ယ့ၫၡုၬဒုၭနဲၪဖျီၪထၪ့အၥၭ လၧအထံၩအဖျဲနွ့ၫဂၩ.

လၧဆၧနီၪလဖၪအလးခဲၫ့တၭ, ယ့ၫၡုၬဒုၭနဲၪဒီၭအၥၭ လၧအထံၩအဖျဲၥံၪအမ့ၬယၫ လၧကွံၩတဘံရအၭအနဲၩ့ထံၭနီၪလီၫ. ဒုၭနဲၪအၥၭဘဲၫယီၩ,- စစဲမၧၫ့ပံတၧၫ, ဒဲစထီမၭလၧအကိၭဝ့ၫစဒံဒမၧၭ, ဒဲၦကၫနအၫ့ဖိၪ ဘၪဆဲၫ့လၧဂၫလလံၫ, စနၥၫ့နအ့လၭ, ဒဲစဇ့ၭဘဒံၫ အဖိၪခွၫလဖၪ, ဒဲအထံၩအဖျဲၥံၪလၧအဂူၫဂၩနံၫဂၩၥံၪ အီၪဝ့ၫလစီၪ့ဎးလီၫ.

စစဲမၧၫ့ပံတၧၫစံၭအဝ့ၫၥံၪ, ယဝ့ၫဒၪယီၩယမိလ့ၩ မၩအၪ့ယၪလီၫ. အဝ့ၫၥံၪစံၭဝ့ၫ, ပမိလ့ၩလၧနၥိၭဆ့လီၫ. အဝ့ၫၥံၪစဲၪ့ထၪ့ဝ့ၫနီၪ လ့ၩနုၬလၧချံၫဖၧၩ့ချဲၫ့မၬတၭ, မုလနၩနီၪမၩဆၧန့နးမံၩ့အ့ၬ.

မုဆဲၪ့ထၪ့တၭ ယ့ၫၡုၬဆၧၫ့ထုၪ့ လၧထံၫအနဲၩ့ထံၭလီၫ. မွဲလါနၫ့ဘိၩ အထံၩအဖျဲၥံၪၥ့ၪယၫ လၧအမွဲယ့ၫၡုၬနီၪအ့ၬ.- မၩအၥၭဘဲၫနီၪတၭ, ယ့ၫၡုၬစံၭအဝ့ၫၥံၪ, ဖိၪၥံၪလံၩၥံၪဧ့, မွဲနၥံၪအဆၧအၪ့အီၪလမံၩ့မံၩ့ဆ့ဧၪ. အဝ့ၫၥံၪစံၭဆၧၫ့ဝ့ၫအီၪအ့ၬ.- မွဲအစံၭအဝ့ၫၥံၪ, ခွံၬလၩ့နၥံၪအၡၬလၧချံၫအစူၪထွ့ၪလခီၫတၭ, နၥံၪ မိဒၪဘၪဆၧလီၫ. မၩအၥၭဘဲၫနီၪတၭ, အဝ့ၫၥံၪခွံၬ လၩ့ဝ့ၫတၭ, ဘၪယၪအၪအၪလ့ၬအကၠီၩ့နီၪ, ကၠူၭဝ့ၫန့ အ့ၬ.

မၩအၥၭဘဲၫနီၪတၭ, အထံၩအဖျဲၥံၪလၧယ့ၫၡုၬအဲၪဝ့ၫလဂၩနီၪ, စံၭစပံတၧၫ, မွဲကဆါနီၪလီၫ. စပံတၧၫနါဂၧၫ့လၧအမွဲကဆါနီၪ လၧအအီၪဘိၪ့အကၠီၩ့တၭ, ၥိၭထၪ့ထဲၩ့အဆဲၫ့ဂီၩ့တၭ, ဖုၫလၩ့ဝ့ၫလၧမၫဆမံၭအဖၧၩ့လီၫ.- အ့ၪမွဲအထံၩအဖျဲဂူၫဂၩၥံၪ အီၪလယဲၩ့ဘၪလၧခီၫ့တၭ ဂဲၫဝ့ၫလၧချံၫလဖျိၪ့အဖၧၩ့တၭ, ကၠူၭၡၬ အီၪဝ့ၫလၧယၪလဖၪလၧအဖၧၩ့လီၫ.

မၩအၥၭဘဲၫနီၪတၭ, ထီးအထီၩ့လၧခီၫ့နီၪ အဝ့ၫၥံၪဒၪဘၪမ့ၪအၧၩ့ဖၭ အီၪဝဲၩထီးနီၪလပိၩ့, ဒဲယၪအီၪလၧအဖၫ့ခိၪ,ဒဲကိၪဆ့လီၫ.- ယ့ၫၡုၬလီၩဘၪအဝ့ၫၥံၪ, ဂဲၫဆိၬယၪလၧနၥံၪမၩန့ဘိၩ့နဲၪ့ယီၩလနၩ့ဘီၪ.- စစဲမၧၫ့ပံတၧၫထၪ့လၧချံၫဖၧၩ့တၭ ၡၬလၧအဎွ့ၩထၪ့လၧ ယၪဖၭဒိၪလယၩယဲဆံၫၥၧၫ့ဘံၪ့နီၪ ကၠူၭထၪ့ဝ့ၫလၧခီၫ့လီၫ. မွဲအအၪဎွ့ၩနီၪလါနၫ့ဘိၩ ၡၬနီၪယၬဝ့ၫအ့ၬ.

ယ့ၫၡုၬစံၭအဝ့ၫၥံၪ, ဂဲၫအၪ့ဆၧလၧဂီၩအၪ့ဘီၪ. အထံၩအဖျဲၥံၪၥ့ၪယၫလၧ အမွဲကဆါနီၪအၪ့စၪ့ဝ့ၫ, နဝ့ၫဒၪနမွဲပလၫလဂၩလဲၪနီၪဘုၪ့နးဂၩအ့ၬ.- ထီးနီၪလဖၧၫ့ ယ့ၫၡုၬဂဲၫဝ့ၫနီၪ, မၩန့ကိၪတၭ, ဖ့ၪလၫ့အဝ့ၫၥံၪ, ဒဲယၪဘဲၫနီၪၥိၭဆ့လီၫ.- ယ့ၫၡုၬဂဲထုၪ့ထဲၩ့ဝ့ၫလၧဆၧၥံၫနီၪ ဒုၭနဲၪအၥၭလၧအထံၩအဖျဲၥံၪလဖၧၫ့ယီၩ, မွဲအဎွ့ၩထၪ့ၥၧၫ့ဖၧၫ့လဖၧၫ့လီၫ.