ဂံၪ့ဒီၪ့ဆၧမုၬဆၧလၩ

ဆၧအဲၪကမံၩ့လီၫစွါဘဲၫ ပၥုၪ့ထၪ့ဂံၪ့ဒီၪ့ဆၧမုၬဆၧလၩလန့ဘၪနီၪလီၫႉ လဂၩအဆၧမၪနီၪ လဂၩဖျါခွံၬလိၬၥၭ နၪၥ့ၪလိၬၥၭန့မၬ ဂံၪ့ဒီၪ့ကဖျိၪ့ဖၧၩ့ ဆၧမုၬဆၧလၩကအီၪနီၪလီၫႉ ပအီၪဂံၪ့ဒီၪ့ကဖျိၪ့လီၫဂီၩ့ ထၧၫ့မၫဝၩနံၩဂၩနီၪ ပကလီၩ့ဎွါလိၬၥၭဆၧမၪစွါဘဲၪ ဂံၪ့ဒီၪ့ဖၧၩ့ ဆၧမုၬဆၧလၩ ကဲၪထၪ့န့နၧၩကၠၪအ့ၬႉ အမၫနီၪၥၭထၪ့ထီၫအီၪ အဝၩနီၪ ဖ့ၪလၧအမၪ ဆၧအနၧၩ့အ့ၬ အ့ၪမွဲဘဲၫနီၪစွါဘဲၪ အခံၪ့ယံၬလၧကကၠၪ ထၧၫ့မၫဝၩအကျၩ ဆၧအဲၪဆၧကွံၩလအီၪလၧၩ့ဘၪကကၠၪ ဂံၪ့ဒီၪ့လၩ့ဖၭၥ့ၪဝံၫနီၪလီၫႉ ဘဲၫၥိၭ ဂံၪ့ဒီၪ့ကဖျိၪ့ဖၧၩ့ ဆၧမုၬဆၧလၩကအီၪအဂးနီၪ ထၧၫ့မၫဝၩနံၪဂၩအကျၩ အကၧၩ့ဒိၪထုၬလိၪဝ့ၫ မွဲဒၪလၧ လဂၩဒဲလဂၩ ကဘၪဖ့ၪလၧလိၬၥၭ ဆၧအဲၪဆၧကွံၩ ကဘၪဖ့ၪလၧလိၬၥၭ ဆၧၥ့ၪယၪနၪၥ့ၪနီၪလီၫႉ ဘဲၫၥိၭထၧၫ့မၫဝၩနံၩဂၩအကျၩဆၧအဲၪဆၧကွံၩကအီၪအဂး ဆၧမုၬဆၧလၩကအီၪအဂးနီၪ ကဘၪအၪ့ကံၩဘၪဆိၪဖၪဆၧလၧကဆါယွၩအီၪနီၪလီၫႉ ၦၡၩမၩလန့ဘၪနီၪ ကဆါယွၩမၩန့နီၪလီၫႉ ဆၧထီးအလူၬနီၪ ကဆါယွၩမၩဆၧၩ့ပၧၩန့နီၪပကဘၪၥ့ၪယၪလီၫႉ ဆၧနီၪအကၠီၩ့ ၥၭနၪ့ဘၪကဆါယွၩလဂ့ၩႉ ပဂံၪ့ဒီၪ့ဖိၪၥံၪနီၪ ပကဘၪအီၪ ဆၧအၪ့ကံၩဘၪဆိၪဖၪဖၧၩ့ ကိၭမုနံၩနီၪလီၫႉ