ဘၪထွ့ၫလၧၦဖျိၩ့ဆၧးဎံၪဆၧးလၩအနိၫ့လဖၪအဂး ၦလၧအဂဲၫထဲၩ့န့ထၬဘၪ ခိၪဖၭလဖၪမွဲဝ့ၫ ဖူၫၥံၩ့ဝ့ၫၥံၪဖီၩ့ခွံၬအဂဲး

လၧအဖီၩ့ခွံၬ ၂၀၂၃နံၪ့ လၩဒံၫဇဲၩ့ဘၧၫ၁၈ၥၫ့အထီနီၪ ဖူၫၥံၩ့ဝ့ၫယီၩၥံၪဖီၩ့ခွံၬဒၪပၧၩလၧ ၉၆မံၩ့ဆၧဆၫလီၫႉ လၧအဂုအိၩ ၦဖျိၩ့အဆၧဆၧးဎံၪဆၧးလၩ ၦကွ့ၩၡါအခရၧၫ့ ပကိၭဝ့ၫလၧပယၩ့ခီၫ (ကရင်ယဉ်ကျေးမှုအနုသုခုမှ ဇာတ်သဘင်)ဖၧၩ့နီၪ အဝ့ၫယီၩ ဂဲၫထဲၩ့ခိးဂဲးခိးဘၭထၬဝ့ၫဒၪအၪမၬနီၪလီၫႉ ဂဲၫထဲၩ့ကွ့ၭထၬ ၡါအဂးဆၧၥၭအွံၪလဖၪႇ ၡါလဖၪႇၦဖျိၩ့ဆၨၩအဆၧၥၭအွံၪလဖၪဂီၩ့ အၪ့န့ထၬမူၩဒၩလၧ ၦကွ့ၭၡါဒဲဒါရိုက်တာ မူၩဒၩလဖၪ ယံၭလ့ၬနီၪလီၫႉ

ဆရၫဖူၫၥံၩ့ဝ့ၫယီၩနီၪ အီၪလၧ အ့ၫယဝတံၫခးဒီၪ့ႇ ခၠီၩ့ကလ့ၩလးဝၩ့ႇ ယင်းဖား တဝၫ့ဖၧၩ့နီၪလီၫႉ ဖူၫၥံၩ့ဝ့ၫ ကွ့ၭထၬဂီၩ့ အမံၩ့ဎိၩဝ့ၫဒၪဆၧၥၭအွံၪလဖၪနီၪ မွဲဝ့ၫလၧ ပၧၩမွဲဖျိၩ့ႇ နးတိၭတ့ၩႇ ဒဲ ဂဲၫစူၭကီၪ့ထဲၩ့ ဆၧၥၭအွံၪလဖၪ နီၪလီၫႉ ဖူၫဆရၫယီၩ ဂဲၫထဲၩ့ဖီၪ့ထၪ့ဖံၭထၪ့ ၦဖျိၩ့ဆၨၩဆၧဆၧးဎံၪဆၧးလၩ ဆၧဖံၭဆၧမၩလဖၪအၪမၬအကၠီၩ့ ၦဖျိၩ့ဆၨၩခးဒီၪ့ ဖ့ၪလၫ့ဘၪ လုၫဎံၪလါၥ့ၪဆၧနဲၪ့လၩဖၩ့ခိၪဖၭဒဲ ဝံးဒီၪ့ၦဖျိၩ့ဆၨၩလံၬလဲဒဲ ဆၧဆၧးဎံၪဆၧးလၩခမံတံၫဖ့ၪလၫ့ဘၪ ၡၩခံးဂးဆၧနဲၪ့လၩဖၩ့ခိၪဖၭလဖၪနီၪ အဝ့ၫယီၩန့ထၬဝ့ၫလီၫႉ

ဆရၫဖူၫၥံၩ့ဝ့ၫယီၩနီၪ အၥၭဆၧၩ့အၪမၬဒဲ ၡါအဂးဆၧၥၭအွံၪလဖၪနီၪ ကဆိဖိၪအဖၧၩ့အဝ့ၫယီၩ ကွ့ၭဝ့ၫန့အဂဲးႇ လကၭဘၪ ၡါလဖၪဆ့ ကနၩဒဲကနၩ ထၧၩ့လမီၪ့ဎီၩ့ဘၪအဂး ကွ့ၭမုၬထၪ့ဝ့ၫၥ့ၪအၪမံၩ့အၪမၠိၩ့အဂဲးႇ ၦဖျိၩ့အဆၧၥၭအွံၪ ဆၧလၩ့ယူလၩ့ယီၫလဖၪနီၪဆ့ ကွ့ၭဝ့ၫၥ့ၪဖျ့ၪဖျ့ၪလံၬလံၬအဂဲးႇ ၦဖျိၩ့အဆၧပိၬဆၧလၫ့မွဲဝ့ၫ ခိၪမိၬႇ ရီ ဒဲ ဎ့ၪ လဖၪနီၪဆ့ ဖိၭလိၭဝ့ၫၥံၪအဘျ့ၭအဘျိၭအဂဲး ပၥ့ၪယၫဘၪလီၫႉ

ဆရၫဖူၫၥံၩ့ဝ့ၫအစွၫနီၪ ၦၡၩလ့ၩဘၧၩ့လၩ့ခွံၬလၧ လၧလၩဒံၫဇဲၩ့ဘၧၫ၂၀ၥၫ့ဒၪအိၩဂီၩ့ ၦၡၩလ့ၩအၪ့ထုၪ့ထဲၩ့အဎွံၪနီၪ လၧလၩဒံၫဇဲၩ့ဘၧၫ၂၃ၥၫ့အဂဲး ဆၧပရၧၫ့ယီၩ ပန့ထၬဘၪလၧ လွတ်လပ်သောထီးထာကလုန်းကရင့်မီဒီယာ အဖၧၩ့နီၪလီၫႉ

နးအဲၪဖီၫဘွၩ