အီၪ အၪမၬလ့ၬနီၪလီၫႉ အဝ့ၫဖီ လံၬစီၩ့နီၪ မွဲဝ့ၫ ကဆါဎြံၬ ဘၪထိးဆၧၡၪ့ဆၧနၭႇ ဘၪထိးၥံၪၥၭလၧ ထုၪ့စူၪယၫအဂဲးအကၠီၩ့နီၪလီၫႉ ၦဆံၫ့ဎံၪ ရံတၩယီၩ အၥၭလုအီၪ ကမိကဲၪ ကဆါဎြံၬ အဎီးအၡၩလၧ မံၭထၭမုၪၥံၪ အကၠီၩ့နီၪလီၫႉ လါနၫ့ဂ့ၩႇ အဝ့ၫအမိမိအဖါဖါနီၪ အၥၭဘၪလၩ့ဎိၭ လအီၪဘၪအကၠီၩ့နီၪလီၫႉ လယံၭလမီးဘၪ အဝ့ၫအမိမိအဖါဖါနီၪ ဒုၭထၪ့ၡါအဝ့ၫလၧ ၥအုၭၥကၠၩ့အီၪ ၦခွၫလဂၩနီၪလီၫႉ

စႇထၪ့လၧ ကနံၩနီၪ ၦဆံၫ့ဎံၪ ရံတၩလဂၩ ဘၪထိး ဆၧၡၪ့ဆၧနၭႇ ဆၧကၪဆၧဂဲၩနီၪလီၫႉ အဝ့ၫအၦခွၫနီၪ ဒိၪထးအဝ့ၫ ကိၭနံၩဒ့ၭနီၪလီၫႉ ဆၧနီၪအကၠီၩ့ ၦဆံၫ့ဎံၪလဂၩ လ့ၩလၧကဆါကၠဲၬ အမ့ၬယၫဂီၩ့ မ့ၬထံၫမ့ၬနီၫ့လၩ့ အၪ့ကံၩ့ဘၩဆိၪဖၪဝ့ၫလၧ ကဆါကၠဲၬအီၪနီၪလီၫႉ အဝ့ၫဘၩဆိၪဖၪဆၧ ခိၭမၬခိၭမၬအကၠီၩ့ လယံၭလမီးဘၪ အဝ့ၫအၦခွၫ အၥအုၭၥကၠၩ့ အီၪကဒီၪ့နီၪ အၪ့လဲၩထၪ့ၥၭလၧ ဆၧဂ့ၩဆၧဘွၩနီၪလီၫႉ ၦဆံၫ့ဎံၪ ရံတၩလဂၩ အၥုၪ့ဎွံၪၥၭမုၬ အီၪအၪမၬလ့ၬနီၪလီၫႉ လါနၫ့ဂ့ၩ အဝ့ၫအီၪဘၪလၧ အၦခွၫ မုၬမုၬလၩလၩ ကဖျၭဂီၩ့တၭ အဝ့ၫအၦခွၫနီၪ ဘၪထိးမၩၥံၪၥၭနီၪလီၫႉ လယံၭလမီးဘၪ အဝ့ၫအဖိၪခွၫ နံၫဂၩနီၪ ၥံၪဖီၩ့ခွံၬဝ့ၫဒၪနီၪလီၫႉ ၦဆံၫ့ဎံၪ ရံတၩလဂၩ ဘၪဒၪ ဆၧၡၪ့ဆၧနၭ အမံၩ့မံၩ့နီၪလီၫႉ အဝ့ၫလ့ၩလၧ ၥရိၭဖၧၩ့ဂီၩ့ ယိထၪ့ကဆါယွၩ ဘၪထိးၥံၪၥၭလၧ ထုၪ့စူၪယၫနီၪဂီၩ့ ဘၩဆိၪဖၪဝ့ၫတၭ အဝ့ၫအမ့ၬၥဒၧၩ့ ဆၧဆၫထၪ့ဖျီၪ ဘိၩ့ယီၩနီၪလီၫႉ ၦဆံၫ့ဎံၪ ရံတၩလဂၩ ၥၭအုၭၥၭလၩ့ ဘၪအီၪထး ကဂၩလီၫနီၪလီၫႉ ၦဆံၫ့ဎံၪ ရံတၩယီၩ ၦၡၩမၩၥံၪအၦခွၫ လဖၪၥံၪ အဆၧဒဲၩဘၭနီၪ ကွဲၪဖျါခွံၬဝ့ၫန့ လါနၫ့ဂ့ၩ အၦခွၫ ဘၪထိးၥံၪၥၭ ဆၧကဲၪထၪ့အဂဲးနီၪ ၥၭနၪ့ဝ့ၫ လန့ဘၪအကၠီၩ့နီၪလီၫႉ လယံၬလမီးဘၪ အဝ့ၫကမိကဲၪ့ထၪ့ မံၭထၭမုၪ လဂၩအကၠီၩ့ အၪ့က့ၩဝ့ၫလၧ St. Augustine အခရၧၫ့ မံၭထၭမုၪ အခိၪအနါ အီၪနီၪလီၫႉ လါနၫ့ဂ့ၩ ၦဆံၫ့ဎံၪ ရံတၩယီၩ မွဲဝ့ၫ ၦထၪ့ၡါမုၪလဂၩအကၠီၩ့ လထိးဆၧၫ့ဘၪဝ့ၫနီၪလီၫႉ လခဲၫ့ကနၩနီၪ ၦဆံၫ့ဎံၪ ရံတၩလဂၩ လ့ၩထီၩ့လၧ မံၭထၭမုၪၥံၪ အကၠီၩ့ဖၧၩ့နီၪလီၫႉ မံၭထၭမုၪၥံၪ ဒၪဘၪအဝ့ၫနီၪတၭ ဖးထၪ့ဝ့ၫနီၪလီၫႉ အဝ့ၫၥံၪ ဆီၪ့မီၪ့ဝ့ၫ ဆၧအယီၩနီၪ ကမွဲကဆါဎြံၬ အစီၩ့အမၩ့ႇ အလၩအဖၩ့အကၠီၩ့နီၪလီၫႉ စႇထၪ့လၧအခံၫ့နီၪ (St. Augustine) အခရၧၫ့ မံၭထၭမုၪ အခိၪအနါနီၪ ထိးဆၧၫ့ ၦဆံၫ့ဎံၪ ရံတၩနီၪလီၫႉ လယံၬလမီးဘၪ ၦဆံၫ့ဎံၪ ရံတၩလဂၩ အုၩ့လၩ့ လဆိၩယၫဂီၩ့ ကဲၪထၪ့ မံၭထၭမုၪလဂၩနီၪလီၫႉ

စႇထၪ့လၧ မုကနံၩနီ အဝ့ၫအမ့ၬၥဒၧၩ့ ဆၧဆၫနီၪ ဂဲၫဎိၩထၪ့ဝ့ၫဒၪနီၪလီၫႉ လကၭဒံၭဘၪ အဖၩ့လးနီၪ အထံၫထၪ့ဂီၩ့ နၧၫ့အုၪနီၪလီၫႉ ဆၧနီၪအကၠီၩ့ အၥိၭမုၪ မံၭထၭမုၪၥံၪလဖၪနီၪ စဲၪ့ဖီၩ့ခွံၬလၧ အဝ့ၫယဲၩ့ယဲၩ့နီၪလီၫႉ ၦဆံၫ့ဎံၪလဂၩ လ့ၩဘိၪ့ထၪ့ဘၩထၪ့ၡီၩ့ယွါ အခံၫ့အခၫနီၪ အဝ့ၫအမ့ၬၥဒၧၩ့ အဖၧၩ့လးနီၪ ဘျၪ့ထဲၩ့ဝ့ၫဒၪနီၪလီၫႉ လါနၫ့ဂ့ၩ ဂဲၫထဲၩ့ထီးလၧ ကၠီၩ့အခၫ အဖၧၩ့လးနီၪ ဂဲၪထၪ့ဖျီၪနီၪလီၫႉ အဝ့ၫဘၪထိးဆၧဆၫ (၁၅) နံၪ့ အီၪလမုၬဘၪ ၥၧၫ့နံၪ့ဂီၩ့တၭ နံၪ့ (၁၄၅၇) နံၪ့ လၩမ့ၫ (၂၂) ၥၫ့နီၪ ၥံၪဖီၩ့ခွံၬဝ့ၫဒၪနီၪလီၫႉ အဝ့ၫၥံၪဂီၩ့တၭ ၥရိၭဖၧၩ့ ဒိၩ့လွ့ၫနီၪ ၦၡၩဆ့ၬနၩ့ဂၩအ့ၬလါနၫ့ အလူၥီၫ့ထၪ့ဝ့ၫဒၪနီၪလီၫႉ အဝ့ၫမံၫထးဒူၭနီၪ ဆၧဖၩ့ဂိး ဖျီၪထၪ့နီၪလီၫႉ အဝ့ၫအီၪထၬ ဒူၭဖၧၩ့နီၪ နၧၩ့မၧၫ့ဂီၩ့ အဝ့ၫအမ့ၬအနၪနီၪ အဖံၭအယၫၥံၪစီၪ့ လၩ့ဘၪ့ဝ့ၫဒၪနီၪလီၫႉ အဝ့ၫၥံၪဂီၩ့ မၩထၪ့ဖျီၪ ဆၧစီၩ့ဆၧမၩ့ ခိမၬခိမၬနီၪလီၫႉ

ၦဆံၫ့ဎံၪ ရံတၩယီၩ ၦၡၩလၧ ဆၧယိလါ လအီၪလၧၩ့ဘၪကဒီၪ့ ဆၧဒိၭနဲၩ့အဂး ရွံထၪ့ဝ့ၫ မွဲဝ့ၫဒၪ ၦဆံၫ့ဎံၪလဂၩနီၪလီၫႉ အဝ့ၫအၦခွၫ အၥုၪ့အုၭၥၭအုၭ အီၪလၧ အဝ့ၫအဖၫ့ခိၪ အၪမၬလ့ၬလါနၫ့ အဝ့ၫအဆၧဘၩဆိၪဖၪအဂဲးဆီၪ့အကၠီၩ့ အၦခွၫ အခၨၬ အၪ့လဲၩထၪ့ၥၭနီၪ ပကဘၪအၪ့န့ထီးထၭ ကိၭဂၩဒ့ၭနီၪလီၫႉ အ့ၪပဒိၭနဲၩ့ၥၭလၧ ကဆါဎြံၬအီၪစွါဘဲၫ လကဲၪထၪ့ဘၪ အီၪနးမံၩ့အ့ၬအကၠီၩ့ ၦဆံၫ့ဎံၪ ရံတၩ လီၩထၬဝ့ၫအီၪဝ့ၫဒၪ ဘဲၫယီၩအဂဲး ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ ကဆါဎြံၬ အဆၧအဲၪဆၧကွံၩ လၩ့ယွၩဝ့ၫဒၪလၧ နၥံၪကိၭဂၩဒ့ၭ အဖၫ့ခိၪလါဆံၭႉ