ၦနၭဇရ့ၭဖိၪလထိးဆၧၫ့ဘၪယ့ၫၡူၬ

အဝ့ၫဒၪထဲၩ့ထဲၩ့ဝ့ၫလၧနၭဇရ့ၭ လၧအဒိၪထၪ့ဝ့ၫလၧအဖၧၩ့တၭ, ဘဲၫအထူၫအရူၫဒၪဝ့ၫအၥိၭနီၪ, ဘၪမးၥံၫအနံၩတၭ, လ့ၩနုၬဝ့ၫလၧၥရိၬဖၧၩ့နီၪ, ဂဲထုၪ့ဝ့ၫဘဲၫၥိၭအမိဖီဘၪလံၬလီၫ.- ဆၧဖ့ၪလၫ့အဝ့ၫ လၧမီၪစအဲၫစ့ယၫအလံၬလီၫ. ပၠၪလၩ့လံၬနီၪတၭ, ဒၪန့ဝ့ၫအလးထီးဆၧကွ့ၭဝ့ၫ, ယွၩအၥၭအီၪလၧယလီၩ့လီၫ. အဂဲးဘဲၫယီၩဂုၪယူၭယၧၩ ဘဲၫၥိၭယမိလီၩလၩ့လၬလၩ့ ဆၧၥၭထိၬအပရၧၫ့ လၧၦၡၪ့ဖိၪယၬဖိၪလီၫ. အၪ့မၧၫ့လၩ့ယၧၩဘဲၫၥိၭယမိမၩဘျၪထဲၩ့ၦ အၥုၪ့ခါအၥၭလၩ့, ဘဲၫၥိၭယမိကိၭထၪ့ဆၧဖီၩ့ဖျ့ၭ လၧၦဘၪဆၧအၪ့မၧၫ့ဎီးဝ့ၫအဂး, ဒဲဒုၭဒၪထၪ့ထဲၩ့ၦလၧအမ့ၬဘျီၪ, ဘဲၫၥိၭယမိဖျါခွံၬၦဘၪဆၧမၩအၧၩ့မၩနၭဝ့ၫ, ဘဲၫၥိၭယမိမၩဂၧၫ့ထၪ့ၥၩလၩ့နံၪ့လၧ အဘၪယွၩအၥၭနီၪလီၫ.
အဝ့ၫဒၪထူၫထၪ့ထဲၩ့လံၬတၭ, ဖ့ၪလၫ့ထဲၩ့ဝ့ၫလၧဆၧအခ့ၫအၡၩလဂၩနီၪ, ဆၧၫ့နၩ့ထဲၩ့ဝ့ၫလီၫ. ၦအီၪ လၧၥရိၬဖၧၩ့ကိၭဂၩဒ့ၭလဖၪနီၪ, ယိအမ့ၬထံၫထံၫဆၭဆၭလီၫ.- အဝ့ၫဒၪချဲၩ့ထၪ့ၥၫ့ဆၧလၧအဝ့ၫၥံၪ, စံၭဝ့ၫ,ဆၧကွ့ၭအၥၭယီၩ, လၧၫ့ထၪ့ဎွ့ၩထၪ့လၧနၥံၪအနါဖၧၩ့ လၧမုဆၫလနံၩယီၩလီၫ.- ၦထီးအလူၬထိး အၥၭလၧအဝ့ၫဒၪအဂးတၭ, လၧဆၧချဲၩ့အဂ့ၩလၧအဂဲၫထၪ့လၧအနိၭဖၧၩ့အကၠီၩ့နီၪ, ထီၫမံၫထီၫမၪဝ့ၫဒၪလီၫ. ၦလဖၪနီၪစံၭဝ့ၫ,အဝ့ၫဒၪယီၩ, မွဲစယိၥၭအဖိၪခွၫနီၪမွဲအ့ၬဧၪ.- အဝ့ၫဒၪစံၭအဝ့ၫၥံၪ, မွဲမၬ,နၥံၪမိ စံၭယၧၩလၧဆၧချဲၩ့အဒီၩ့ယီၩ, ၥံၪ(ၥံၪ့ဎွံ)ဆရၫဧ့, မၩဘျၪထဲၩ့ဒၪနၥၭဆံၭ. ထီးဒၪပနါဂၧၫ့ဆၧမၩအ ၥၭလၧကပၧနအၫ့အဖၧၩ့လဖၪနီၪ, မၩဆ့ထီးနခးဒၪနဝ့ၫအဖၧၩ့ယီၩဘီၪ.-
အဝ့ၫဒၪစံၭဝ့ၫ, ယလီၩဘၪနၥံၪတီၩတီၩယီၩ, မီၪၥံၪလၧအခးဒၪဝ့ၫအဖၧၩ့နီၪ, ၦထိးဆၧၫ့ဝ့ၫနးဂၩအ့ၬ.- ယလီၩဘၪနၥံၪလၧအမွဲအတီၩ, လၧမီၪစအံၫလဲယၫအနံၩအၥၫ့ၥံၪ ထီးမူၭခိၪကၭဘံၭထၬအၥၭ ၥၧၫ့နံၪ့ဒဲလၩဎူၫဘံၪ့, ထီးဆၧၥၭဝံဖၭဒိၪအီၪထၪ့လၧထၧၫ့ခးယၫနီၪ, ၦမုၪမဲၫအီၪလါနၫ့အၪဂၩ လၧၦအံၫစရ့ၭလၭဖိၪၥံၪအကျၩတၭ, ဆၧ အၪ့မၧၫ့စအံၫလဲယၫလ့ၩလၧအအီၪနးဂၩအ့ၬ.- အၪ့မၧၫ့လၩ့ဝ့ၫန့ၫလၧၦမုၪမဲၫအီၪ လၧဇၫရဖၭဘၪဆဲၫ့ လၧစဲဒၧၫ့လဂၩအအီၪနီၪလီၫ. လၧမီၪစအံၫလဲၡၫအဆိၩနီၪ, ၦခံၫထူၬဆၫအၧၩ့အီၪ လါနၫ့အၪဂၩလၧၦအံၫစရ့လၭဖိၪၥံၪအကျၩတၭ, ဆၧမၩဆံၫ့ဝ့ၫနးဂၩအ့ၬ, မၩဆံၫ့ထၪ့ဝ့ၫန့ၫ ၦစံရအၫ ဖိၪစနၫအမၫ့လဂၩနီၪလီၫ.-
ၦအီၪလၧၥရိၬဖၧၩ့နါဂၧၫ့ ဆၧလဖၪနီၪတၭ, အၥၭထၪ့ထီးအလူၬဎွ့ၩတံၭတၭ, ဂဲထုၪ့နၫ့ထၪ့ခွံၬ အဝ့ၫဒၪလၧဒိၩ့ဖၧၩ့လၧခီၫ့တၭ, လ့ၩၥိၫ့ဝ့ၫလၧခိၪလီၩ့ လၧအမၩထၪ့အဒိၩ့ လၧအလီၩ့အထိၭနၫနီၪ, ဘဲၫၥိၭအမိခွံၬလၩ့ခွံၬအဝ့ၫဒၪလီၫ.- မွဲလါနၫ့တၭ, အဝ့ၫဒၪလဂၩခၫ့ထ့ၬဝ့ၫလၧအဝ့ၫၥံၪအၥၭကျၩတၭ, စဲၪ့ထၪ့ခွံၬဝ့ၫဒၪလီၫ.