ယူကရိန်းၦဆူနဲၩဎြံၬဖိၪ ခိၪနါၥံၪလဖၪ ကိၭဖံၭၥိၭၥၫ့ဎွၩကဂဲၫဂၭကွ့ၩထဲၩ့ နးဘျၩ့ဒီၭအဂဲး

ဎြံၬဖိၪၥံၪကအီၪလၧဆၧယံၩဆၧၡီၩ့ဖၧၩ့အဂး အၪ့ကံၩ့ဘၩဆိၪဖၪဆၧ မုကနွ့ၫအဖၧၩ့ လခဲၫ့ထုၬမုနံၩနီၪ ၥၫ့ဎွၩဒၪဎိၭလၩ့လိၬ ၥၭလၧ ယူကရိန်းၦဎြံၬဖိၪကီၫ့စဲၫ ဒဲ ဆၧဘိၪ့ဆၧဘၩခိၪနါလဖၪနီၪလီၫႉ ၥၫ့ဎွၩယီၩ လၧယူကရိန်းထံၪခးဖိၪၥံၪကၠၧၫ့ကၠၧၫ့ မွဲအၥၭလမုၬဘၪ အဂဲး အၪ့ကံၩ့ဘၩဆိၪဖၪအ့ၪဝ့ၫအဂဲး စံၭဘၪဝ့ၫကဘျၩ့ဒီၭနီၪလီၫႉ
“ယအၪ့ကံၩ့ဘၩဆိၪဖၪအ့ၪနၥံၪကိၭဂၩဒ့ၭအဂးနီၪ ဆၧနဲၩၡၪအီၪဘၪလဂ့ၩႉ ယဖိၬဂိၫ့ထၬနၥံၪလၧယၥၭလၬဖၧၩ့နီၪလီၫႉ ၦလၧဆၧဒူၩ ဆၧယၫ့အီၪဝ့ၫဒၪနၥံၪယီၩ ဘဲၫကဆါယွၩကယၫ့ၥၭနၥံၪအဂးဆ့ ယအၪ့ကံၩ့ဘၩဆိၪဖၪအ့ၪနၥံၪနီၪလီၫႉ” ၦလၧအဂဲၫဒၪလၩ့ဎိၭလိၬၥၭလၧ ၥၫ့ဎွၩလဖၪအကျၩ Kyiv-Halycၥၫ့ခိၪဒိၪထုၬ ABP.SVIATOSLAV AHEVCHUK နီၪ ကိၭဖံၭၥိၭဘၪၥၫ့ဎွၩ ဘဲၫကလ့ၩဂၭကွ့ၩစိၩလၧ အဝ့ၫၥံၪ အထံၪခး အဂးနီၪလီၫႉ
“ဆၧကိၭဖံၭၥိၭနီၪလၧအဂုအိၩမွဲကိၭဖံၭၥိၭယံၩယါဝ့ၫဆ့အဂဲးႇ ၥၫ့ဎွၩယီၩနီၪ ခိၭဒီၪနါယူကရိန်းထံၪခးအဂဲးကိၭဆၧၫ့ကိၭထီဒ့ၭအဂဲးႇ ယိလါဘၪဝ့ၫလၧ ၥၫ့ဎွၩကဂဲၫဂၭကွ့ၩစိၩလၧ အဝ့ၫၥံၪအအီၪ လၧဆၧၫ့ဂ့ၩထီဘၪဖၧၩ့ကိၭအဂဲးႇ ၦအခိၭယိလါၥၫ့ဎွၩကလ့ၩဂၭကွ့ၩစိၩလၧ ယူက ရိန်းထံၪခးနီၪ လကၭဘၪကၠၧၫ့ ကၭၥလံၬၦဆူနဲၩဖိၪတၭ ဆၧဘိၪ့ဆၧဘၩဂူၫဂၩဆ့ မွဲအီၪခိၭယိလါဝ့ၫဆ့အဂဲး” ၥၫ့ခိၪဒိၪနီၪ စံၭဝ့ၫဒၪလီၫႉ ဆၧပရၧၫ့လဖၪအဆၧအၪ့စၪ့ဖၧၩ့ ဆၧဘိၪ့ဆၧဘၩခိၪနါလဖၪစံၭဆၧၫ့ဝ့ၫဒၪ “ကကၧၩ့ဖျိၪ့လိၬၥၭလၧ ခးၥဲၫဖၧၩ့ဆၧဘိၪ့ဆၧဘၩခိၪနါလဖၪဂီၩ့ ကဒုၭဆၧၫ့ခွံၬထဲၩ့ ရၭၡၩထံၪခးအဆၧဂဲၫထၪ့ဒုၪဒၩလဖၪ ဒဲ ဘဲၫၥိၭဆၧတီၩဆၧလီၩ့ကန့ဘၪထၪ့ ဆၧအနၧၩ့အဂးနီၪ မၩဆီၪ့ထၪ့အဂဲးဂီၩ့ ကအၪ့ ကံၩ့အၪ့ယၫထၪ့ဝ့ၫအဂဲးႇ ဆၧလၧဆၧဒုၭၥုၭနီၪမွဲဒၪၦၡၩလဖၪအဂး ဆၧအစၪအဆိၩအကၠၪလီၫႉ ဆၧဒုၭၥုၭနီၪ မွဲဒၪဆၧဘၪမၪလီၫ ဆၧနီၪအ ကၠီၩ့ ကြၨၭပစံၭအၧၩ့စံၭၥၫ့အဂဲး” စံၭဆၧၫ့ကၠၭဝ့ၫနီၪလီၫႉ
ဂီၩ့နီၪ ယူကရိန်းထံၪခးဖၧၩ့ ဆၧဘိၪ့ဆၧဘၩခိၪနၪလဖၪၥိၫ့စိၩလံၬနီၪ ဖ့ၪလၫ့အ့ၪၥၫ့ဎွၩဂီၩ့ လၧလံၬဖၧၩ့နီၪ ကွ့ၭလၩ့ထၬဝ့ၫ ဘၪထွ့ၪလၧ ဆၧၡူၭန့ဖျဲၩ့န့ဆၧအဂဲးလဖၪဂီၩ့ ယိလါဝ့ၫလၧၥၫ့ဎွၩကလီၩအ့ၪဘၪအဝ့ၫၥံၪ ဆၧချဲၩ့ဖ့ၪဂဲးဖ့ၪဘၭကမီၪ့အဂဲးဆ့ အၪ့ယၫထၬဝ့ၫနီၪလီၫႉ ယူက ရိန်းထံၪခးLviv ဝံး ၥၫ့ခိၪဒိၪထုၬ ABP.MIECZYSLAW MOKRZYCKI နီၪဆ့ စံၭဘၪဝ့ၫ “စၭထၪ့လၧရၭၡၩၥံၪလ့ၩထၪ့ဒုၭ ယူကရိန်းအထီနီၪ ၥၫ့ဎွၩဖရၫ့စံၭအဆၧချဲၩ့လၧထံၪခးဖိၪအဂးလဖၪယီၩ လၧယူကရိန်းထံၪခးဖိၪၥံၪအဂး မွဲန့ဂဲးန့ဘၭအၪအၪအဂဲးႇ လၧထံၪခးဖၧၩ့နီၪ ကၭၥလံၬဆၧဘိၪ့ဆၧဘၩ ိၪၥံၪ အီၪဝ့ၫဒၪၡၩခိၭဖိၪလီၫ ဒဲ အၪဒၪဆၧနီၪ အီၪဒၪအီၥဒီၭဆၧဘိၪ့ဆၧဘၩဖိၪၥံၪနီၪလီၫႉ
ဆၧနီၪအကၠီၩ့အဝ့ၫၥံၪယီၩ ၥၫ့ဎွၩအၥနိၫ့လဖၪနီၪ နၪဝ့ၫလၥ့ၪဘၪဒဲ ကဘၪထိးဆၧၫ့ဝ့ၫကၪဂဲၩဝ့ၫဒၪနီၪလီၫႉ အဝ့ၫၥံၪယီၩ နၪၥၫ့ဎွၩ အဆၧဖံၭဆၧမၩအဂဲးလဖၪ လၥ့ၪဘၪလါနၫ့ ဘၪထွ့ၪလၧရၭၡၩၥံၪအဆၧထၪ့ဒုၭဆၧအဂဲး ၥၫ့ဎွၩအဆၧချဲၩ့လဖၪနီၪ မွဲထိးဆၧၫ့ကၠၭ ဝ့ၫဒၪ နီၪလီၫႉ ယူကရိန်းထံၪခးအဂး ဘၫတံၫကၫ့ မၩအ့ၪဝ့ၫလဖၪနီၪ မွဲအဝ့ၫၥံၪအဲၪဒိၭဝ့ၫအဂဲး ဖ့ၪနဲၪဖျီၪထၪ့ဝ့ၫလီၫႉ ၦဎြံၬဖိၪကီၫစဲၫယီၩနီၪ လၧအဖီၩ့ခွံၬ ၁၉၉၆နံၪ့ အထီအိၩ ၦၡၩစၭကၧၩ့ဖျိၪ့ထၪ့လၧ ဎြံၬဖိၪခရၧၫ့ ၁၅ခရၧၫ့အဂဲး ပန့ဘၪဆၧပရၧၫ့ ဘဲၫယီၩအၥိၭနီၪလီၫႉ
ကွ့ၭထၪ့ခီၫ့ - နးအဲၪဖီၫဘွၩ