ယ့ၫၡုၬလီၩဆိၫဝဲၩၦလၧကဖ့ၪလၫ့ခွံၬအဝ့ၫ.

ဆၧနီၪလဖၪ ယ့ၫၡုၬလီၩဘၪဝ့ၫဂီၩ့ႇ အၥုၪ့ခိအၥၭဝီၩတၭႇ ထိးအၥၭစံၭဝ့ၫဒၪႇ ယလီၩဘၪနၥံၪတီၩတီၩလီၩ့လီၩ့ႇ ၦအီၪလၧနၥံၪအကျၩလဂၩ မိဖ့ၪလၫ့ခွံၬယၧၩလီၫ.- မွဲအစံၭၦလၫလဂၩလဲၪနီၪ အထံၩအဖျဲၥံၪအၥၭဂံၩ့ဂၩ့ဝ့ၫတၭႇ ယိလိၬအၥၭလီၫ.-

အထံၩအဖျဲ လၧယ့ၫၡုၬအဲၪဝ့ၫလဂၩနီၪ ဆၧၫ့နၩ့ဒံၩ့ခံၫ့လၧ ယ့ၫၡုၬအၥၭနၫအလီၩ့လီၫ.- မၩအၥၭဘဲၫနီၪတၭႇ ဘဲၫၥိၭအမိအၪ့စၪ့အဝ့ၫလဂၩႇ လၧအစံၭပလၫလဂၩလဲၪနီၪႇ စစဲမၧၫ့ပံတၧၫဖျၭလၩ့စိၩအခိၪလၧအအီၪလီၫ.

 မၩအၥၭဘဲၫနီၪတၭႇ အဝ့ၫနီၪမံၫနၩ့ဒိၭနဲၩ့အၥၭလၧ ယ့ၫၡုၬအၥၭနၫအလီၩ့တၭႇ စံၭအဝ့ၫဒၪကဆါဧ့ႇ မွဲပလၫလဂၩလဲၪ.- ယ့ၫၡုၬချဲၩ့ဆၧၫ့ဝ့ၫႇ ထီးယအ့ၪဘၧၩ့လၩ့ဆၧလမိၩဖ့ၪလၫ့ၦလဂၩႇ မွဲအဝ့ၫနီၪလီၫ. ဘၧၩ့လၩ့ဆၧလမိၩဂီၩ့နီၪႇ ဖ့ၪလၫ့ဝ့ၫလၧစစဲမၧၫ့အဖိၪခွၫ စယုဒၭအံၭစကၫရအၧၭနီၪလီၫ.- ဆၧလမိၩနီၪအလးခဲၫ့တၭႇ မုၪခီၩလဲးဂဲၫနုၬလၧအဖၧၩ့လီၫ. မၩအၥၭဘဲၫနီၪတၭႇ ယ့ၫၡုၬစံၭအဝ့ၫႇ နမၩဆၧနီၪ မၩနဝ့ၫချဲၫ့ချဲၫ့ဆံၭ.

မွဲဘၪနီၫလၧအစံၭအဝ့ၫဒၪ လၧဆၧဘဲၫနီၪလဲၪႇ ၦဆၧၫ့နၩ့ဒံၩ့ခံၫ့ လၧစပွဲထံၭလဖၪနီၪ ၥ့ၪယၫဝ့ၫနးဂၩအ့ၬ.- အဂဲးဘဲၫယီၩ လနၩ့နၩ့ဆီၫ့မီၪ့ဝ့ၫႇ မွဲလၧစယုဒၭဆိၬထိၪ့တၭႇ ယ့ၫၡုၬစံၭအဝ့ၫလၧ အဘၪဎွ့ၩဆၧလမံၩ့မံၩ့လၧ အကြၨၭအီၪလၧဆၧဘိၪ့အဂးႇ အ့ၪလမွဲဘၪဘဲၫနီၪတၭႇ လၧအမိဘၪဖ့ၪလၫ့ ၦၡၪ့ဖိၪအဆၧလမံၩ့မံၩ့လီၫ.- မၩအၥၭဘဲၫနီၪတၭႇ အဝ့ၫဒၪဒိၭန့ဆၧလမိၩနီၪဂီၩ့တၭႇ စဲၪ့ထၪ့ခွံၬဝ့ၫချဲၫ့မၬတၭႇ မွဲလၧမုနၩလခီၫလီၫ.

ထီးအဝ့ၫစဲၪ့ထၪ့ခွံၬနီၪႇ ယ့ၫၡုၬစံၭဝ့ၫႇ ၦၡၩအဖိၪခွၫ အလၩအဖၩ့အီၪဖျီၪထၪ့ဝ့ၫဘိၩ့နဲၪ့ယီၩတၭႇ ယွၩအလၩအဖၩ့ အီၪဖျီၪလၧအဖၧၩ့ဆ့လီၫ.- ယွၩအလၩအဖၩ့အ့ၪအီၪဖျီၪလၧအဖၧၩ့တၭႇ ယွၩမိဒုၭအီၪဖျီၪအဝ့ၫနီၪ အလၩအဖၩ့လၧအနၫ့ဆါဒၪဝ့ၫအဖၧၩ့ဆ့လီၫ. တၭမိဒုၭအီၪဖျီၪထၪ့အလၩအဖၩ့ချဲၫ့ချဲၫ့လ့ၬလီၫ.

ဖိၪၥံၪလံၩၥံၪဧ့ႇ ယအီၪဒံၭလၧနၥံၪအၥိၭ မီခိၬဒံၭတၭႇ နၥံၪမိအၪ့ဎၬယၧၩတၭႇ ဘဲၫယလီၩဘၪၦယုဒၫဖိၪၥံၪအၥိၭနီၪႇ ဘိၩ့နဲၪ့ယီၩ ယလီၩဘၪထဲၩ့နၥံၪဆ့တၭႇ လၧယလ့ၩဆၧအလးနီၪနၥံၪလ့ၩၥ့ၪအ့ၬ.- 

စစဲမၧၫ့ပံတၧၫစံၭဝ့ၫႇ ကဆါဧ့ႇ မွဲနမိလ့ၩခီၫခီၫလဲၪ. ယ့ၫၡုၬချဲၩ့ဆၧၫ့ဝ့ၫႇ မွဲယမိလ့ၩခီၫခီၫလဲၪနီၪႇ ဘိၩ့နဲၪ့ယီၩနဖိၬယခဲၫ့ၥ့ၪအ့ၬ. အ့ၪမွဲလၧယၫလခီၫ နဖိၬယခဲၫ့မိၥ့ၪလီၫ.- စပံတၧၫစံၭအဝ့ၫႇ ကဆါဧ့ႇ မွဲဘၪနီၫလၧ ယဖိၬနခဲၫ့ ဘိၩ့နဲၪ့ယီၩလၥ့ၪဘၪလဲၪ. ယမိအီၪက့ၪလၩ့ခွံၬယၥၭမၧၫ့လၧနကၠီၩ့လီၫ.- ယ့ၫၡုၬချဲၫ့ဆၧၫ့ဝ့ၫႇ မွဲနမိအီၪက့ၪလၩ့ခွံၬ နၥၭမၧၫ့လၧယကၠီၩ့ဆ့ဧၪ. ယလီၩဘၪနၧၩတီၩတီၩလီၩ့လီၩ့ယီၩႇ ဆၫ့ဖၫလချႃၭ အီၩ့အိၪထၪ့ဒံၭဘၪနီၪႇ နမိမီၪ့ဘံၭယၧၩနးၥၧၫ့ဖၧၫ့လီၫ.