ယ့ၫၡုၬဘၩဆိၪဖၪဆၧ လၧအထံၩအဖျဲလဖၪအဂး

ယ့ၫၡုၬယိထၪ့ဆၧလၧမူၭခိၪတၭ, စံၭဝ့ၫ, ဖါဧ့,နၩရံၩဘၪယူၭ, ဘဲၫနဖိၪခွၫမိဒုၭလၩဖၩ့နၧၩအၥိၭနီၪ, ဒုၭဖျီၪထၪ့ နဖိၪခွၫအလၩအဖၩ့ဆံၭ.- ဘဲၫနဖ့ၪလၫ့အဝ့ၫဒၪလၧအစီၩ့အမၩ့ လၧကယဲဆၧအယၪထီးအလူၬအဖၫ့ခိၪအၥိၭနီၪ, ဘဲၫနီၪအၥိၭ, အဝ့ၫဒၪမိဖ့ၪလၫ့ ကယဲၦလၧနဖ့ၪလၫ့ဝ့ၫ လၧအစူၪဖၧၩ့လဂၩလါလါနီၪ, လၧဆၧမၧၫ့အဆိၩအကၠၪနီၪလီၫ.- တၭဆၧမၧၫ့အဆိၩအကၠၪနီၪမွဲအယီၩ, ဆၧၥ့ၪယၫလၧနမွဲယွၩလဂၩဎးလၩ့ထံးလၩ့ဆ့ၭ, ဒဲယ့ၫၡုၬဎရံၬလၧနအၪ့မၧၫ့လၩ့နီၪလီၫ.- ယဒုၭလၩဖၩ့ယူၭနၧၩလၧဂၪ့ခိၪချိၫ့ယီၩယူၭ, ဆၧမၩလၧနဖ့ၪလၫ့ယၧၩ လၧယဘၪမၩနီၪယမၩဂီၩ့ယူၭ.- ဘိၩ့နဲၪ့ယီၩ, ဖါဧ့,ဒုၭလၩဒုၭဖၩ့ယၧၩ လၧနနၫ့ဆါဒၪနဝ့ၫ လၧဆၧလၩဆၧဖၩ့လၧအအီၪလၧယလီၩ့ လၧယအီၪလၧနၥိၭ လၧဂၪ့ခိၪလချႃၭကဲၪထၪ့ဒံၭဘၪနီၪဆံၭ.- 
ၦၡၩၥံၪလၧနဖ့ၪလၫ့ယၧၩလၧဂၪ့ခိၪဖိၪအကျၩနီၪ, ယဒုၭဖျီၪထၪ့ယူၭနမံၩ့ လၧအဝ့ၫၥံၪအမ့ၬယၫနီၪလီၫ. အဝ့ၫၥံၪ မွဲနဆၧတၭ, နဖ့ၪလၫ့ယူၭအဝ့ၫၥံၪလၧယစူၪဖၧၩ့ယူၭ. အဝ့ၫၥံၪထီးန့ယူၭနလူနထၫယူၭလီၫ.- ဘိၩ့နဲၪ့ယီၩ အဝ့ၫၥံၪၥ့ၪယၫလၧထီးဒၪ ဆၧလၧနဖ့ၪလၫ့ယၧၩ ထီးအလူၬနီၪ, ဂဲၫလၩ့လၧနအီၪအလးလီၫ.- အဂဲးဘဲၫယီၩ ဆၧချဲၩ့လၧနဖ့ၪလၫ့ယၧၩလဖၪနီၪ, ယဖ့ၪလၫ့ထဲၩ့ အဝ့ၫၥံၪတၭ,အဝ့ၫၥံၪမၩန့ထဲၩ့ဝ့ၫတၭ, ၥ့ၪယၫလၩ့ထံးလၩ့ဆ့ၭ လၧယဂဲၫလၩ့လၧနအီၪတၭ, နဲၩဝ့ၫလၧနအၪ့မၧၫ့လၩ့န့ယၧၩလီၫ.- ယအၪ့ကံၩ့န့အဝ့ၫၥံၪအဂးတၭ, ယလအၪ့ကံၩ့န့ဘၪ ၦဂၪ့ခိၪဖိၪၥံၪအဂးနီၪး အ့ၪမွဲလၧၦလၧနဖ့ၪလၫ့ယၧၩလဖၪနီၪအဂးလီၫ. အဂဲးဘဲၫယီၩ အဝ့ၫၥံၪမွဲနဆၧလီၫ.- ကယဲယဆၧထီးအလူၬနီၪမွဲနဆၧ,နဆၧလဖၪနီၪ မွဲယဆၧတၭ, ယလၩယဖၩ့အီၪဖျီၪဝ့ၫလၧအဖၧၩ့လီၫ.- ယဝ့ၫဒၪယီၩ ယအီၪလၧၩ့လၧဂၪ့ခိၪချိၫ့ယီၩအ့ၬ. အ့ၪမွဲအဝ့ၫၥံၪယီၩ, မိအီၪဒံၭလၧဂၪ့ခိၪချိၫ့, အ့ၪမွဲယဝ့ၫဒၪယီၩ ယမိထဲၩ့ထၪ့လၧနအီၪလီၫ.