ယ့ၫၡုၬလ့ၩနုၬလၩ့လၧယရုစလံၫ့ဖၧၩ့

ထီးအဝ့ၫၥံၪလ့ၩဘူၭထၪ့ လၧယရုစလံၫ့တၭ, ထီၩ့ဝ့ၫလၧဘ့ၥဖၭ လၧခိၪလီၩ့အလဲအိၫ့နီၪတၭ, ယ့ၫ ရှူၬအၪ့မၧၫ့လၩ့အထံၩအဖျဲနံၫဂၩ,- စံၭအဝ့ၫၥံၪ လ့ၩလၧတဝၫ့အီၪတီၩလၧနၥံၪအမ့ၬယၫဘီၪး နၥံၪမိဒၪ ဆၧချဲၫ့မၬလၧကၥ့ၪယီၩ့လဒုၩ ဘၪဆၧစၧၩ့ထၬဝ့ၫ အီၪလၧအဖိၪလဒုၩလီၫ. ကွဲၪလၩ့ခွံၬတၭ,ဂဲၫထဲၩ့မီၩ့ လၧ ယအီၪယီၩဆံၭ.- ၦလဂၩဂၩအ့ၪစံၭနၥံၪလမံၩ့မံၩ့တၭ,စံၭနၥံၪဝ့ၫ,ကဆါန့ဘၪဝ့ၫအလးအီၪတၭ, အဝ့ၫ ဒၪမိဖ့ၪလၫ့ဝ့ၫချဲၫ့မၬလီၫ. ဆၧထီးအလူၬယီၩ မၩအၥၭဘဲၫမီၪ အလူအထၫ မိလၧၫ့ထၪ့ဎွ့ၩထၪ့အၥိၭ,စံၭဝ့ၫဒၪ, လီၩဘၪဇံအိၫ့အဖိၪမုၪ, ယိခွါ,နစဎွၩဂဲၫလၧနအီၪ, အၥုၪ့ဆၧၩ့အၥၭဆၧၩ့ဒဲထူၬကၥ့ၪယီၩ့, ကၥ့ၪယီၩ့လၧၦအၪ့မၧၫ့ဝ့ၫအဖိၪဖၫ, ကၥ့ၪယီၩ့အဖိၪလီၫ. 
အထံၩအဖျဲလဖၪနီၪ လ့ၩမၩဝ့ၫဘဲၫယ့ၫရှူၬမၪလူၬဝ့ၫအၥိၭ,- မီၩ့ကၥ့ၪယီၩ့ဒဲအဖိၪတၭ,ဒၩလၩ့အကီၩ့ အၥိၭလၧအလီၩ့တၭ, ဒုၭဆၧၫ့နၩ့အဝ့ၫဒၪ လၧအဖၫ့ခိၪလီၫ.- ၦခမျၧးဖၭဒိၪလဖၪဒၩလၩ့အကီၩ့အၥိၭလၧဖၧၩ့ၥၭတၭ, အဂူၫဂၩလနၩ့နၩ့ ဖ့ၬလၩ့ၥံၪ့ထဲၩ့တၭ, လုလဲလၩ့ဝ့ၫလၧဖၧၩ့ၥၭလီၫ.- ၦခမျၧးလၧအလ့ၩလၧယၫ, ဒဲလ့ၩလၧခဲၫ့လဖၪနီၪ ကိၭၡၭထၪ့တၭ, စံၭဝ့ၫဒၪ, စဒၫဝံၭအဖိၪခွၫဧ့, ထိးထဲၩ့တၩ့ထဲၩ့ဘိၩ့နဲၪ့ယီၩဆံၭ. ၦလၧအဂဲၫလၧကဆါအမံၩ့လဂၩယီၩ, မွဲအဘၪဆိၪဂ့ၩဆံၭ. ထိးထဲၩ့တၩ့ထဲၩ့ဘိၩ့နဲၪ့ယီၩ လၧဆၧထီၫထုၬဆံၭ.- 
ထီးအလ့ၩနုၬဝ့ၫလၧယရုစလံၫ့အဖၧၩ့တၭ, ၦတုၩ့ထၪ့တုၩ့လၩ့ဆၧ ထၧၫ့ဒိၩ့ယၫတၭ, စံၭဝ့ၫဒၪ, အယီၩမွဲပလၫလဂၩလဲၪ.- ၦခမျၧးၥံၪစံၭဝ့ၫဒၪ, အယီၩမွဲယ့ၫရှူၬမီၪလဂၩနီၪ, ဂဲၫလၧနၭဇရ့ၭလၧ ဂၫလလံၫအဖၧၩ့နီၪလီၫ.