ဆၧၥီၪ့လိၪဘၪဆဲၫ့ဆၧဖ့ၪကၪထဲၩ့ဆၧ

နၥံၪနါဂၧၫ့ယူၭလၧၦစံၭဝ့ၫဒၪပမ့ၬၥၪလတီၪ့အဂးလတီၪ့ပၥွၫလဘံၪ့အဂးလဘံၪ့လီၫ.-အ့ၪမွဲယဝ့ၫ ဒၪယီၩယစံၭနၥံၪ ထီးဂဲးလိၬတ့ၭလၬဆၧမၩအၧၩ့လဂ့ၩးၦလၧအဒဲၩနနိၭဖၩထံၭအထွ့ၪလဂၩနီၪကၠၪစိၩဝ့ၫလၧအနီၪလခီၫဆံၭ.- ၦလၧအမိမၩန့ဘၪ အၥၭလၧနဆဲၫ့တၭချဲၩ့န့နၧၩလၧခွးနီၪ ဖ့ၪလၫ့အဝ့ၫ လၧနဖၬဘဲၩ့ဆ့ဆံၭ.ၦလၧအအၪ့မၧၫ့ဆီၪ့နလ့ၩလမံၫလၬတၭ လ့ၩဂၧၩ့အဝ့ၫဒၪနံၫမံၫလၬဆံၭ.- ၦလၧအအၪ့ကံၩ့ဆၧနီၪ ဖ့ၪလၫ့အဝ့ၫနီၪဆံၭ. ၦလၧအမိအၪ့လီးဘၪအၥၭ လၧနဆၧနီၪ ထီးကၠၪဒိၭချိၫ့နၥၭလဂ့ၩ.နၥံၪနါဂၧၫ့ယူၭ လၧၦစံၭဝ့ၫဒၪ အဲၪၦလၧနနဲၩ့ထံၭတၭၥၭဂဲၫ့နဒုၪနဒၩဆံၭ.- အ့ၪမွဲယဝ့ၫဒၪယီၩ ယစံၭနၥံၪအဲၪနၥံၪအဒုၪအဒၩဆံၭ. ၦလၧအဆိၪ အၧၩ့နၥံၪနီၪဆိၪဂ့ၩ အဝ့ၫၥံၪဆံၭ. ၦလၧအၥၭဂဲၫ့ နၥံၪနီၪမၩဂ့ၩအဝ့ၫၥံၪဆံၭ. ၦလၧအမၩကြၩ့ထမး နၥံၪဒဲမၩအၧၩ့မၩနၭနၥံၪနီၪ ဘၩဆိၪဖၪန့အဂးဆံၭ.- ဘဲၫၥိၭနၥံၪမိကဲၪထၪ့ နၥံၪအဖါအီၪလၧမူၭခိၪ အဖိၪအဂဲးလီၫ. အဂဲးဘဲၫယီၩ အဝ့ၫဒၪနီၪအၪ့မၧၫ့အ မုဂဲၫထၪ့လၧၦအဂ့ၩဒဲလၧၦအအၧၩ့အလီၩ့တၭ အၪ့မၧၫ့အဆၧဆၧၩ့လၩ့လၧၦအတီၩအလီၩ့ ဒဲလၧၦ လတီၩလလီၩ့ဘၪ အလီၩ့ဆ့လီၫ.နၥံၪအ့ၪအဲၪၦလၧအအဲၪနၥံၪတၭမွဲနၥံၪအခိးအ တၩအီၪလၧဆၧနီၪလမံၩ့လဲၪ. ၦအၪ့ကံၩ့အခီၫ့ၥံၪမၩဝ့ၫလမံၩ့ဎးမွဲအ့ၬဧၪ.- နၥံၪအ့ၪချဲၩ့ဒုၪ့န့ၫနၥံၪ အထၧၫ့ ဖုဝဲနီၪမွဲနၥံၪ မၩအၪနဲၪ့ဒံၭနီၪလဲၪ. ၦအၪ့ကံၩ့အခီၫ့မၩဝ့ၫဘဲၫနီၪၥိၭ မွဲအ့ၬဧၪ.မၩအၥၭဘဲၫနီၪတၭမွဲနၥံၪလၧၫ့ထၪ့ဎွ့ၩထၪ့ဘဲၫ နၥံၪအဖါအီၪလၧမူၭခိၪလၧၫ့ထၪ့ဎွ့ၩထၪ့ဝ့ၫ အၥိၭ နီၪဆံၭ.