ဖိၪမုၪလဂၩအဆၧၥၭမၧၫ့

ၦမုၪလဂၩအဆၧၥၭမၧၫ့ဖၧၩ့ ဘၪအီၪလၧ ဂံၪ့နံၫဖျိၪ့နီၪလီၫႉ ကဖျိၪ့နီၪမွဲလၧအမိအဖါအဂံၪ့ဂီၩ့ လခဲၫ့ကဖျိၪ့နီၪ မွဲလၧအ မံၩ့ၡါအဂံၪ့နီၪလီၫႉ  မိဖါၥံၪနီၪ ဂဲၫထဲၩ့ထိးၡၪ့အၥၭဂီၩ့ ဘၪဂဲၫထဲၩ့အၪ့လုဎိၩလၫ့အဝ့ၫၥံၪ အဝ့ၫၥံၪယီၩဎိၭဒိၪထၪ့ကကၠၪ ထၪ့ၡါဂီၩ့စဲၪ့ထၪ့ခွံၬ လၧ မိဖါအဂံၪ့နီၪလီၫႉ ရွံထၪ့အဝၩနီၪအ့ၪဘၪလၧ ၦခွၫအဂ့ၩအဘွၩစွါဘဲၫ အၥၭကဘၪမုၬဘၪၡူၪလါနၫ့ အ့ၪရွံထၪ့ၦခွၫဘၪမၪ နီၪဘိၭ ထၧၫ့ဎုၬယၫကဘၪမၩဆၧမၩ ဘဲၫၥိၭစမံၩ့ပနါအၥိၭနီၪလီၫႉ အဝ့ၫၥံၪထၧၫ့ၡါလၩ့ဖၩဂီၩ့အ့ၪမွဲအမိဎွါဒဲအၥၭဘၪၡၪ့အဂဲး မိဖါၥံၪၥ့ၪယၫစွါဘဲၫ မိဖါၥံၪယီၩ အဖိၪမုၪအဂး  အၥုၪ့အၥၭဘၪခိဝ့ၫ ကကၠၪဒီၭလီၫႉ

ၦၡၩလီၩယံၩယါဝ့ၫ ပဘၪအၪ့လုထၬပဖိၪမုၪနီၪ မီၪ့ဎီၩ့ဒၪပဘၪအၪ့လုထၪ့ထၬ ဖီၫအၥိၭလီၫႉ ပဘၪယိထဲၩ့ခွါထဲၩ့ ဂ့ၩဂ့ၩဘၪဘၪႇ ဖီၫဖိၪယီၩဂဲၫထိပၠၪထၪ့အခၫ ၦဂူၫဂၩဂဲၫအၪ့မၩခွံၬနီၪလီၫႉ ဖိၪမုၪၥံၪယီၩ ထၪ့ၡါလၩ့ဖၩဂီၩ့ လ့ၩထီၩ့စိၩလၧ ၦၡၩအဂံၪ့အခၫ မိဖါၥံၪယီၩ ဖိၪမုၪလဖၪအအီၪ လယိလါထဲၩ့ဘၪ ဆၧနးမံၩ့လါနၫ့ ယိလါဝ့ၫဒၪအီၪကမံၩ့နီၪ အဖိၪမုၪအမံၩ့ၡါ ခ့ၫနဲၩလဖၪ ကအဲၪကွံၩအဖိၪမုၪ ဒဲ ကယိထဲၩ့ခွါထဲၩ့အဖိၪမုၪ ဘဲၫဖိၪအထံးကဂၩအၥိၭအဂးနီၪလီၫႉ

ၦမုၪကနၩ့နၩ့ အၪ့န့ထၪ့ၡါၦခွၫဘၪမၪအကၠီၩ့ အဝၩမၩၡၪ့အၥၭခီၫကမံၩ့ ႇ ဆၧမၩနၧၩ့မၩစၪအနးခီၫမိၡါခီၫကမံၩ့ႇ လကၭဘၪ အမံၩ့ၡါခ့ၫနဲၩလဖၪ မၩၡၪ့အဝ့ၫၥံၪအၥုၪ့အၥၭခီၫကမံၩ့ ကနံၩနံၩအဝ့ၫၥံၪအဆၧၥၭမၧၫ့နီၪ မီၪ့ဎီၩ့ဘၪအီၪလၧရၬမ့ၫဖၧၩ့ နီၪလီၫႉ မုဆၫကနံၩယီၩ ၦမုၪဘဲၫနီၪအၥိၭ မွဲဂဲၫအီၪအၪထၪ့ဒိၪဒိၪဒ့ၭဆ့နီၪလီၫႉ ဆၧနီၪအကၠီၩ့ ၦလၧအကဲၪမံၩ့ၡါခ့ၫနဲၩကိၭဂၩဒ့ၭ ပကဘၪအီၪက့ၪဒိၪ ၦဂူၫဂၩအဖိၪအဒံၪ ဘဲၫပဖိၪပဒံၪ ပထၧၫ့ဖုထၧၫ့ဝဲအၥိၭ ဒဲ ၦလၧအကဲၪဒဲၪမုၪလဖၪဆ့ ပကဘၪအီၪက့ၪ ဒိၪထဲၩ့ ပမံၩ့ၡါခ့ၫနဲၫ ဘဲၫပမိပဖါ ပထၧၫ့ဖုထၧၫ့ဝဲအၥိၭ မုကနံၩယီၩ ယရၩလၩ့စိၩအ့ၪဘၪနၥံၪ ဆၧအဂဲးယီၩနီၪလီၫႉ