ၦဘၧၩ့လၩ့ဆၧစယီဟၫ့အဆၧပရၧၫ့.

ၦၡၩလၧယွၩအၪ့မၧၫ့လၩ့ဝ့ၫနီၪ အီၪလဂၩတၭႇ အမံၩ့မွဲစယီဟၫ့လီၫ.- အဝ့ၫလဂၩနီၪ ဂဲၫဝ့ၫလၧဆၧ မိထိးအၥၭအဂးႇ ဘဲၫၥိၭအမိထိးအၥၭလၧ ဆၧဖၩ့အဂဲးအကၠီၪ့နီၪႇ ဘဲၫၥိၭၦၡၩကိၭဂၩဒ့ၭ မိနဲၩလၧအကၠီၩ့လီၫ.- 
အဝ့ၫဒၪမွဲဆၧအဖၩ့နီၪအ့ၬ. ဂဲၫဝ့ၫဘဲၫၥိၭအမိထိးအၥၭ လၧဆၧဖၩ့အဂဲးအကၠီၪ့နီၪလီၫ.-
ၦယုဒၫဖိၪၥံၪလၧအအီၪလၧ ဒိၩ့ယရုစလံၫ့အဖၧၩ့နီၪ အၪ့မၧၫ့လၩ့ၦလုဆၧၥံၪ ဒဲၦလံဝဲၫဖိၪၥံၪ လ့ၩထီၩ့လၧစယီဟၫ့အအီၪနီၪႇ ဘဲၫၥိၭအမိအၪ့စၪ့အဝ့ၫႇ နဝ့ၫဒၪယီၩ နမွဲပလၫလဂၩလဲၪနီၪႇ စယီဟၫ့အဆၧထိးအၥၭနီၪ မွဲအယီၩႇ- ထိးအၥၭတၭလမီၪ့ဘံၭဘၪဝ့ၫနီၪႇ ထိးအၥၭလၧယဝ့ၫဒၪယီၩ ယမွဲဎရံၬအ့ၬ.- 
အဝ့ၫၥံၪအၪ့စၪ့ဒီၭဝ့ၫႇ အ့ၪမွဲဘဲၫနီၪတၭႇ နမွဲပလၫလဂၩလဲၪ နမွဲစအံၫလဲယၫဧၪ. အဝ့ၫနီၪစံၭဆၧၫ့ဝ့ၫမွဲအ့ၬႇ နမွဲမီၪလဂၩနီၪဆ့ဧၪ. အဝ့ၫဒၪစံၭဆၧၫ့ဝ့ၫမွဲအ့ၬ.- မၩအၥၭဘဲၫနီၪတၭႇ နမွဲပလၫလဂၩလဲၪႇ ၦၡၩလၧအအၪ့မၧၫ့လၩ့န့ပၧၩနီၪႇ ဘဲၫပထဲၩ့လီၩဘၪအဝ့ၫၥံၪ မိၥ့ၪအၥိၭတၭႇ မွဲနစံၭလၩ့နၥၭဘဲၫၥ့ၪလဲၪ.- အဝ့ၫနီၪစံၭဝ့ၫႇ ယဝ့ၫဒၪယီၩ ယမွဲၦလၧအလူၥီၫထၪ့ လၧမံၩ့လၬကျၩႇ မၩလီၩ့ကဆါအဖၧၩ့ၥၭနီၪဆံၭ. ဘဲၫမီၪစအဲၫစ့ယၫစံၭဝ့ၫအၥိၭနီၪလီၫ.
တၭၦလၧဆၧအၪ့မၧၫ့လၩ့ဝ့ၫလဖၪနီၪႇ ဘၪဆဲၫ့လၧၦဖၫရစံၫၥံၪလီၫ.- အဝ့ၫၥံၪအၪ့စၪ့ဝ့ၫတၭႇ စံၭအဝ့ၫဒၪႇ မၩအၥၭဘဲၫနီၪတၭႇ နဝ့ၫဒၪယီၩႇ နအ့ၪလမွဲဘၪဎရံၬႇ နအ့ၪလမွဲဘၪစအံၫလဲယၫႇ နအ့ၪလမွဲဘၪမီၪလဂၩနီၪတၭႇ မွဲဘၪနီၫလၧနဘၭတံၫဇၫ့ဆၧလဲၪ.- 
စယီဟၫ့ချဲၩ့ဆၧၫ့ဝ့ၫတၭႇ စံၭဝ့ၫဒၪႇ ယဝ့ၫဒၪယီၩႇ ယဘၭတံၫဇၫ့ ဆၧလၧထံၫကျၩလီၫ. အ့ၪမွဲၦလၧနၥံၪအကျၩ လၧနၥံၪလၥ့ၪယၫဘၪဝ့ၫနီၪ အီၪဝ့ၫလဂၩတၭႇ- အဝ့ၫနီၪဂဲၫ လၧယလးခဲၫ့တၭႇ န့ၫယမိကွဲၪလၩ့ အခၪ့ဖံၭဖျံၩနီၪႇ ယကြၨၭအ့ၬ.- ဆၧယီၩလဖၪမၩအၥၭလၧ စယီဟၫ့ ဘၭတံၫဇၫ့ဆၧ လၧထံၫယီၫဒၫ့ဝါလခီၫ လၧဘ့ၭၥနံၫအဖၧၩ့နီၪလီၫ.