သီရိလင်္ကာထံၪခးဖိၪကၭၥလံၬမံၭထၭမုၪလဂၩ ထိးဆၧၫ့ဒိၭန့ဘၪ ထံၪခး ဆၧနဲၪ့ခိၪဖၭအဂဲး

အီၪလၧ သီရိလင်္ကာထံၪခးကာမယ်လိုက်ခရၧၫ့ဖိၪ မံၭထၭမုၪလဂၩနီၪ ထိးဆၧၫ့ဒိၭန့ဘၪ၂၀၂၂နံၪ့ ထံၪခးဆၧ နဲၪ့ခိၪဖၭနီၪလီၫႉ မံၭထၭမုၪယီၩအမံၩ့နီၪ မွဲလၧ Mary Angelika နီၪလီၫႉ အဝ့ၫယီၩန့ဘၪဆၧနဲၪ့ခိၪဖၭနီၪမွဲလၧ ‘Guru Pra thiba Prabha’ နီၪလီၫႉ

ဆၧနဲၪ့ခိၪဖၭယီၩနီၪ မွဲဆၧကိၪ့ဘၪကိၪ့ၥ့ၪခၩ့ဒိၪဆၧမၩလးဖ့ၪလၫ့ဝ့ၫဒၪ ဆၧကိၪ့ဘၪကိၪ့ၥ့ၪအဂး မၩဝ့ၫကဲၪအဂ့ၩ ထုၬခိၪဖၭနီၪလီၫႉ ကိနံၪ့ဒ့ၭခိၪဖၭယီၩဖ့ၪလၫ့ဝ့ၫဒၪလၧ ခးၥဲၫထၧၫ့ဘံၪ့ယၪ ဆရၫလဖၪအဘိၪ့မုနံၩနီၪအကၠီၩ့ လၧမုကနံၩနီၪ မံၭထၭမုၪယီၩ ထိးဆၧၫ့ဒိၭန့ဘၪဝ့ၫနီၪလီၫႉ ဘၪဖ့ၪလၫ့ဝ့ၫခိၪဖၭယီၩအဆၧထိစိၩနီၪ ဘဲၫထံၪခးဖၧၩ့ ဆၧကိၪ့ဘၪကိၪ့ၥ့ၪ စီၩ့ ဂဲးကဒိၪထၪ့ထီၫထၪ့အဂး ကျ့ၭစၨၭၥီၪ့ၥၫ့ဝ့ၫဒၪအကၠီၩ့နီၪလီၫႉ

လၧဆၧဖ့ၪလၫ့ခိၪဖၭဆၧထံၪလၩ့ဒီၪလၩ့နီၪအဖၧၩ့ ကၠီးခိၪလဖၪဂဲၫထၪ့ဝ့ၫဒၪ ၄၅ဂၩဂီၩ့ လၧ၄၅ဂၩနီၪအကျၩ ကၭၥ လံၬကၠီးခိၪ ပၫဝ့ၫဒၪ ၄ဂၩနီၪလီၫႉ မံၭထၭမုၪ Sr.Angelikaနီၪ ဖီၪ့ထၪ့ဖံၭထၪ့ ဆၧဖံၭဆၧမၩလၧ ဆၧကိၪ့ဘၪကိၪ့ၥ့ၪ ဆၧမၩ လးဖၧၩ့ ကအီၪဝ့ၫဒၪ ဖိၭဘိၭ ၂၂နံၪ့ယူၭနီၪလီၫႉ ဘဲၫယီၩနီၪ အဝ့ၫကဲၪထၪ့ ကၠီးခိၪကအီၪဝ့ၫဒၪဖိၭဘိၭ၇နံၪ့ယူၭဂီၩ့ ဘဲၫယီၩ အဝ့ၫနီၪမွဲလၧ St.John Boscoဆၧမၩလိၪလးကၠီးခိၪကဂၩနီၪလီၫႉ

ဆၧမၩလိၪလးယီၩနီၪ မွဲၥီၪ့အ့ၪဝ့ၫလၧတာမီးရ် အလၨခီၫနီၪလီၫႉ လၧဆၧမၩလိၪလးဖၧၩ့နီၪ ဆရၫလဖၪ အီၪဝ့ၫ ဒၪအဂၩ၄၀ဂီၩ့ ဆၧမၩလိၪဖိၪလဖၪအီၪဝ့ၫဒၪဖိၭဘိၭ အဂၩ၁၀၀၀နီၪလီၫႉ ၦလၧအဘၪယိထဲၩ့ခွါထဲၩ့ဆၧမၩလိၪလးယီၩနီၪ မွဲကာမယ်လိုက်မံၭထၭမုၪလဖၪဂီၩ့ ဆၧမၩလိၪလးယီၩနီၪ ဘဲၫဆၧမၩလိၪဖိၪလဖၪ အတခ့ၭဖဝၭဒဲ အဆၧကိၪ့ဘၪကိၪ့ၥ့ၪ ကဒိၪထၪ့ထီၫထၪ့အဂးနီၪ အီၪက့ၪထၬဝ့ၫအကၧၩ့ဒိၪထုၬ ဆၧမၩလိၪလးကဖျိၪ့နီၪလီၫႉ

ထိးဆၧၫ့ဒိၭန့ဘၪ ဆၧနဲၪ့ခိၪဖၭယီၩနီၪ လၧကိၫဘံဆၧဆၫကဲၪ့ထၪ့ ၃နံၪ့အထးဖၧၩ့ ဘဲၫထံၪခးဆၧကိၪ့ဘၪကိၪ့ ၥ့ၪခၩ့ဒိၪထုၬထၪ့ထၬဝ့ၫၥနိၫ့လဖၪအၥိၭ ဎိၭထံၪဎိၭဒီၪအ့ၪ ဆရၫလဖၪႇ ဆၧမၩလိၪဖိၪၥံၪအမိအဖါလဖၪ န့ဝ့ၫဒၪ ဂ့ၩဂ့ၩဘၪ ဘၪအကၠီၩ့ႇ ဘၪထွ့ၪလၧ မံၭထၭမုၪယီၩအဆၧၥၭမၧၫ့နီၪ အဝ့ၫယီၩ မုၬလၩဝ့ၫဒၪအဂဲးႇ ကအၪ့လုလၩ့ ၦလၧအတခ့ၭဖဝၭ ဂ့ၩဝ့ၫဒၪလဖၪႇ ၦလၧအအဲၪကွံၩယွၩလဖၪ ဒဲ ၦၡၩလဖၪအဂဲးႇ ၦအဖ့ၪလၫ့အဝ့ၫ ဆၧထိၪတွၭအၪ့ဎၬဘဲၫယီၩၥိၭနီၪ မွဲလၧ Albert Schweitzer အဂဲးႇ Albert ယီၩစံၭထၬဝ့ၫဒၪ ဆၧအနၧၩ့နီၪ လမွဲဘၪ ဆၧမုၬလၩၥၭဎွံၪအနိၪဝံၬတၭ ဆၧမုၬလၩ ၥၭဎွံၪနီၪ မွဲလၧဆၧအနၧၩ့အနိၪဝံၬလီၫႉ နမၩဝ့ၫဒၪဆၧနီၪ အ့ၪမွဲနအဲၪဒိၭစွါဘဲၫ နၧၩယီၩမွဲနကန့ဘၪ ဆၧအနၧၩ့လီၫအဂဲး Albertယီၩ စံၭဝ့ၫဒၪနီၪလီၫႉ