ၥၭဘၪ့ဒဲမိဖါဆရၫလဖၪ

ၥၭဘၪ့လဖၪအဆၧၥၭမၧၫ့အစၭထၪ့နီၪမွဲလၧမိဖါလဖၪနီၪလီၫႉ မိဖါၥံၪယီၩနီၪဘဲၫၥိၭဖိၪဒံၪလဖၪ လထီၩ့ဘၪလၧဖၧၩ့ၥၭအဂၭ ဂီၩ့အဖၫ့ခိၪအဂးႇ ဘဲၫၥိၭအၪ့နၩ့ဘဲၩ့ဖၭဆၧအဂ့ၩဒဲ ဆၧအအၧၩ့ကၥ့ၪအဂးနီၪ ကဘၪၥီၪ့ၥၫ့ကၠၭအဖိၪအဒံၪနီၪလီၫႉ ၥၭဘၪ့ကိၭဂၩဒ့ၭနီၪ ဆၧမၩၥံၫၦၡၩအၥုၪ့အၥၭလဖၪႇ ဆၧအၪ့ဂူၪအၪ့ဘျၪဆၧလဖၪႇ လီၩ့အဲၪဘိၩ့ၦၡၩအဖိၪအမၫလဖၪ ကဘၪဂၭဎ့ၭဆၧအၪ့လံၩ့အၪ့လီၫ လဖၪႇ ကဘၪဂၭဎ့ၭၥံၭထံၫဂၭထံၫၥံၫမၧၩ့ပၠိၭလဖၪႇ ဒဲ ဆၧမၪအဂူၫဂၩလဖၪနီၪလီၫႉ

လကၭဘၪၥၭဘၪ့လဖၪအဆၧၥၭမၧၫ့အစၭထၪ့နီၪမွဲဒံၭလၧ ဆၧမၩလိၪလးလဖၪဒံၭနီၪလီၫႉ ဆရၫ ဆရၫမုၪလဖၪနီၪ မၩအၪ့ လဲၩထၪ့ၥၭဘၪ့ဖိၪလဖၪအၥုၪ့အၥၭန့နီၪလီၫႉ ဘဲၫၥၭဘၪ့ဖိၪလဖၪကကဲၪထၪ့ၦအဂ့ၩအဘွၩအဂး ၥီၪ့ၥၫ့ဝ့ၫန့အၥိၭဘဲၫၥၭဘၪ့ဖိၪၥံၪ ယီၩ ကကဲၪထၪ့ၦအအၧၩ့အၥၫ့အဂးဆ့ ၥီၪ့ၥၫ့ဝ့ၫန့နီၪလီၫႉ မုဆၫကနံၩယီၩအ့ၪပကယိထၪ့ပခးပယၩ့အထၧးအလၧးဘဲၫယီၩစွါဘဲၫ မွဲပကဒၪထၪ့ထံၪထံၪဆၭဆၭနီၪလီၫႉ

အထံၩအဖျဲလဖၪ အတခ့ၭဖဝၭကဂ့ၩအဂး အဆၧလူဆၧချဲၩ့အဂး ကအီၪအၪ့လ့ၩထဲၩ့ဂ့ၩဂ့ၩဘၪဘၪအဖၧၩ့ကၥ့ၪအဂးဒဲ ကကျ့ၭစၨၭလံၬလဲအဂးနီၪ ဆရၫလဖၪနီၪကဘၪၥီၫ့ၥၪ့ဝ့ၫဒၪလီၫႉ ဆၧနီၪအကၠီၩ့ ပဒၪဘၪအထီဘဲၫယီၩၥၭဘၪ့လဂၩ အတခ့ၭ ဖဝၭဂ့ၩဝ့ၫနီၪ ဘၪထွ့ၫလၧအမိဖါဒဲဆရၫလဖၪအဆၧၥီၪ့ၥၫ့ဂ့ၩဝ့ၫဒဲ အ့ၪပဒၪဘၪၥၭဘၪ့လဂၩအတခ့ၭဖဝၭလဂ့ၩဘၪနီၪဆ့ ဆၧဘၪ ထွ့ၫအီၪလၧမိဖါဒဲဆရၫလဖၪဆ့နီၪလီၫႉ လါနၫ့ၥၭဘၪ့ကနၩ့နၩ့ဂၭဂီၩ့ဂၭစၪနီၪ ဆၧဘၪထွ့ၫလအီၪဘၪလၧမိဖါဒဲဆရၫလဖၪတၭ ဘၪထွ့ၫဒၪလၧအဝ့ၫအဆၧအီၪက့ၪၥုၪ့အီၪက့ၪၥၭနီၪလီၫႉ ဆၧနီၪအကၠီၩ့ ပကဲၪၥၭဘၪ့ဖိၪၥံၪယီၩ ပမိဖါဒဲဆရၫလဖၪၥီၪ့ၥၫ့ပၧၩဆၧ အဂ့ၩလဖၪနီၪ မွဲပကဘၪခိၭနၪဝ့ၫဒၪဒဲ ဆၧအအၧၩ့လဖၪနီၪ မွဲပကဘၪအီၪပဲၩခွံၬဂီၩ့ ပကဘၪကျ့ၭစၨၭကဲၪထၪ့ၥၭဘၪ့ အဂ့ၩအဘွၩ လဖၪနီၪ မွဲပၥၭဘၪ့ဖိၪကိၭဂၩအမူၩဒၩနီၪလီၫႉ