ယ့ၫၡုၬနဲၪဖျီၪထၪ့အၥၭလၧၦလဆံၫလဂၩ.

နွ့ၫနံၩအကျၩ မုခၪ့ထံၭအနံၩဂီၩဂီၩလ့ၬ အဝ့ၫဒၪဂဲထုၪ့ထဲၩ့တၭ, ဒုၭနဲၪဆိၫအၥၭ လၧနးမၫရံၫမၭဂဒၫ လံနံၫလၧအနၫ့ထၪ့ခွံၬယူၭ ဆၧနၪနွ့ၫဒုၩလၧအလီၩ့လဂၩနီၪလီၫ.- ၦအီၪဝဲၩဝ့ၫလၧယ့ၫၡုၬအၥိၭနီၪ, အၥုၪ့ခါၥၭလၩ့တၭ, ဂၪ့ဆၧယၧၩ့ဆၧအဘိၩ့ဘၭနီၪ, နးမၫရံၫလ့ၩလီၩဘၪအဝ့ၫၥံၪလီၫ.- ထီးအဝ့ၫၥံၪနါဂၧၫ့လၧ အမၧၫ့ထၪ့ထဲၩ့, ဒဲနးမၫရံၫဒၪဘၪဝ့ၫနီၪနဲၩဝ့ၫအ့ၬ.

ဆၧနီၪလဖၪအလးခဲၫ့တၭ, ၦလၧအဝ့ၫၥံၪအကျၩ နံၫဂၩစဲၪ့ဝ့ၫတၭ, လ့ၩထၪ့လၧခီၫ့နီၪ, အဝ့ၫဒၪနဲၪဖျီၪ ထၪ့အၥၭလၧအဝ့ၫၥံၪ လၧအခံးအဂၩ့လမံၩ့ဒၪလီၫ. ၦနံၫဂၩနီၪဂဲၫထဲၩ့လီၩဘၪ ၦအီၪလၩ့ထးလဖၪတၭ, အဝ့ၫၥံၪနဲၩဝ့ၫဒၪဆ့အ့ၬ.

လၧခဲၫ့ထဲၩ့နီၪ, ၦဆံၫလဂၩဆၧၫ့နၩ့ဒံၩ့ခံၫ့လၧစပွဲထံၭအဘိၩ့ဘၭတၭ, အဝ့ၫဒၪနဲၪဖျီၪထၪ့အၥၭလၧ အဝ့ၫၥံၪနီၪ, အဝ့ၫၥံၪလနဲၩဘၪ ၦလၧအဒၪဘၪဝ့ၫ လၧအဂဲထုၪ့ထဲၩ့ယူၭတၭ, လၧအဝ့ၫၥံၪအဆၧလနဲၩဘၪ ဒဲအၥၭနီၩ့အကၠီၩ့တၭ, အၪ့လၬဝ့ၫဒၪလီၫ.-

အဝ့ၫဒၪစံၭအဝ့ၫၥံၪ, လ့ၩလၧဂၪ့ခိၪချိၫ့ထၧၫ့ဖျိၪ့ယၫတၭ, လီၩလၩ့လၬလၩ့ဆၧၥၭထိၬအပရၧၫ့ လၧကယဲၦၡၩကိၭဂၩဒ့ၭဆံၭ.- ၦလၧအနဲၩ့ထဲၩ့ဆၧဒဲဒိၭဘၭတံၫဇၫ့ အၥၭလဂၩဂၩနီၪ, မိထီၩ့ဝ့ၫ လၧဆၧထိးထဲၩ့တၩ့ထဲၩ့လီၫ. အ့ၪမွဲၦလၧအလနဲၩဘၪဝ့ၫလဂၩဂၩနီၪ, မိဘၪဆၧစ့ၩရၫ့စၪလီၫ.