ဖိၪခွၫအစီၩ့အမၩ့.

မၩအၥၭဘဲၫနီၪတၭႇ ၦယုဒၫဖိၪမၩအၧၩ့မၩနၭယ့ၫၡုၬလီၫ. အဂဲးဘဲၫယီၩ မွဲအမၩဆၧနီၪလဖၪလၧမးၥံၫအနံၩ အကၠီၩ့နီၪလီၫ.
 ယ့ၫၡုၬချဲၩ့ဆၧၫ့အဝ့ၫၥံၪႇ ယဖါမၩဆၧခီးဘိၩ့နဲၪ့ယီၩတၭႇ ယဝ့ၫဒၪယမၩဆ့လီၫ.- မၩအၥၭဘဲၫနီၪတၭႇ ယ့ၫၡုၬလၨၪခၫ့ဖၬမးၥံၫအနံၩနီၪ လကၭလၧၩ့တၭး စံၭဝ့ၫႇ လၧယွၩနီၪမွဲအဖါဒၪဝ့ၫတၭႇ မၩန့ၫဎီၩ့အၥၭလၧယွၩနီၪအကၠီၩ့ ၦယုဒၫဖိၪလဖၪ အၪ့ဎူၫအၪ့ဎၬမၩၥံၫ အဝ့ၫအၪနဲၪ့အလးဒံၭလီၫ.
မၩအၥၭဘဲၫနီၪတၭႇ ယ့ၫၡုၬချဲၩ့ဆၧၫ့ဆၧႇ စံၭအဝ့ၫၥံၪႇ ယလီၩဘၪနၥံၪတီၩတီၩလီၩ့လီၩ့း ဖိၪခွၫမၩအဆၧဒၪဝ့ၫၥ့ၪနးမံၩ့အ့ၬ. မၩၥ့ၪန့ၫဆၧလၧအဒၪဘၪ ဖါမၩဝ့ၫလီၫ. အဂဲးဘဲၫယီၩ ထီးဒၪအဝ့ၫဒၪမၩဆၧလမံၩ့မံၩ့နီၪႇ ဖိၪခွၫမၩဝ့ၫဒၪဘဲၫနီၪအၥိၭဆ့လီၫ.- အဂဲး ဘဲၫယီၩဖါအဲၪအဖိၪခွၫတၭႇ ကယဲအနၫ့ဆါဒၪဝ့ၫ မၩဆၧထီးအလူၬနီၪႇ ဒုၭနဲၪအဝ့ၫနီၪလီၫ. တၭမိဒုၭနဲၪအဝ့ၫလၧဆၧမၩဒိၪနဲၪ့အယီၩဒံၭႇ ဘဲၫၥိၭ နၥံၪမိထီၫမံၫထီၫမၪလီၫ.- အဂဲးဘဲၫယီၩ ဘဲၫဖါဒုၭဂဲထုၪ့ထဲၩ့ဆၧတၭႇ မၩမၧၫ့ထၪ့ထဲၩ့ၦၥံၫအၥိၭနီၪ ထီးဒၪၦလၧအဖိၪခွၫ မိဒုၭမၧၫ့ထၪ့ထဲၩ့ ဘၪအၥၭလဂၩဂၩနီၪႇ မၩဝ့ၫဘဲၫနီၪအၥိၭဆ့လီၫ.- 
အဂဲးဘဲၫယီၩဖါ စ့ၩရၫ့ၦနးဂၩအ့ၬ. အ့ၪမွဲဖ့ၪလၫ့ ကယဲဆၧစ့ၩရၫ့ထီးအလူၬလၧအဖိၪခွၫအစူၪဖၧၩ့,- ဘဲၫၦထီးအလူၬ မိယူၭထၪ့ယၪ့ထၪ့ဖိၪခွၫ ဘဲၫအယူၭထၪ့ယၪ့ထၪ့ဖါ အၥိၭနီၪလီၫ. ၦလၧအလယူၭလယၪ့ဘၪဖိၪခွၫနီၪႇ မွဲအယူၭယၪ့ဖါ လၧအအၪ့မၧၫ့လၩ့န့အဝ့ၫနီၪ ဆ့အ့ၬ.
 ယလီၩဘၪနၥံၪ တီၩတီၩလီၩ့လီၩ့ႇ ၦလၧအနါဂၧၫ့ယလူယထၫတၭႇ နဲၩထဲၩ့ၦလၧအအၪ့မၧၫ့လၩ့န့ယၧၩနီၪႇ မွဲအအီၪလၧဆၧမၧၫ့လၩ့ဆိၩလၩ့ကၠၪတၭႇ လဘၪ ဘၪဆၧစ့ၩရၫ့စၪဝ့ၫတၭႇ ခၫ့ဂၬခွံၬယူၭ လၧဆၧၥံၫနီၪႇ ထီၩ့လၧဆၧမၧၫ့အဖၧၩ့လီၫ.- ယလီၩဘၪနၥံၪ တီၩတီၩလီၩ့လီၩ့ လၧအဆၧၫ့အထီမိဘၪတၭႇ ဘၪယူၭဘိၩ့နဲၪ့ယီၩယူၭႇ လၧၦအၥံၫဝ့ၫလဖၪနီၪ မိနါဂၧၫ့ယွၩအဖိၪခွၫအလူတၭႇ ၦလၧအနါဂၧၫ့ဝ့ၫလဖၪနီၪႇ မိမၧၫ့ထၪ့ထဲၩ့ဝ့ၫလီၫ.- 
အဂဲးဘဲၫယီၩ ဘဲၫဖါအီၪလၧဆၧမၧၫ့လၧအဖၧၩ့ဒၪဝ့ၫအၥိၭနီၪႇ မွဲအဒုၭအီၪဖိၪခွၫ လၧဆၧမၧၫ့လၧအဖၧၩ့ဒၪဝ့ၫဘဲၫနီၪအၥိၭဆ့လီၫ.- အဝ့ၫဒၪမွဲၦၡၩအဖိၪခွၫအကၠီၩ့နီၪႇ ဆၧဖ့ၪလၫ့အဝ့ၫ လၧဆၧအစီၩ့အမၩ့ ဘဲၫၥိၭအမိစ့ၩရၫ့ဆၧလီၫ. ထီးဆီၫ့မီၪ့လၩ့လၭနၥံၪအၥၭ လၧဆၧယီၩအကၠီၩ့လဂ့ၩႇ အဂဲးဘဲၫယီၩအဆၧၫ့အထီ မိဘၪဝ့ၫလၧကယဲၦအီၪ လၧဆၧၥွၪခိၪအဖၧၩ့ကိၭဂၩဒ့ၭနီၪႇ မိနါဂၧၫ့ဘၪအလူႇ တၭမိဂဲၫထဲၩ့ထၪ့ဝ့ၫ ၦလၧအမၩယူၭဆၧဂ့ၩလဖၪနီၪႇ လၧဆၧမၧၫ့အဆၧဂဲထုၪ့ထဲၩ့ဝ့ၫတၭႇ ၦလၧအမၩယူၭဆၧအၧၩ့လဖၪနီၪႇ လၧဆၧစ့ၩရၫ့စၪ အဆၧဂဲထုၪ့ထဲၩ့ဝ့ၫလီၫ.