ယ့ၫၡုၬၥူၫဝၭအထံၩအဖျဲလဖၪအခၪ့.

ဘိၪ့လ့ၩဖၬနီၪ လချႃၭဘၪဒံၭဘၪတၭႇ ယ့ၫၡုၬ ၥ့ၪယၫလၧအမုအလၩဘၪယူၭ လၧအမိဘၪစဲၪ့ဒၪ အလးလၧဂၪ့ခိၪချိၫ့ယီၩ ထဲၩ့ထၪ့လၧဖါအအီၪနီၪႇ မွဲအအဲၪအခ့ၫအၡၩဒၪဝ့ၫ လၧအအီၪလၧဂၪ့ခိၪချိၫ့ယီၩတၭ အဲၪဝ့ၫထီးအထုၬလီၫ.- အၪ့ဆၧလၧဂၪလခီၫအဘိၩ့ဘၭနီၪႇ မုၪခီၩလဲးဒုၭနုၬဆၧလၧစစဲမၧၫ့အဖိၪ ခွၫစယုဒၭအံၭစကၫရအၧၭလဂၩအၥၭ ဘဲၫၥိၭအမိ ဖ့ၪလၫ့ခွံၬအဝ့ၫဒၪလီၫ.

 ယ့ၫၡုၬၥ့ၪယၫဝ့ၫလၧဖါ ဖ့ၪလၫ့ယူၭ ကယဲဆၧထီးအလူၬလၧအစူၪဖၧၩ့ႇ ဒဲလၧအဂဲၫလၩ့ဝ့ၫလၧယွၩအအီၪတၭႇ မိထဲၩ့ထၪ့ဝ့ၫလၧယွၩအအီၪနီၪႇ- ဂဲထုၪ့လၧအအၪ့ဆၧလၧဂၪလခီၫတၭႇ ဘဲၪ့လၩ့ခွံၬအဖၬဘဲၩ့လၧအလီၩ့နီၪႇ ခဲးထူၬထၪ့ဆၧကဲၩ့ယၬလၧအယးဒံၩ့လီၫ.- အနီၪဂီၩ့တၭႇ ဂါလၩ့ထံၫလၧအံၪ့ဒိၫ့ဖၧၩ့တၭႇ ၥူၫဝၭခွံၬအထံၩအဖျဲၥံၪအခၪ့တၭ, ထူၭခွံၬဝ့ၫလၧဆၧကဲၩ့ယၬလၧအခဲးထူၬဝ့ၫလၧအယးဒံၩ့ နီၪလီၫ.

  မၩအၥၭဘဲၫနီၪတၭႇ ဂဲၫလၧစစဲမၧၫ့ပံတၧၫလဂၩအအီၪနီၪႇ အဝ့ၫဒၪစံၭကဆါဧ့ႇ မွဲနမိၥူၫဝၭယခၪ့ဆ့ဧၪ.- ယ့ၫၡုၬချဲၩ့ဆၧၫ့ဆၧတၭႇ စံၭအဝ့ၫ ဆၧလၧယမၩဘိၩ့နဲၪ့ယီၩနၥ့ၪယၫအ့ၬ. အ့ၪမွဲလၧဆၧလဖၪယီၩ အလးခဲၫ့နမိၥ့ၪယၫလီၫ.- စပံတၧၫစံၭဝ့ၫႇ ယမိဖ့ၪလၫ့ နၥူၫဝၭခွံၬယခၪ့လၩလါအ့ၬ. ယ့ၫၡုၬချဲၩ့ဆၧၫ့အဝ့ၫႇ ယအ့ၪလၥူၫဝၭခွံၬဘၪနၧၩနီၪ နဘၪဆဲၫ့လၧယၧၩအ့ၬ. တၭစစဲမၧၫ့ပံတၧၫစံၭဝ့ၫႇ ကဆါဧ့ႇ န့ၫယခၪ့ယီၩ လကၭလၧၩ့ႇ မွဲယစူၪဒဲယခိၪဎွံၪဆ့ဆံၭ.- ယ့ၫၡုၬစံၭအဝ့ၫႇ ၦလၧအအၪ့လုထံၫဂီၩ့နီၪႇ အ့ၪလမွဲဘၪအခၪ့တၭႇ ၥူၫဝၭခွံၬအလးအီၪအ့ၬ. မွဲအဆံၫ့ဝ့ၫထၧၫ့ဂၩယၫလီၫ. နၥံၪဝ့ၫယီၩ နၥံၪဆံၫ့လါနၫ့ဘိၩႇ မွဲကိၭဂၩ ဒ့ၭအ့ၬ.

အဂဲးဘဲၫယီၩႇ မွဲအၥ့ၪယၫၦလၧအမိဖ့ၪလၫ့ခွံၬဝ့ၫလဂၩနီၪႇ အခိးမွဲအစံၭဝ့ၫႇ နၥံၪဆံၫ့ကိၭဂၩဒ့ၭအ့ၬ.

မၩအၥၭဘဲၫနီၪတၭႇ ထီးအၥူၫဝၭခွံၬအဝ့ၫၥံၪအခၪ့ဂီၩ့တၭႇ ကီၩ့ထၪ့ထဲၩ့အဖၬဘဲၩ့နီၪဆၧၫ့နၩ့ဒံၩ့ခံၫ့ဒီၭ လၧစပွဲထံၭတၭႇ  စံၭအဝ့ၫၥံၪႇ ယမၩနၥံၪလၧဆၧနီၫလဲၪနီၪႇ မွဲနၥံၪနၪၥ့ၪဆ့ဧၪ.- နၥံၪကိၭယၧၩဆရၫႇ ဒဲ ကဆါတၭႇ နၥံၪစံၭဆၧနီၪမွဲအတီၩလီၫ. အဂဲးဘဲၫယီၩယမွဲဆၧနီၪလီၫ.- မၩအၥၭဘဲၫနီၪတၭ, ယဝ့ၫဒၪယီၩနၥံၪအဆရၫ, ဒဲနၥံၪအကဆါ, ယအ့ၪၥူၫဝၭခွံၬ နၥံၪအခၪ့နီၪ, နၥံၪဝ့ၫဒၪယီၩ ကြၨၭလၧနၥံၪၥူၫဝၭခွံၬလိၬနၥံၪအခၪ့ဆ့လီၫ.- အဂဲးဘဲၫယီၩဘဲၫၥိၭနၥံၪမိမၩဆၧ ဘဲၫယမၩနၥံၪအၥိၭနီၪ, ယဒုၭနဲၪနၥံၪအဒီၩ့အထ့ၬလီၫ.