ယ့ၫၡုၬမၩဘျၪထဲၩ့ ၦရိမၫအၥုၭခိၪလဂၩအခ့ၫအၡၩ.

အဝ့ၫဒၪလီၩလၩ့လၬလၩ့ၦၡၩ လၧဆၧချဲၩ့နီၪ ထီးအလူၬဂီၩ့တၭ, လ့ၩနုၬဝ့ၫလၧကပၧနအၫ့ အဖၧၩ့လီၫ.- ၦၥုၭဖိၪလယၩအခိၪအခ့ၫအၡၩ လၧအအဲၪဝ့ၫလဂၩနီၪ, ဘၪဆၧဆၫထီးအလၩ့ဘူၭလၧအမိၥံၫလီၫ. အဝ့ၫဒၪနါဂၧၫ့ယ့ၫၡှူၬအဂဲးတၭ, အၪ့မၧၫ့ၦယုဒၫဖိၪ အၥၭၡါလဖၪလ့ၩလၧအအီၪ အၪ့ကံၩ့အၪ့ယၫအဝ့ၫ ဘဲၫၥိၭအမိဂဲၫမၩဘျၪထဲၩ့အခ့ၫအၡၩလီၫ.- ၦလဖၪ နီၪ ဂဲၫလၧယ့ၫၡုၬအအီၪတၭ, အၪ့ကံၩ့အၪ့ယၫဝ့ၫတၡါၡါစံၭဝ့ၫဒၪ, ၦလဂၩလၧနမိမၩဆၧလမံၩ့ယီၩလၧအဂး,မွဲအကြၨၭဆ့လီၫ.- အဂဲးဘဲၫယီၩအဲၪပဆၨၩယီၩတၭ, အနၫ့ဆါၥုၪ့န့ယူၭၥရိၬလဖျိၪ့လၧပဂးယူၭ.
ယ့ၫၡှူၬလ့ၩလၧအဝ့ၫၥံၪအၥိၭလီၫ. ထီးအအီၪလယဲၩ့ဘၪလၧဂံၪ့နီၪတၭ, ၦၥုၭဖိၪလယၩအခိၪလဂၩ နီၪ, အၪ့မၧၫ့အထံၩအၥိၭလဖၪလ့ၩလၧအအီၪစံၭဝ့ၫ, ကဆါဧ့, ထီးမၩပွံၭနၥၭလဂ့ၩ, အဂဲးဘဲၫယီၩ နဂဲၫနုၬလၧယဂံၪ့ခိၪအဖၫ့လၬယီၩ, ယကြၨၭအ့ၬ.- ဘဲၫနီၪအၥိၭယကြၨၭလ့ၩယဝ့ၫလၧနအီၪဆ့အ့ၬ. မွဲလါနၫ့ဘိၩချဲၩ့ဆၧနးထံၪတၭ, ယခ့ၫယၡၩမိဘျၪထဲၩ့ဝ့ၫဒၪလီၫ.- အဂဲးဘဲၫယီၩ ယဝ့ၫဒၪယီၩ ယမွဲၦလၧဆၧအီၪက့ၪယၧၩ လၧဆၧအစီၩ့အမၩ့ အဖၫ့လၬလါနၫ့ဘိၩ, ၥုၭဖိၪၥ့ၪဖိၪအီၪလၧယဖၫ့လၬတၭ, အယီၩလဂၩယစံၭ,လ့ၩဘီၪ. တၭလ့ၩဝ့ၫး အနီၪလဂၩ, ဂဲၫဘီၪ, တၭဂဲၫဝ့ၫး ယဎီးယၡၩနီၪ, မၩဆၧယီၩဘီၪ,တၭမၩဝ့ၫလီၫ.- 
ဆၧလဖၪနီၪယ့ၫၡုၬနါဂၧၫ့တၭ, ထီၫမံၫထီၫမၪဝ့ၫတၭ, ကၠၪစိၩအၥၭလၧၦဖိၬအခဲၫ့အအီၪ, စံၭၦခ မျၧးနီၪ,ယစံၭနၥံၪယီၩ, လၧအံၫစရ့လၭ အဖၧၩ့ဒၪလ့ၬနီၪ,ဆၧနဲၩန့ၫယီၩယဒၪဘၪဒံၭအ့ၬ.
ၦလၧဆၧအၪ့မၧၫ့လၩ့ဝ့ၫလဖၪနီၪ, ထဲၩ့ထဲၩ့ဝ့ၫလၧ အဂံၪ့တၭ, ဒၪဘၪဆၧအခ့ၫအၡၩ လၧအဆၫလဂၩ နီၪ,အီၪဆီၪ့အီၪချဲၫ့ဝ့ၫလီၫ.