S.F.X မံၭထၭမုၪလဖၪဒိၭန့ ဆၧအုၩ့လၩ့အဆိၪထုၬဒဲ ဆၧအုၩ့လၩ့လဆိၩယၫအဂဲး

၂၀၂၃နံၪ့ လၩဖ့ၫဘြူၫအ့ၫရံၫ၁ၥၫ့ လဂီၩ၆နၩရံၫခီၫအခံၫ့နီၪ S.F.X မံၭထၭမုၪလဖၪ ထိးဆၧၫ့ဒိၭန့ဆၧအုၩ့ လၩ့အဆိၪထုၬဒဲ ဆၧအုၩ့လၩ့လဆိၩယၫ ဆၧဎိၭထံၪဎိၭဒီၪအီၪဝ့ၫဒၪလၧ ဝံးပၥံၫ့ St.Peter Cathedral လးဝၩ့ဖၧၩ့ နီၪလီၫႉ
ၦလၧအထိးဆၧၫ့ဒိၭန့မံၭထၭမုၪအဆၧကဲၪနီၪ ကနံၪ့ယီၩအီၪဝ့ၫဒၪ၂ဂၩနီၪလီၫႉ ၦလဖၪနီၪ မွဲဝ့ၫဒၪလၧ Sr.Helenနးဆၩ့ဘွၩ ဒဲ Sr.Mary နန့်နိုင်နိုင်ဝင်းနီၪလီၫႉ ဂီၩ့နီၪၦလၧအထိးဆၧၫ့ဒိၭန့ ဆၧအုၩ့လၩ့လဆိၩယၫ အီၪဝ့ၫဒၪမံၭထၭမုၪ၈ဂၩနီၪလီၫႉ ၦလဖၪနီၪမွဲဝ့ၫဒၪ Sr.Mary Ida Lin Lin Khaing, Sr.Stella Mu Yar Soe, Sr.Stella Pee Pi Moe, Sr.Cynthia Kyi Pya Aye, Sr.Martha Mary, Sr.Elizabeth Bade Zawng Naw, Sr.Theresa Bum Sin Seng Nan ဒဲ Sr.Cecillia La Mai Doi Ra နီၪလီၫႉ ၦလၧအလ့ၩခိၪလ့ၩနါ မံ ဆၩဆၧလုထၪ့နီၪ မွဲဝ့ၫဒၪလၧ ၥၫ့ခိၪဒိၪ Bp.Justin စောမင်းသိုက်နီၪလီၫႉ လၧမံဆၩဆၧလုထၪ့ယီၩအဖၧၩ့ ၥၫ့ခိၪ ဒိၪ ဂဲၫထၪ့ဖ့ၪဂဲးဖ့ၪဘၭဝ့ၫဒၪ၄ဂၩနီၪလီၫႉ ၥၫ့ခိၪဒိၪလဖၪနီၪမွဲဝ့ၫဒၪ ဝံးတခိၩ့ကၭၥလံၬဆၧအီၪကီၪ့ ၥၫ့ခိၪဒိၪBp. Noel, မော်လမြိုင်ကၭၥလံၬဆၧအီၪကီၪ့ Bp.Maurice Nyut Wai, ထအၫ့ကၭၥလံၬဆၧအီၪကီၪ့ Bp.Justin စောမင်းသိုက် ဒဲ ပြည်ကၭၥလံၬဆၧအီၪကီၪ့ Bp.Alexander Pyone Choနီလီၫႉ
ၦလၧအဒိၭန့မံၭထၭမုၪအဆၧကဲၪSr.Helen နးဆၩ့ဘွၩ ဒဲ Sr.Mary နန့်နိုင်နိုင်ဝင်းနီၪ မွဲဒိၭန့ဘၪ မံၭထၭမုၪအဆၧကဲၪ လၧဒိၩ့ပၥံၫ့ဆၧအီၪကီၪ့Administrator Fr.Henry Ei Khlein အစူၪဖၧၩ့နီၪလီၫႉ
မံဆၩဆၧလု ထၪ့အဖၧၩ့ ၥၫ့ခိၪဒိၪBp.Maurice Nyut Wai လီၩလၩ့လၬလၩ့ဝ့ၫဒၪ “ပရွံထၪ့ၦအဆံၫ့အဎံၪ ဆၧၥၭမၧၫ့ယီၩဂီၩ့အခၫ ပခၫထၪ့ဝ့ၫဒၪကိၭခၫဒ့ၭနီၪ ပဘၪယိခၫဝ့ၫဒၪလီၫႉ အ့ၪမွဲပခၫထၪ့ပခၪ့လး ဘၪမၪဝ့ၫဒၪ ကခၫစွါဘဲၫ ပဘၪအီၪက့ၪထးခွံၬ ပဆၧၥၭမၧၫ့ယီၩၥ့ၪဝ့ၫဒၪလီၫႉ မံၭထၭမုၪလဖၪယီၩ ဘၪအုၩ့လၩ့ထိးဆၧၫ့အၥၭ ဆၧအုၩ့လၩ့၃မံၩ့နီၪလီၫႉ ဆၧၡၪ့ဆၧယၬႇ ဆၧခိၭနၪ ဒဲ ဆၧဆံၫ့ဎံၪ ဆၧအုၩ့လၩ့၃မံၩ့ယီၩ ပကထဲၩ့မၩထၪ့အဂးနီၪ မွဲလယီၫဘၪဒဲကၪဂဲၩဝ့ၫဒၪလီၫႉ ၦအဆံၫ့အဎံၪဆၧၥၭမၧၫ့အဆၧအုၩ့လၩ့ အ့ၪမွဲလဘံၪ့လၩ့ဘၪကကၠၪ ဆၧၥၭမၧၫ့အ ခံအလဲၫလဖၪ မွဲကဂၭဂီၩ့ဆိၫ့ခွံၬဝ့ၫဒၪလီၫႉ အၡါမၪၦအဆံၫ့အဎံၪအဆၧၥၭမၧၫ့နီၪ မွဲဝ့ၫဒၪ အီၪလၧဖၧၩ့ဖံၭဖၧၩ့ ထီၫၥံၪ စ့ၩၥံၪနီၪလီၫႉ ၦအဆံၫ့အဎံၪဆၧၥၭမၧၫ့နီၪ မွဲကြၨၭလၧပၧၩအကၠီၩ့ ပန့ဘၪလမွဲဘၪတၭ မွဲဒၪယွၩအဆၧယၫ့ၥၭအကၠီၩ့ ပန့ဘၪနီၪလီၫႉ ဖၧၩ့ဖံၭနီၪဘဲၫၦၡၩဘၪဖိၭလိၭထၪ့လၧဖံၭဂ့ၩဂ့ၩဘၪဘၪအၥိၭ ပနးခီၫ့မိၡါဒဲနးၥၭယီၩဆ့ မွဲပဘၪဖိၭ လိၭထၪ့ဂ့ၩဂ့ၩဘၪဘၪနီၪလီၫႉ ပဆၧၥ့ၪဆၧဘၪ ဆၧကိၪ့ဘၪကိၪ့ၥ့ၪလဖၪနီၪ မွဲဒၪကဆါယွၩဖ့ၪလၫ့ထၬပၧၩ ခိၪဖၭ လဖၪနီၪလီၫႉ
ဆၧထယီၩယမိလီၩဘၪ ဖၧၩ့ထံၩ၄ဖျိၪ့အဂဲးနီၪလီၫႉ အဆိၪထုၬကဖျိၪ့နီၪ အဖၧၩ့ဖၧၩ့ဆၧအီၪနးမံၩ့အ့ၬ လါနၫ့ ဖိၭဘံၭထၬအၥၭႉ ဖၧၩ့ထံၩအယီၩနီၪ လၩ့ဂၬၦၡၩပၥ့ၪလဲၪစွါဘဲၫ အဆၧကိၪ့ဘၪကိၪ့ၥ့ၪအီၪနးမံၩ့အ့ၬ ၦၡၩကၥိၩ့အဝ့ၫ အဂး ဖ့ၪၥိၩ့ၦၡၩဧၪအ့ၬ မၩဆၧနးမံၩ့အ့ၬ လၩ့ဂၬဝ့ၫဒၪၦၡၩဘဲၫနီၪလဖၪလီၫႉ လခဲၫ့ဖၧၩ့ထံၩကဖျိၪ့နီၪ ထံၫအီၪဎွ့ၩၥၪဂီၩ့ ဖိၭဘံၭထၬအၥၭနီၪလီၫႉ ဖၧၩ့ထံၩအယီၩနီၪ လၩ့ဂၬၦၡၩလၧ အဆၧကိၪ့ဘၪကိၪ့ၥ့ၪအီၪဝ့ၫဒၪအၪမၬလါနၫ့ ထုၬထၪ့ၥိၩ့ အဆၧကိၪ့ၥ့ၪကိၪ့ဘၪလဖၪအ့ၬႉ စံၭလၩ့အၥၭ ယၧၩယီၩယဒိၭန့ထၬဆၧနဲၪ့လၩဖၩ့ ယဆၧကိၪ့ဘၪကိၪ့ၥ့ၪအီၪအၪမၬ ယလ့ၩထၪ့ထၬ ဆၧမၩလိၪလၧထံၪယဲၩ့ခးယဲၩ့ ၦၡၩလအိၭထိၭဘၪဆၧလဖၪယီၩအဂး ယထိးၥိၩ့ယၥၭနၧၩ့အ့ၬ စီၪဝ့ၫ ဘနီၪဂီၩ့ မၩဆၧနးမံၩ့အ့ၬႉ လခဲၫ့ထံၩ၃ဖျိၪ့ကဖျိၪ့နီၪဘိၭ လၧထံၩဖၧၩ့နီၪ ထံၫအီၪလဎွ့ၩဘၪလါနၫ့ ဝဲလၫ့ထၬအၥၭ နီၪလီၫႉ အယီၩနီၪလၩ့ဂၬဝ့ၫဒၪ ၦလၧအဆၧကိၪ့ဘၪကိၪ့ၥ့ၪ လအီၪနၬဘၪလါနၫ့ ၦၡၩအဂး ဘဲၫမၩဝ့ၫန့အၥိၭ လီၩ့ ဖ့ၪလၫ့မၩဆၧၩ့လၩ့အၥၭနီၪလီၫႉ လခဲၫ့ထုၬထံၩကဖျိၪ့နီၪ ထံၫအီၪဎွ့ၩၥၪဂီၩ့ ဝဲလၫ့ထၬအၥၭနီၪလီၫႉ အယီၩနီၪလၩ့ဂၬ ဝ့ၫဒၪ ၦၡၩလၧအဆၧကိၪ့ဘၪကိၪ့ၥ့ၪအီၪဝ့ၫဒၪ အလၧၫ့အဎွ့ၩဂီၩ့ ၦၡၩၥံၪအဂး ဖ့ၪလၫ့လၩ့အၥၭန့ဝ့ၫဒၪ ဂ့ၩဘၪစဲၪ ၦၡၩလဖၪနီၪလီၫႉ
ကနံၩယီၩပကဘၪအၪ့ဎၬလၩ့ထဲၩ့ပၥၭ ပပၫဝ့ၫဒၪလၧဖၧၩ့ထံၩထဖျိၪ့ဖျိၪ့အဖၧၩ့လဲၪႉ ပၧၩယီၩ ပကဘၪမွဲဝ့ၫဒၪ ဖၧၩ့ထံၩလၧ အလၧၫ့ဎွ့ၩလၧဆၧဂ့ၩဆၧဘွၩနီၪလီၫႉ အ့ၪမွဲပကဎွ့ၩလၩ့လၧ ဆၧအအၧၩ့လဖၪစွါဘဲၫ ဖၧၩ့ထံၩယီၩနီၪ မွဲက ဘၪထိးမၩထ့ဖၭအၥၭနီၪလီၫႉ ၦလၧအဘၪထိးရွံထၪ့အၥၭ လၧၦအဆံၫ့အဎံၪဆၧၥၭမၧၫ့လဖၪယီၩ ပဖၧၩ့ဖံၭနီၪ မွဲကဘၪဎွ့ၩလၩ့ဝ့ၫဒၪလၧ ဆၧအလူဒိၪဎွ့ၩဒိၪလဖၪဒဲ ကဘၪအီၪလၧယွၩလူယွၩထၫနီၪလီၫႉ ကဆါယွၩနီၪ မွဲအလူ ဒိၪဎွ့ၩဒိၪအီၪထုၬ ဆၧထူၭဆၧလၧၫ့ကမံၩ့ဒဲ မွဲဒံၭလၧဆၧၥၭထိၬပရၧၫ့ဒံၭနီၪလီၫႉ ဆၧနီၪအကၠီၩ့ ပန့ထၬဘၪ ဆၧထူၭ ဆၧလၧၫ့ယီၩ ထၧၫ့လဂၭဂီၩ့ဂၭစၪဘၪအဂး ပကဘၪပၧၩ့ထၬဂ့ၩဂ့ၩဘၪဘၪနီၪလီၫႉ ပခၫထၪ့ကိၭခၫဒ့ၭနီၪ ပကဘၪ ထုၪ့ပၥၭဂီၩ့ ပကဘၪဂၭဖၬတီၩတီၩလီၩ့လီၩ့နီၪလီၫႉ ဘၪန့လဲၪနီၪ အ့ၪပန့ထၬဘၪကဆါဎြံၬနီၪ မွဲပန့ထၬဘၪ ဆၧထီးအလူၬဒဲ အ့ၪပကဆါဎြံၬလၩ့မါခွံၬစွါဘဲၫ ဆၧထီးအလူၬနီၪ မွဲကဂၭဂီၩ့ဆိၫ့ခွံၬဒၪပၧၩနီၪလီၫႉ ဆၧနီၪအကၠီၩ့ ၦအဆံၫ့အဎံၪဖိၪကိၭဂၩ မွဲနၥံၪထဲၩ့ဘီၪ့န့ဘၪ နၥံၪအဎွံၪလၧ နၥံၪအဆဲၪ့ ကိၭဂၩဒ့ၭလါဆံၭႉ”
ဂီၩ့နီၪ SFX မံၭထၭမုၪခရၧၫ့ခိၪနါ Mother Ann Theresa နီၪစံၭဝ့ၫဒၪ “ကနံၩယီၩ ပန့ထဲၩ့ဘၪ မံၭထၭမုၪ အၥၫ့၂ဂၩအကၠီၩ့ ပစံၭခိးစံၭတၩဘၪမိဖါလဖၪ ဒဲ ၂၀၂၃နံၪ့ဖၧၩ့ယီၩ ပမံၭထၭမုၪၥံၪအီၪထၪ့ဝ့ၫဒၪ အဂၩ၄၅၁ဂၩယူၭ နီၪလီၫႉ ယစံၭခိးစံၭတၩဘၪ မံၭထၭမုၪကိၭဂၩဒ့ၭ အခိးတၩဆါလဖၪနီၪဒဲ ဘဲၫယီၩလၧပမံၭထၭမုၪလဖၪအကျၩ မံၭထၭမုၪလနၩ့နၩ့ အမိဖါဘူၭထံးလဖၪ ဘၪစဲၪ့အီၪဂူၪအၥၭလၧၡိၭကျၩ ဘၪဒၪဆၧၫ့ယၪ ဆၧၡၪ့ဆၧနၬ အၪမံၩ့အၪမၠိၩ အီၪဝ့ၫဒၪအၪမၬဒ့ၭအကၠီၩ့ လၧအဝ့ၫၥံၪကၠၧၫ့ကၠၧၫ့ မွဲပၥၭလမုၬဘၪနီၪလီၫႉ လၧ၁၂၆နံၪ့အထးဖၧၩ့ယီၩ ပSFX မံၭထၭမုၪခရၧၫ့ယီၩ လၧကဆါယွၩအအီၪ ပဂဲၫထဲၩ့ဒိၭန့ထၬဘၪအခိးအတၩအမံၩ့မံၩ့နီၪလီၫႉ ဘဲၫယီၩပခးပယၩ့ ဘဲၫကန့ထဲၩ့ဘၪ ဆၧဎူၫဆၧဎၩ့အဂးနီၪ ပမံၭထၭမုၪခရၧၫ့ယီၩ ကယဲပမၩန့နီၪ ပကျ့ၭစၨၭခိးဂဲးခိးဘၭဒဲ ခးပယၩ့ အဂး ကိၭနံၩဒ့ၭ ပဝံဖဲၫဆံၫ့ဎံၪ၅၀ဒဲ၂၀၀နီၪလီၫႉ ဆၧနီၪအကၠီၩ့ ယမိအၪ့ယၫဘၪ မိဖါဘူၭထံးလဖၪယီၩ ဘဲၫခး ပယၩ့ယီၩ ကဖီၩ့ဖျ့ၭလၧရၬဖၧၩ့ယီၩဖျဲၪဖျဲၪဒဲ ကလ့ၩထၪ့လ့ၩထီၫလၧယၫအဂး ကျ့ၭစၨၭအၪ့ကံၩ့ဘၩဆိၪဖၪဒဲ ကျ့ၭစၨၭ ခိးဂဲးခိးဘၭကၠၭလါဆံၭႉ ပမံၭထၭမုၪၥံၪယီၩ အ့ၪမွဲပဖျါလၩ့စိၩလၧ မိဆၧအီၪကီၪ့လးဝၩ့ဖၧၩ့အခၫ ဘဲၫဆၧမၩဆၧၩ့ လိၪဝ့ၫအၥိၭ ပဝ့ၫၥံၪယီၩ ပဖ့ၪဆၧၫ့လၩ့ထၬပၥၭနီၪလီၫႉ
ဆၧနီၪအကၠီၩ့ ယမိအၪ့ယၫဘၪ ၦဆူၩနဲၩဖိၪၥံၪနီၪ ဘဲၫပထံၪခးယီၩကမုၬလၩထၪ့ထဲၩ့အဂးနီၪ နၥံၪဆ့ နုၬလၩ့ပၫထဲးဎုၬလၧပၧၩလါဆံၭႉ မုကနံၩယီၩအဂး ယမိစံၭခိးစံၭတၩဘၪကဆါယွၩဒိၪဒိၪအၪအၪနီၪလီၫႉ ခးပယၩ့ အဖၧၩ့ မိဆၧအီၪကီၪ့ဖၭဒိၪ၁၃ဒီၪ့ဖၧၩ့ ဒဲ လၧထံၪယဲၩ့ခးယဲၩ့ ထံၪခးဖၭဒိၪ၄ထံၪခးဖၧၩ့နီၪ ပနုၬလၩ့ဖီၪ့ထၪ့ဖံၭထၪ ့ယွၩအဆၧမံၭဆၧမၩနီၪလီၫႉ လၧ ထိုင်း, ဖိလစ်ပိုင်, အီတလီ ဒဲ အမေရိက ထံၪခးဖၧၩ့နီၪ ပမံၭထၭမုၪ၃၈ဂၩ လ့ၩခိၪ လ့ၩနါဒဲ ဖီၪ့ထၪ့ဖံၭထၪ့ဆၧဖံၭဆၧမၩနီၪလီၫႉ မုကနံၩယီၩ ၦလၧအၥုၪ့အုၭၥၭအုၭလဖၪႇ ၦလၧဘၪအီၪဝံအီၩဆံၩ့လဖၪႇ ၦလၧဘၪဒၪ ဆၧနိၫ့ဆၧနၭလဖၪကၠၧၫ့ကၠၧၫ့ ပကကၧၩ့ဖျိၪ့ထၪ့ပၥၭဂီၩ့ ဘဲၫပဆၧထိထီၫ One With The Church အၥိၭ လၧဆၧယံၩဆၧၡီၩ့အဖၧၩ့ မွဲပကကျ့ၭစၨၭထၪ့ကၠၭလၧ ပခးပယၩ့အဂး လူၬဂဲးလူၬဘၭဆံၭနီၪဘိၭ ယအၪ့ယၫ ထၪ့ဘၪနၥံၪကိၭဂၩဒ့ၭနီၪလီၫႉ”
ဂီၩ့နီၪ ၦလၧအထိးဆၧၫ့ဒိၭန့ ဆၧအုၩ့လၩ့လဆိၩယၫ မံၭထၭမုၪလဖၪအကျၩ လဂၩမွဲဝ့ၫ Sr.Cecillia La Mai Doi Ra နီၪ စံၭဝ့ၫဒၪ “မုကနံၩယီၩ ၦလၧအကဲၪထၪ့မံၭထၭမုၪအၥၫ့Srနံၫဂၩ ဒဲ ၦလၧအထိးဆၧၫ့ဒိၭန့ ဆၧအုၩ့ လၩ့လဆိၩယၫSr၈ဂၩအလး ယမိစံၭဘၪနၥံၪ စံၭခိးစံၭတၩဒိၪဒိၪအၪအၪနီၪလီၫႉ လၧပဘၪဂဲၫထဲၩ့ခၫ့ဂၬခွံၬပဆၧ ၥၭမၧၫ့ထၧၫ့ဖျီၩ့ယၫအဖၧၩ့ ဘဲၫဆၧဘီၪဆၧယီၫအီၪအၥိၭ ဆၧကၪဆၧဂဲၩလဖၪဆ့ မွဲအီၪဝ့ၫဒၪလီၫႉ ပမံၭထၭမုၪလဖၪ အကျၩ ဂဲၫထဲၩ့ခၫ့ဂၬခွံၬဘၪ ဆၧၥၭမၧၫ့ယီၩ လၧဆၧဘီၪဆၧယီၫဖၧၩ့အကၠီၩ့ ဘဲၫအၥၭဎွံၪဝ့ၫဒၪအီၪအၥိၭ ဘၪဂဲၫထဲၩ့ ဒၪဆၧၫ့ယၫလၧ ဆၧကၪဆၧဂဲၩအကၠီၩ့ အၥၭဘၪအုၭဝ့ၫဒၪအီၪဝ့ၫအၪဂၩနီၪလီၫႉ ဆၧအဂ့ၩမွဲဂ့ၩ ဆၧအအၧၩ့မွဲဂ့ၩ ပ ဆၧၥၭမၧၫ့နီၪ မွဲပၥၭနၪ့ကန့အ့ၬႉ ပၥၭနၪ့လန့ဘၪမုနံၩ လဖၪအကျၩ ကနံၩယီၩဆ့ မွဲပၫဆ့နီၪလီၫႉ ၦလၧအဂဲၫထဲၩ့ ၥီၪ့ၥၫ့ပၧၩ, ၦလၧအဂဲၫထဲၩ့ဖ့ၪနဲၪပၧၩဖၧၩ့ၥၭ ပခိၪနါ Mother Ann Theresa ဒဲ ၦလၧအဘၪဂဲၫထဲၩ့ယိထဲၩ့ခွါထဲၩ့ပၧၩ ပခိၪနါၥံၪ ပဝဲမုၪမံၭထၭမုၪလဖၪ ဒဲ ပမိဖါဘူၭထံးလဖၪနီၪ မွဲပစံၭခိးစံၭတၩဘၪကိၭဂၩနီၪလီၫႉ မိဖါလၧအၥံၫဖီၩ့ခွံၬ လဖၪနးဆ့ မွဲထဲၩ့အီၪဘၪလၧမူၭခိၪဘၩ့မုး ၡူၪၡူၪဘၩဘၩန့ဒၪဝ့ၫအဂးဆ့ ယအၪ့ကံၩ့ဘၩဆိၪဖၪလီၫႉ မွဲကဆါယွၩ အဆၧဆိၪဂ့ၩဆိၪဘွၩလၩ့ဘၪလၧနၥံၪအဖၫ့ခိၪ ကိၭဂၩဒ့ၭလါဆံၭႉ”
မံဆၩဆၧလုထၪ့ယီၩ စၭထၪ့ဝ့ၫဒၪလၧလဂီၩ၆နၩရံၫခီၫဒဲ ဂီၩ့ခွံၬဝ့ၫဒၪလၧ၉နၩရံၫခီၫအခံၫ့နီၪလီၫႉ မံဆၩဆၧ လုထၪ့ဂီၩ့ဝ့ၫဒၪကကၠၪ ၥၫ့ခိၪဒိၪလဖၪႇ ၥၫ့မုၥၫ့ခၫလဖၪဒဲ မံၭထၭမုၪႇ မံၭထၭခွၫလဖၪ ဒိၪထဲၩ့ဆၧဂၩ့ဒဲ အီၪပထုၬခွံၬ မံၩဆၩဆၧလုထၪ့နီၪလီၫႉ လၧမံဆၩဆၧလုထၪ့ယီၩအဖၧၩ့ ၦထီးလူၬဂဲၫထၪ့ဝ့ၫဒၪကအီၪဖိၭဘိၭ အဂၩ၃၅၀ဘျဲၪ အဂဲး ပန့ဘၪဆၧပရၧၫ့ ဘဲၫယီၩအၥိၭနီၪလီၫႉ
နးအဲၪဖီၫဘွၩ
1.2.2023