ၦပျီၩဖျ့ၭဒဲဎီးလဖၪ.

မၩအၥၭဘဲၫနီၪတၭႇ ယ့ၫၡုၬစံၭ ၦယုဒၫဖိၪလၧအနဲၩထဲၩ့ဝ့ၫလဖၪနီၪ နၥံၪအ့ၪအီၪဂုးအီၪခၧၫ့ လၧယလူယထၫအဖၧၩ့တၭႇ နၥံၪမွဲယထံၩယဖျဲလၩ့ထံးလၩ့ဆ့ၭလီၫ.- နၥံၪမိၥ့ၪယၫဆၧမွဲဆၧတီၩတၭႇ ဆၧမွဲဆၧတီၩနီၪ မိကွဲၪဖျါခွံၬနၥံၪလီၫ.- 
အဝ့ၫၥံၪချဲၩ့ဆၧၫ့ဝ့ၫႇ ပဝ့ၫဒၪယီၩ ပမွဲစအၫဘြဟၫ့ အချံၫအၥၪတၭႇ ပကဲၪဎီးလၧ ၦၡၩလဂၩဂၩ အစူၪဖၧၩ့နးဆိၭအ့ၬ. တၭနစံၭလၧဆၧမိကွဲၪဖျါခွံၬနၥံၪနီၪ မွဲဘဲၫၥ့ၪလဲၪ.
 ယ့ၫၡုၬချဲၩ့ဆၧၫ့အဝ့ၫၥံၪ ယလီၩဘၪနၥံၪတီၩတီၩလီၩ့လီၩ့ လၧကယဲၦလၧအမၩဆၧဒဲၩဘၭနီၪႇ မွဲဆၧဒဲၩဘၭအဎီးလီၫ.- ဎီးနီၪအီၪဘၪ လၧဂံၪ့ဖၧၩ့အဆိၩဆိၩအကၠၪကၠၪအ့ၬ. အ့ၪမွဲဖိၪခွၫနီၪ အီၪဝ့ၫလၧဂံၪ့ဖၧၩ့ အဆိၩဆိၩအကၠၪကၠၪလီၫ.- မၩအၥၭဘဲၫနီၪတၭႇ ဖိၪခွၫအ့ၪကွဲၪဖျါခွံၬနၥံၪတၭႇ နၥံၪမိအီၪပျီၩဖျ့ၭလၩ့ထံးလၩ့ဆ့ၭလီၫ.- 
ယၥ့ၪယၫလၧနၥံၪမွဲစအၫဘြဟၫ့အချံၫအၥၪ မွဲလါနၫ့ဘိၩ နၥံၪအၪ့ဎၬမၩၥံၫယၧၩလီၫ. အဂဲးဘဲၫယီၩ ယလူယထၫအီၪလၧနၥံၪအဖၧၩ့အ့ၬ.- ဆၧလၧယဒၪဘၪ လၧယဖါအအီၪနီၪ ယလီၩဘၪယဝ့ၫတၭႇ ဆၧလၧနၥံၪဒၪဘၪလၧနၥံၪအဖါအအီၪနီၪႇ မွဲနၥံၪမၩနၥံၪဝ့ၫဆ့လီၫ.
အဝ့ၫၥံၪချဲၩ့ဆၧၫ့ဆၧတၭႇ စံၭအဝ့ၫဒၪႇ စအၫဘြဟၫ့ မွဲပဖါလီၫ. ယ့ၫၡုၬစံၭအဝ့ၫၥံၪႇ နၥံၪအ့ၪမွဲစအၫ ဘြဟၫ့အဖိၪတၭႇ နၥံၪမိမၩစအၫဘြဟၫ့အဆၧမၩလီၫ.- ဘိၩ့နဲၪ့ယီၩနၥံၪအၪ့ဎၬမၩၥံၫယၧၩႇ ၦလၧအလီၩဘၪနၥံၪ ဆၧမွဲဆၧတီၩ လၧယနါဂၧၫ့ယဝ့ၫလၧယွၩလီၫ.- စအၫဘြဟၫ့မၩဝ့ၫဘဲၫနီၪၥိၭအ့ၬ. နၥံၪမၩနၥံၪအဖါအဆၧမၩလီၫ. မၩအၥၭဘဲၫနီၪတၭႇ အဝ့ၫၥံၪစံၭဝ့ၫႇ ပဝ့ၫဒၪယီၩပအီၪဖျဲၪ လၧၦအဲၪဘိၩ့ဆၧအဖၧၩ့မွဲအ့ၬႇ ပအီၪလၧပဖါ လဂၩဎး ယွၩနီၪလီၫ.
 မၩအၥၭဘဲၫနီၪတၭႇ ယ့ၫၡုၬစံၭအဝ့ၫၥံၪႇ ယွၩအ့ၪမွဲ နၥံၪအဖါတၭႇ နၥံၪမိအဲၪယၧၩလီၫ. အဂဲးဘဲၫယီၩ ယအီၪယဝ့ၫလၧယွၩအၥိၭနီၪႇ ယစဲၪ့ထၪ့တၭႇ ယဂဲၫလၩ့ယဝ့ၫလီၫ. အဂဲးဘဲၫယီၩ ယဂဲၫဒၪယဝ့ၫအ့ၬ. အဝ့ၫအၪ့မၧၫ့လၩ့ယၧၩလီၫ.