ဆၧၥီၪ့လိၪဘၪဆဲၫ့ ဆၧဖ့ၪလၫ့ယၫ့ၥၭဆၧႇ ဆၧဘၩဆိၪဖၪ ဒဲဆၧဒုၪဆၧအၪ့အဂဲး.

ထီးလၩ့နၥံၪအၥၭ ဘဲၫၥိၭနၥံၪထီးမၩနၥံၪအဆၧတီၩဆၧလီၩ့ လၧၦၡၩအမ့ၬယၫ ဘဲၫအမိဒၪဘၪဝ့ၫ အၥိၭနီၪလဂ့ၩ. အ့ၪလမွဲဘၪဘဲၫနီၪတၭႇ နၥံၪအဘိၪ့အီၪလၧနၥံၪအဖါ လၧမူၭခိၪနီၪအ့ၬ.- 
မၩအၥၭဘဲၫနီၪတၭႇ ထီးနအ့ၪဖ့ၪလၫ့ဆၧယၫ့ၥၭလဖၪနီၪႇ ထီးအူၪထၪ့ခွ့ၩလၧနမ့ၬယၫႇ ဘဲၫၦအၪ့လီၫဆၧမၩဝ့ၫ လၧၥရိၬဖၧၩ့ဒဲလၧဖၧၩ့ၥၭနီၪႇ ဘဲၫၦၡၩမိစံၭထၪ့အၪ့အူၭဝ့ၫအၥိၭနီၪလဂ့ၩ. ယလီၩဘၪနၥံၪတီၩတီၩယီၩႇ အဝ့ၫၥံၪန့ဘၪအဘိၪ့ဒၪဝ့ၫလီၫ.- 
အ့ၪမွဲနဝ့ၫဒၪယီၩႇ ထီးနအ့ၪဖ့ၪလၫ့ဆၧယၫ့ၥၭနီၪႇ ဘဲၫၥိၭနဆၧဖ့ၪလၫ့ယၫ့ၥၭ ထီးအီၪဖျီၪလဂ့ၩတၭႇ ဆၧလၧနစူၪထွ့ၪမၩဝ့ၫနီၪႇ ထီးဒုၭၥ့ၪယၫနစူၪစ့ၪလဂ့ၩ.- နဖါလၧအဒၪဘၪလၧဆၧအီၪၥူၪအဖၧၩ့နီၪႇ အနၫ့ဆါဒၪဝ့ၫ မိဖ့ၪလၫ့ဆၧဘိၪ့လၧနၧၩလီၫ.
နအ့ၪဘၩဆိၪဖၪဆၧနီၪႇ ထီးအီၪဘဲၫၦအၪ့လီၫဆၧအၥိၭနီၪလဂ့ၩ. အဂဲးဘဲၫယီၩ အဝ့ၫၥံၪအဲၪဝ့ၫလၧ အဘၩဆိၪဖၪ ဆၧၫ့ထုၪ့လၧၥရိၬဖၧၩ့ႇ ဒဲလၧဖၧၩ့မုထဲၩ့ဖၭအခၪ့ထံၭ ဘဲၫအမိအီၪဖျီၪလၧၦၡၩအမ့ၬယၫအၥိၭနီၪလီၫ. ယလီၩဘၪနၥံၪတီၩတီၩယီၩႇ အဝ့ၫၥံၪန့ဘၪယူၭ အဘိၪ့ဒၪဝ့ၫလီၫ.- 
အ့ၪမွဲနဝ့ၫဒၪယီၩ ထီးနအ့ၪဘၩဆိၪဖၪဆၧနီၪႇ ထဲၩ့နုၬလၧနဒူၭဖၧၩ့တၭႇ ကၭဘံၭထၬနတရၫ့တၭႇ ဘၩဆိၪဖၪလၧနဖါလၧအအီၪၥူၪနီၪဆံၭ. နဖါလၧအဒၪဆၧ လၧဆၧအီၪၥူၪအဖၧၩ့နီၪႇ  မိဖ့ၪလၫ့ဆၧဘိၪ့လၧနၧၩလီၫ.

နၥံၪအ့ၪဒုၪဆၧအၪ့ဆၧအီၩတၭ ထီးမၩနၥံၪအမ့ၬၥံၫယူၭၥံၫယူၭ ဘဲၫၦလၧအအၪ့လီၫဆၧ အၥိၭနီၪလဂ့ၩႇ အဂဲးဘဲၫယီၩ အဝ့ၫၥံၪဘဲၫအဒုၪဆၧအၪ့ဆၧအီၩနီၪ မိအီၪဖျီၪထၪ့ လၧၦၡၩအမ့ၬယၫအၥိၭတၭး မၩၥံၫယူၭလၩ့အမ့ၬလီၫ. ယလီၩဘၪနၥံၪတီၩတီၩယီၩႇ အဝ့ၫၥံၪန့ဘၪယူၭ အဘိၪ့ဒၪဝ့ၫလီၫ.
အ့ၪမွဲနဝ့ၫဒၪယီၩႇ ထီးနအ့ၪဒုၪဆၧအၪ့ဆၧအီၩတၭႇ ဘဲၫၥိၭနဒုၪဆၧအၪ့ ဆၧအီၩနီၪႇ ထီးအီၪဖျီၪဘၪလၧၦၡၩအမ့ၬယၫလဂ့ၩတၭႇ ဘဲၫအမိအီၪဖျီၪ လၧဖါလၧအအီၪၥူၪဝ့ၫ အမ့ၬယၫအၥိၭတၭႇ ဂုၪနခိၪဎွံၪႇ ဖျါခွံၬနမ့ၬဆံၭ.- နဖါလၧအဒၪဆၧလၧ ဆၧအီၪၥူၪအဖၧၩ့နီၪႇ  မိဖ့ၪလၫ့ဆၧဘိၪ့ လၧနၧၩလီၫ.