ယ့ၫၡူၬမၩဘျၪထဲၩ့ၦအၪဂၩ

အဝ့ၫဒၪစဲၪ့ထၪ့ခွံၬလၧၥရိၬဖၧၩ့နီၪ, လ့ၩနုၬဝ့ၫလၧ စစဲမၧၫ့အဂံၪ့ဖၧၩ့တၭ, စစဲမၧၫ့အမံၩ့ၡါမုၪနီၪဘၪဆၧ ဆူၪဂိၬနၭမၬတၭ, ၦလဖၪနီၪ အၪ့ကံၩ့အၪ့ယၫန့အဂးလၧအဝ့ၫနီၪလီၫ.- အဝ့ၫဒၪဆၧၫ့ထုၪ့လၧအဂၩ့ထံၭတၭ အၪ့လၬဆၧဆူၪဂိၬနီၪ, ဆၧဆူၪဂိၬစဲၪ့ထၪ့ခွံၬလၧအလီၩ့တၭ, မွဲအဂဲထုၪ့ထဲၩ့ဝ့ၫချဲၫ့မၬတၭ, မၩဆၧအခ့ၫအၡၩအဆၧမၩလၧအဝ့ၫၥံၪအဂးလီၫ. 
ထီးမုလၩ့နုၬနီၪ, ထီးဒၪၦလၧအလကဲၪဘၪဒဲအဘၪဆၧဆၫလမံၩ့လါလါနီၪ, ၦဂဲၫဆိၬဝ့ၫလၧအအီၪတၭ, အဝ့ၫဒၪအီၪက့ၪထၪ့အစူၪ လၧအလီၩ့လဂၩဘၪလဂၩဆုၬဆုၬတၭ, မၩဘျၪထဲၩ့အဝ့ၫၥံၪလီၫ. ဆၧနၪစဲၪ့ထၪ့ခွံၬဝ့ၫ လၧၦၡၩအၪဂၩအလီၩ့တၭ, ကိၭၡၭထၪ့ဆၧစံၭဝ့ၫဒၪ, နဝ့ၫဒၪယီၩနမွဲယွၩအဖိၪခွၫ နီၪလီၫ. အဝ့ၫဒၪအၪ့လၬအဝ့ၫၥံၪတၭ, ဒုၭချဲၩ့ဝ့ၫဆၧနးမံၩ့အ့ၬ. အဂဲးဘဲၫယီၩ အဝ့ၫၥံၪၥ့ၪယၫလၧအမွဲဎရံၬနီၪလီၫ. 
ထီးဆၧဖၩ့ထၪ့နီၪ, အဝ့ၫဒၪစဲၪ့ထၪ့ခွံၬဝ့ၫ လ့ၩထီၩ့လၧမံၩ့လၬကျၩ ၦခမျၧးအၪ့ဎၬဝ့ၫတၭ, လ့ၩဝ့ၫထီၩ့လၧအအီၪနီၪ, ယၭထၬဝ့ၫဘဲၫၥိၭအထီၩ့စဲၪ့ထၪ့ခွံၬလၧ အအီၪလဂ့ၩလီၫ.- အဝ့ၫဒၪစံၭအဝ့ၫၥံၪ, ယဘၪလီၩ လၩ့လၬလၩ့ယွၩအဘၩ့အမုး အဆၧၥၭထိၬအပရၧၫ့ လၧဒိၩ့အဂူၫဂၩအဖၧၩ့ဆ့လီၫ. အဂဲးဘဲၫယီၩမွဲလၧ ဆၧနီၪအကၠီၩ့တၭ, ဆၧအၪ့မၧၫ့လၩ့ယၧၩလီၫ. တၭမွဲအလီၩလၩ့လၬလၩ့ဆၧ လၧဂၫလလံၫအၥရိၬလဖၪအဖၧၩ့လီၫ.